الكيك بنكهتين الكاكاو و الفانيلا
الكيك بنكهتين الكاكاو و الفانيلا
المقادير
- 2 كاسة طحين منخول
- كاسه الا ربع زيت
- كاسة حليب ب 4 ملاعق حليب
- 4 بيض
- تلات معالق كاكاو
- رشة ملح
- نص ملعقة صغيره خل
- ملعقة كبيره فانيلا
- ملعقة كبيره بيكنج باودر
- برش ليمون أو برتقال
الخطوات
يسعد أوقاتكم ..اليوم راح اقدملكم طريقتي بالكيك العادي بس طريقة النكهتين لأرضاء الاذواق جميعا
ويلااا مع الطريقه …
& أول شي ببلش بخفق البيض مع الفانيلا وبرش الليمون أو البرتقال ومن بعد ما يتم خفقه مزبوط بضيفله السكر وبخفقه ليذوب السكر ..ومن ثم بضيفله الزيت ونص معلقه صغيره خل ابيض وبرجع أخفقه …
& بعد هيك بكون ناخله الطحين مره أو مرتين عشان أدخل الهوا فيه ..وبضيفله البيكنج باودر ورشة ملح …
& ببلش بوضع الطحين عالخليط واخلط وكل ما أضيف طحين بضيف معه من كاسة الحليب السائل شوي لحتى أخلص الكميه من الطحين والحليب
كاسة الحليب بضيفلها أربع معالق حليب …
& وبعد ما يتم خلط خليط الكيك مزبوط …بقسم الخليط لجزئين ..حسب ما بدك كميته ..وبضيف لجزء منهم تلات معالق كاكاو وبخلطهم مزبوط …وبضيف للخليط التاني تلات معالق طحين وبخلطهم …هيك بصير عندي قسم عالكاكاو وقسم عالفانيلا ..
& بجهز القالب بدهنه زيت وارشه بالطحين …وببلش اضيفله من خليط الكيك من القسمين سوااا كل قسم بأيد لحتى يخلص عندي الخليط ..
& وأخر شي بضعه بالفرن بالرف يلي بالنص أفضل عالحراره عاليه تلات دقايق ومن ثم بوطي تحته النار لاقل من الوسط وبعينله من بعد نص ساعه بختبره بعود خشبي او سكين اذا تم استواءه ولا لسى بده ..اذا طلع شي من خليط الكيك عالعود الخشبي بخليه من خمس لعشر دقائق حسب استوائه …
& ومن بعد هيك بتركه يتريح شوي وبعدين بخرجه من القالب ..وبقدمه ..ولا أروع من هيك ..
ملاحظه : الفرن بشغله من بداية تجهيزي للكيك لازم يكون حامي جدا لينجح الكيك معي ..ووضعه بالرف يلي بالنص بتم تحميره بدون ما اشغل التحمير عليه ..
بتمنى يعجبكم …وصحه وعافيه
