عجينة الفوندان الكندية ملكة الحلويات الشعبية

المقادير

• مارشميلو ابيض 300 غم
• سكر مطحون جاهز 600 غم
• زبدة
• 2 م.ك ماء
• 2م.ك زيت ذرة
• الوان غذائية جل او بودرة

الخطوات

حلوى الفوندان الكندية او عجينة السكر

السلام عليكم ورحمة الله وبركاته

حلوى الفوندان او عجينة السكر من اجمل طرق تزيين الكيك في العالم ويعود اصلها إلى دولة كندا ، ويوجد فوندان اوروبي لكنه سائل غير قابل للفرد ، رح اعطيكم طريقة الفوندان الكندي بكل التفاصيل ، وان شاء الله تكون سهله وتجربوها.

أولاً/ المارشميلو

بنحتاج كمية من المارشميلو البيضاء ولكن استخدمت اللون الزهر وابيض لاني بحاجة اللونين هذول فقط ، لو كنتي رح تلوني الوان ثانيه لازم تكون المارشميلو بيضاء .

حبات المارشميلو اذا كبيرة لازم تتقطع بالمقص وتتصغر لحتى يسهل ذوبانها ، انا قصقصتها واستخرجت اللون الابيض منها لحاله لاني بدي عجينة زهر وعجينة بيضاء.

ثانياً/ تذويب المارشميلو

في جاط زجاجي ادهنيه بكمية وفيرة من الزبدة وضعي المارشميلو فيه وضعي ملعقتين ماء وملعقتين زيت ذرة كمان ودخليها الميكروويف لمدة عشرين ثانيه وطلعيها اخلطي بملعقة مدهونة زبدة لانه الخليط دبق جدا

ورجعيها عشرين ثانيه وكرري لحتى تذوب تماما.

اذا ماعندك ميكروويف بتقدري تذوبيها على حمام مائي والصحن اللي فيه المارشميلو لا يلمس المي اللي بتغلي.

ملاحظة/

انا عملت العجينة بالمارشميلو الزهر لحال وبعدين المارشميلو الابيض لحال. وما احتجت الونهم .

ثالثاً/ العجن

بعد ذوبان المارشميلو بدنا نبلش نضيف السكر المطحون تدريجيا بنضيف وبنخلط وبس تشرب شوية سكر بنصير نعجن بالايد ونضيف سكر لحتى تتكون عندي عجينة متماسكة.

ملاحظة هامة جدا/ كيف بتعرفي انه العجينة جاهزة؟

1—العجينة عشان تكون شبعانه سكر بدك تشديها بايدك لازم تقطع منك، اذا مطت مثل العلكة لمسافة بعيدة بتكون لسا مش جاهزة وهالخطوة موضحة بالصور.

2— السكر لاازم جاهز وفائق النعومة ، سكر طحن بيتي ما بزبط بتضل العجينة خشنة وملمسها بشع.

3— كمية السكر ضعف كمية المارشميلو بالعادة ممكن تاخد اقل سكر حسب نوعه ، مثلا 300 غم مارشميلو بدهم 600 غم سكر، وهوه بكون مكتوب الوزن عالعلب اذا ماعندك ميزان.

رابعاً/ التلوين

بعد ماتجهز العجينة بتيجي مرحلة الالوان احلى مرحلة ، صحيح انا مااحتجت الون بس لما بدك تلوني هون وقتها ، استخدمي الوان جيل او بودرة ، ممكن استخدام الوان ساءلة بس بتأثر على قوام العجينة الجيل افضل شي وافضل نوع ويلتون.

بتقطعي العجينة طبعا البيضاء بدها تكون لقطع على عدد الالوان اللي محتاجيتها ، وضيفي قطرات لون وارجعي اعجني لحتى تحصلي على لون مثالي.

نصيحة/

لاتنسي انه كمية عجينة التغطية بتكون كبيرة فانتبهي انك تلوني القطع بحسب الحاجة، مثلا لو بدك تعملي وردات صغار ما تلوني الا عجينة صغيرة على قدهم.

خامساً/ التغليف

غلفي قطع العجينة بشكل ممتاز ممنوع يوصلها هواء واحتفظي بها في الثلاجة ، وقبل الاستخدام بساعة طلعيها عشان تلين شوي، لا تخافي اذا لقيتيها قاسيه عادي هذا طبيعي بدك ترجعي تدلكيها وتعجنيها بترجع تلين .

/لا تنسونا من صالح دعائكم.

ارجو انكم تدعموني وتضيفوها للمفضلة، ولكم جزيل الشكر