حلوى المن والسلوى ملكة الحلويات الشعبية

المقادير

• مكونات الميرنج:
• 2 ابيض بيض بارد
• نصف م.ص ملح
• م.ص خل ابيض
• مكونات القطر:
• كوب ونصف سكر
• نصف كوب ماء
• نصف كوب جلوكوز
• م.ك عصير ليمون
• المنكهات:
• م.ص هيل مطحون
• كوب فستق حلبي
• كوب لوز غير مقشور
• نشا

الخطوات

السلام عليكم ورحمة الله وبركاته

حلوى المن والسلوى الحلوى العراقيه المشهورة واللذيذة جدا وغاليه نوعا ما ، هيه اصلا نزلت من السماء بمعنى ان الله تعالى انزلها لبني اسرائيل قوم موسى عليه السلام ، وكانت طعاما لذيذا موجود بصورة طبيعية على الاشجار

، رح اقدم طريقته بمنتهى الامانة والسهولة وان شاء الله تعجبكم وتجربوها.

أولاً/ الميرنج

بتحتاجي 2 بياض بيض بارد اخفقيهم بالخفاقة الكهربائية مع رشة ملح و ملعقة صغيرة خل ابيض واستمري بالخفق لحتى ينتفخ البياض ويصير لونه ابيض ، في هذه الاثناء بتكوني حاطه القطر عالغاز

ثانياً/ القطر

هذا قطر مخصوص لهذه الحلوى مش لأي حلويات ثانيه

بتحطي كاسة ونص سكر بطنجرة وعليهم نصف كاسة ماء ونصف كاسة جلوكوز ، ورح انزل طريقة الجلوكوز المنزلي ان شاء الله ، وبتحطيهم عالغاز على نار عاليه مع مسح اطراف الطنجرة بفرشاة مبلله مي وامسحي عشان مايسكر القطر معك، حركي القطر بهدوء من الوسط بدون ماتوصلي الملعقة للاطراف بس يغلي وقفي عملية التحريك والمسح بالفرشاة واتركيه على نار هاديه لحتى تتكون معك مرحلة الكرة الطرية وبتعرفيها بالاختبار

ملاحظة مهمة/

اختبار الكرة الطرية للقطر ، بتحضري كاسة فيها مي من الحنفية وبتاخدي نصف ملعقة صغيرة من القطر وبتنزليه بالمي لازم مايذوب وتمسكيها بايدك تقدري تشكلي منها كرة طرية. هاي المرحلة الصح لاستواء القطر.

ثالثاً/ خلط القطر عالميرنج

بتكون لسا الخفاقة بتخفق بالبيض وصار البيض رغوة بيضاء متماسكه بيتشكل منها شكل منقار عصفور اذا رفعتي المضرب من البيض، بتجيبي القطر وهو بغلي بعده عن النار عالخفاقه ضيفيه مثل الخيط للبياض مع الخفق المستمر لحتى تخلص كمية القطر كلها بتخلي الخفاقة شغالة لحتى يبرد الاناء اللي فيه الخليط بتحسيه بايدك بس يبرد مش يثلّج يعني بس يصير دافي بتوقفي الخفق ، رح تشوفي كيف صار المزيج اروع من الرائع ثقيل ومتماسك وابيض ناصع. وبيمط معك ما بيقطع مثل المطاط.

ملاحظة/

بدك تنتبهي لخفق البيض قبل اضافة القطر انك ماتبالغي بالخفق اكثر من مرحلة المنقار لانه وقتها رح يصير معك مارشميلو بدل المن والسلوى.

رابعاً/ المنكهات

جهز الميرنج مع القطر وصار القوام ثقيل بتجيبي ملعقة مدهونة زيت ذرة او سمنة وبتضيفي اللوز والفستق والهيل وبتقلبي المزيج لحتى تمتزج النكهات كلها .

خامساً/ الصب

بتكوني مجهزة صينية مرشوشة نشا بكمية منيحة وبتصبي الخليط فيها طبعا بكون دبق جدا مارح ينفرد معك فبترشي وجهه شوية نشا وبتحطي نايلون تغليف فوقه وبتفرديه بايدك من فوق النايلون رح يمد بسهولة وبتخلي النايلون على وجهه لمدة 24 ساعة بالثلاجة.

سادساً/التقطيع

ثاني يوم بتقطعيه بالسكينه مربعات صغار وبتكوريها وبتغمسيها بالنشا ، او بايدك بدون السكين بتاخدي منها وبتكوّري وبتغمسي بالنشا او ممكن تدحرجيه بمكسرات مطحونة ومحمصة وبتقدميها، وصحة وهنا.

انا متأكدة اذا جربتوها راح تعجبكم وتعتمدوها لانها فعلا مميزة وطيبة وناجحه. بس للامانة قوامه أطرى من المن والسلوى الجاهز ، في طريقة ثانيه بينضاف الها عسل بس اجربها رح اشاركم تجربتي ان شاء الله.

لا تنسونا من صالح دعائكم