طريقة عمل فطيرة الدجاج بالجبن
فطيرة الدجاج اللذيذة
المقادير
- مقادير الحشوة:
- دجاجة مسحبة ومقطعه مكعبات
- بصل مفروم
- فلفل ملون مفروم
- فطر مقطع
- ذرة
- جبنة موزريلا
- ملح وفلفل
- بهارات دجاج
- زيت زيتون
- زيتون اخضر مقطع
- مقادير العجينة:
- 3 كوب طحين ابيض
- نصف كوب زيت ذرة
- نصف كوب حليب بودرة
- م.ص بيكينج باودر
- م.ك خميرة فورية
- 2 م.ك سكر
- م.ص ممتلئة ملح
- ماء دافي
- للزينة:
- سمسم وحبة البركة
الخطوات
فطيرة الدجاج اللذيذة
السلام عليكم ورحمة الله وبركاته
هذه الفطيرة وجبة غذائية كااملة مكتمله مع كاسة عصير فيها كل الفوائد والعناصر الغذائية .
أولاً/ العجين
بننخل الطحين مع الحليب والبيكينج باودر والملح مرتين عالاقل بدهم يتنخلوا ، وبنضيفلهم الزيت وبنبسه مع المواد الجافة بشكل ممتاز وبنكون ضايفين الخميرة الفورية على كاسة ماء دافي وملعقتين سكر ومغطى ليتفاعل ، بنبلش نضيف بكاسة الخميرة اول شيء وبنعجن وبنكمل ماء دافي رح تحتاج كمان نص كاسة ماء عدا كاسة الخميرة، وبنعجن مش اقل من عشر دقائق ولحتى تصير العجينة ملساء وطرية غير دبقة، بنغطيها وبنتركها تتخمر بمكان دافي.
خيارات للتخمير السريع/
ممكن نخمر العجينة بايام الصيف بالشمس بمكان نظيف .
بالشتاء ممكن تخمري العجينة بجنب الصوبة وبتلفي العجينة بحرام وقدام الصوبة.
او بتشعلي الفرن يدفى بس ما يسخن وبتطفيه وبتحطي العجينة فيه بتخمر بسرعة، بس اياكي يكون سخن رح تستوي بدل ما تتخمر.
ثانياً/ حشوة الفطيرة
بتقلبي البصلة بزيت زيتون وبتضيفي عليها الدجاج وبنصف مدة الاستواء بتضيفي الخضار تستوي مع الدجاج وتتنشف من اي سوائل، وبآخر خطوة بتضيفي نصف كمية جبنة الموزريلا للخليط وبتقلبيه وبتتركيه عجنب لحتى تحضري الصينية للشوي.
ثالثاً/ التطبيق
بتقسمي العجينة بعد ماخمرت لقسمين قسم بتفرديه بصينية خبز مدهونة زيت وبتفردي عليها الحشوة وبتفردي القسم الثاني وبتغطي فيه الحشوة وبتسكري الجوانب مع بعض كويس وبتفتحي فتحه بنص العجينة من فوق عشان البخار يطلع وبتدهني وجها بحليب وبترشي سمسم وحبة البركة ورشة جبنة كمان اذا حبيتي ، انا ارفقت صور مرة بجبنة عالوجه ومرة بدون جبنة.
رابعاً/ الخبز
على فرن محمي بتحطيها عالرف الوسط لمدة ثلث ساعه او اكثر شوي على نار متوسطة وبس تستوي بتبين محمرة ومشقرة من الجوانب بتحمريها وبتقدميها وصحة وهنا.
