طريقة المقلوبه المميزة على طريقتي
طريقة المقلوبه المميزة على طريقتي
المقادير
- نصف كيلو بيتنجان مقطع شرائح بالطول ومقلي
- حبة بندورة كبيرة مقطعة شرائح
- حبة بطاطا مقطعة شرائح
- ربع كيلو لحمة ناعمة
- كوبين رز
- مقدار الماء المناسب للرز اللي عم تستخدموه
- ملعقة كبيرة دبس البندورة
- رشة فلفل اسود
- ملح الطبخة حسب الرغبة
الخطوات
☆بسم الله الرحمن الرحيم☆
- مقدار الماء المناسب للرز اللي عم تستخدموه + ملعقة كبيرة دبس البندورة + رشة فلفل اسود + ملح الطبخة حسب الرغبة.. بينحطو عالنار مع بعض ليغلو سوا مشان نضيفهم للرز
بالبداية منقلي اللحمة بشوية زيت او زبدة او سمنة متل مابتحبو ومنشيلها على جنب
بعدين منصف شرحات البطاطا والبندورة وبعدين البيتنجان على داير الطنجرة متل مو شايفين ومنحط اللحمة الناعمة فوقو ومنخلي شوي منها للزينة
منصفي الرز اللي منكون ناقعينو لمدة ساعة او اكتر ومنحطو بالطنجرة فوق اللحمة وبين شرحات البيتنجان ومنضيف قسم من المي المغلية مع دبس البندورة بحيث توصل تغمر سطح الرز شوي ومنترك الباقي عم يغلو ومنغطي الطنجرة ومنوطي النار
بعد كم دقيقة بتكون نشفت شوي منرجع نضيف باقي المي
العبرة من صبهم بالتدريج انو مايتحرك الرز من مكانو ويتلخبط مع غير مكونات
هيك بتضل المكونات مطبقة بشكل مرتب
ومنتركو مغطى هيك لتستوي المقلوبة منطفي عليها ومنتركها حوالي عشر دقايق بالطنجرة متل ماهية
وبعدين منقلبها على جاط ومنخلي الطنجرة مقلوبة عالجاط كمان شوي لتحافظ على شكلها وبعدا منشيل الطنجرة منلاقي عنا هالقالب الحلو..
بتمنى تجربوها وتعتبروها تغيير عن المعتاد وتقولولي اذا حبيتوها
