طريقة الهريسة السورية والطعم تحدي فوق الخيال

المقادير

• ٤ كاسات سميد خشن حصرا
• كاستين سكر
• نص كاسه سمنه مذابه
• نصف ملعقه صغيره بكمبودر
• نصف ملعقه صغيره بكربونات
• رشه ملح
• كاستين حليب
• مكسرات المتوفر للزينه
• نصف ملعقه قرفه (اختياري )
• القطر:
• كاستين ونص سكر
• كاستين مي
• عصره ليمونه

الخطوات

السلام عليكم صبايا زاكي اليوم راح نعمل سوا الهريسه السوريه الاصليه والطعم خيال بشهاده كل يلي اخدو الطريقه

بسم الله نبدا

منخلط السميد والسكر والملح والكربونات والبكمبودر

ومنذوب السمنه وبعدا منبس فيا السميد

وبعدا منعجن بالحليب

الكاسه لازم لكل المقادير نفس الحجم

مندهن الصينيه بطحينيه وممكن سمنه بس الطحينيه اطيب طعمتا مع الهريسه

منمد الهريسه بالسمك يلي بتفضلوا بس يفضل ماتكون سميكه كتير

منريحا اقل شي ٤ ساعات

انا للامانه اقل شي بريحا ٨ ساعات او من قبل بيوم

ولاتفكرو بطعم التخمير لان مافي خميره

ومافي لبن

بعدا منزينا بمكسرات يفضل نقعا بماء مشان ماتنحرق

منخبزا على ١٨٠ لتحمر الاطراف منيح وبعدا منطالعا منحزا من الاطراف ومنعيد على تقطيعا

ممكن تقطعوا قبل ما تخبزو وممكن اثناء الخبز

ومندهن الوجه معلقه قطر مخلوطه مع سمنه

ومنرجا للفرن تتحمر

منطالعا ومنسقيا قطر سخن نار ومنخلى من القطر مقدار مغرفه

منرجع الهريسه على الفرن لخمس دقايق

ومنطالعا منحط بقيه القطر ومنخليا تبرد منيح

ملاحظات

السميد حصرا خشن لا تحطو ناعم ابدا لان بتفرط

ممكن هي الطريقه تعملوا محشيه

قشطه او جوز وقرفه بتطلع بتشهي

اذا بدكن تحشوا قشطه يفضل تمدو اول طبقه وتحطوا القشطه وتفرزوا نص ساعه ليسهل مد الطبقه التانيه

او ممكن تحطو الطبقه الفوقانيه بكيس حلواني اسهل

وبتتبعوا نفس الخطوات الباقيه

القطر لازم سخن وانتبهو ماتنسوا تقطعوا قبل لا تسقوا القطر مشان تتشرب احسن

القطر احسن يكون مرق ماتغلو كتير لان لو غليتوه زياده راح يبقي بس من فوق وماتتشربوا الهريسه

انا عملت صينيتين صينيه زينتا بطريقه عاديه وصينيه رتبت المكسرات

وصحه وهنا للجميع