كيكة الشيفون 3in1 بثلاث نكهات شيء في منتهى الروعة والجمال

المقادير

• 6 بيضات بحرارة الغرفة + 1 بياض زيادة
• كوب ونصف سكر
• نصف كوب زيت ذرة
• كاستين وربع طحين منخول مرتين
• 2م.ص بيكينج باودر
• م.ص ملح على نصفين نقسمها
• برش ليمونة او برتقالة
• عصير ليمونة او برتقالة
• 3/4 كوب ماء
• م.ك فانيلا
• ملعقتين كاكاو وملعقتين قهوة

الخطوات

السلام عليكم ورحمة الله وبركاته

انواع الكيك كثيرة جدا وكلنا متعودين بين وقت والثاني نعمل كيكة الشاي الشهيرة اليومية ، فحبيت اجرب كيكة شاي برضه بس متميزة هي كيكة الشيفون والصراحة هيه اكثر من رائعة شكل وطعم ، وسبب تسميتها بالشيفون لانها رقيقة وناعمة مثل الشيفون .

أولاً/ تجهيز القالب والفرن

قبل ما تبدأي بالكيكة كوني مجهزة قالب كيك يكون كبير وحوافه مرتفعه لانه الكيكة بترتفع اكثر من الكيك العادي ، وانا ماكان متوفر عندي قالب كبير فعملت قالب من اختراعي هوه طنجرة قياس 26 غلفتها بورق زبدة من تحت والجوانب وبالنص حطيت علبة معلبات وغلفتها بورق زبدة برضه وعبيتها حجار اللي بنستخدمهم بالخبز بكونوا ملسين ونضاف وما بنزل منهم اي اتربه طبعا ، الحجار عشان تثقل العلبة وماتتحرك بالطنجرة، ممكن بدل الحجار تحطي حبوب فاصولياء او ترمس او حمص اي حبوب جافه.

ولازم نشغل الفرن قبل بدء العمل على حرارة 170ْ .

ثانياً/ خليط الصفار

بنفصل البيض صفار لحال وبياض لحال صفار 6 بيضات بنضيف له ملعقة كبيرة فانيلا وبرش ليمونة او برتقالة وبنحركهم سوا .

بنكون محضرين المواد الجافة مع بعض الطحين والبيكينج والملح والسكر والطحين منخول مرتين ، بنخلطهم سوا وبنضيف خليط الصفار عليهم ونصف كوب زيت ذرة وثلاث ارباع كوب ماء عليه عصير ليمونة كاملة او برتقالة

وبنخلط المواد كلها مع بعض بالخلاط او باليد او بالويسك مابتفرق ، لانه مش من هاد الخليط اللي احنا ماخدين الهوا.

ثالثاً/ البياض

بنحتاج 7 بياض بيض عليهم نصف م.ص ملح وبنضربه عالمضرب الكهربائي لازم لحتى تبين رغوة البيض بنضيف نصف كوب السكر على ثلاث دفعات خفيفة وبنضل نخفق لحتى يصير مثل الكريما واذا بتقلبي الجرن ما بنزل منه شي يعني بدنا بياض ثابت ومنفوش لابعد حد.

رابعاً/

بدنا نضيف الميرنج لخليط الصفار ملعقة ملعقة ونخلط بلطف من تحت لفوق عشان نحافظ على الهواء اللي فيه لحتى تخلص كل كمية البياض ، طبعا رح تتفاجئي بكمية الخليط النهائية بتطلع كبيرة.

خامساً/ النكهات

بنقسم الخليط لثلاث اقسام بلطف وبنضيف لقسم ملعقتين كاكاو منخوووول وبنخلطه بحرص من تحت لفوق.

القسم الثاني ملعقتين نسكافيه او قهوة تركيه بس يكون منخوووول برضه ونفس الشي التخليط من تحت لفوق.

القسم الثالث اتركيه ساده ابيض.

سادساً/

بتصيري توزعي من خليط الكيك على قاع القالب على شكل بقع بقعه كاكاو بقعه قهوة بقعة سادة وهكذا لتخلص كل الكمية .

بتضربي قالب الكيك بالرخامة ضربتين وعالفرن لمدة ساعة لساعة وربع حسب فرنك المهم بده يستوي على نار هاديه وقد ما ياخد بالفرن ياخد انا فرني مش حامي اخد ساعة ونص بالفرن معي.

وطبعا لا تفتحي الفرن ولا بأي حال من الأحوال قبل الساعة.

وبعد الاستواء اتركيه يبرد شوي قبل ما تقلبيه لانه رقيق وهش. وطبعا قد ما احكي عن قوام هالكيكة مابوفيها حقها يعني بتضغطي عالقطعه بقوة وبتتركيها بترجع زي ماكانت بالضبط زي الاسفنج .

الفرق بين كيكة الشيفون والكيكة الاسفنجية

كيكة الشيفون

فيها كمية من الدهن

فيها بيكنج باودر

يخلط كل المواد معا عدا البياض يخفق وحده.

الكيكة الاسفنجية

لايوجد فيها دهن نهائيا ولذلك بتكون ناشفه

لايوجد فيها بيكينج باودر فهي تعتمد على بياض البيض فقط للارتفاع

يتم خفق الصفار مع سكر لوحدة حتى ينتفخ وثم تضاف باقي المكونات عدا البياض يخفق وحده.