دجاج شواية خرافي مع رز مندي ولا أروع من هيك
دجاج شواية خرافي مع رز مندي ولا أروع من هيك
المقادير
- دجاجة كاملة منضفة ومغسولة منيح
- ملعقة او ملعقتين سمنة مذوبة
- أول خليط لنقع الدجاج:
- لتر مي
- نصف كوب خل تفاح
- 4 ملاعق كبار ملح خشن واذا مو متوفر ملح عادي
- نصف ملعقة صغيرة كاري
- تاني خليط لنقع الجاج:
- بصلة وسط
- راس توم
- نصف كوب زيت نباتي
- نصف كوب لبن
- نصف كوب خل
- نصف ملعقة دبس رمان
- نصف ملعقة صغيرة دبس فليفلة
- البهارات عبارة عن:
- ملعقتين كبار بهار ماجي
- أو خضار مشكلة
- فينا نستبدلهم بمكعبين ماجي واذا بتلاحظو انا حاطة ملعقة بهار خضار مشكلة ومكعب يعني عملو اللي بتحبوه هههه
- نصف ملعقة صغيرة قرفة
- نصف ملعقة صغيرة هيل
- نصف ملعقة صغيرة فلفل أسود
- نصف ملعقة صغيرة زنجبيل
- نصف ملعقة صغيرة بابريكا
- انا حطيت بقلب الجاجة:
- بصلة
- ورق غار لتعطي نكهة أطيب وهالشي خياري طبعا فيكم ماتحطو
- المقادير لرز المندي:
- 3 كوب رز بسمتي مغسول ومنقوع ومصفى
- بصلة وسط مفرومة نااااعم
- البهارات عبارة عن:
- 3 مكعب ماجي
- نصف ملعقة صغيرة بهار مشكل
- نصف ملعقة صغيرة زنجبيل
- ربع ملعقة صغيرة توم بودرة
- شوية هيل حب
- قرنفل حب
- فلفل أسود حب
- عود قرفة طبعاً انا نسيتو ههههههه
- 3 ملعقة سمنة مع شوية زيت
- ألوان للرز وزبيب او مكسرات (اختياري)
الخطوات
☆بسم الله الرحمن الرحيم☆
عنا خلطتين للجاج
اول خليط منحرك المكونات مع بعضها ومننقع فيها الجاجة بعد ماننضفها اقل شي 5 ساعات او اذا حبيتو أكتر
هالخطوة رح تطري الجاج وتعطيه نكهة رائعة ومارح يبقى فيه ولا ربع نتوفة زنخة
بعد كم ساعة منشيل الجاجة من هالمنقوع ومنغسلها منييييح بالمي العادية لحتى يروح هالملح بما انو كميتو كبيرة
هلا بيجي دور الخليط التاني منحط كل شي عدا المي بالخلاط ومنطحن ليصير المزيج نااااااعم ومنضيف المي ومنرجع تشغل الخلاط دقيقة لنتأكد انو كل شي ناعم وكمان مننقع الجاجة بهالخليط كم ساعة
وانتبهو تكون الجاجة شبه مغمورة سواء بالخلطة الأولى أو التانية
بالنسبة إلي بعمل الخلطتين من المسا
بنقع الجاجة بالخليط الاول وبس فيق عالفجر بغسلها وبنقع بالخلطة التانية لوقت الشوي ولاقيت هيك افضل شي وبعدين منجي لعند جاجتنا المدللة منقيمها من الجاكوزي اللي قاعدة ومسترخية فيه مو عرفانة شو مستنيها ومنربطلا رجليها ومنضبلا جناحاتا لحتى ماينحرقو ومنحط عليها بالمعلقة ملعقة سمنة مدوبة
ومنحطها حسب المتوفر اذا في سيخ شوي حطوها واذا مافيه حطوها على شبكة الفرن متلي وأهم شي تحتا يكون في صينية
هي الصينية رح تنزل عليها سوائل وعصارة من الجاج
رح نشوي على درجة حرارة 180 والفرن يكون مشغل من فوق بس و لما تبلش تتشقر شوي من جهة رح نفتح الفرن ونسقيها بالعصارة اللي متجمعة عالصينية ونقلبها على جهة تانية لحتى تاخد التحمير من كل الأطراف ولما تستوي وتقرب تتحمر عالاخير رجعو دهنوها بسمنة سايحة لتتحمر منيح
ماتفكرو بتعذب
نسقو الخطوات ورح تلاقوها سهلة كتير ورح يعجبكم طعمها كتير ان شاء الله وعالسفرة ياقاتل يامقتول هههههه..
فيكم تعملو هالطريقة اما مع رز مندي او جاج مشوي لحالو مع بطاطا مقلية وسلطات
انا حبيت نزلو مع المندي لحتى اكتبلكم طريقتي بالرز كمان..
هلأ بقى دور المندي
منحط السمنة والزيت عالبارد بس اذا كانت السمنة مجمدة منشغل لتسيح بعدين منتركهم يبردو شوي ومندخنهم بالجمر ومنغطيهم لربع ساعة لتطفي الجمرة عالاخير وتاخد الزيوت كل التدخينة
يعني نحنا رح نسخن زيوت الطبخة مو الرز بحد ذاتو بعد الطبخ
هلا بقى رح نشيل شوي من السمنة المدخنة لحتى ندهن فيها الفروج وقت التحميرة الأخيرة متل ماقلتلكم قبل شوي
و منشغل النار ونحط البصل والبهارات والماجي ونحمسهن مع بعض ليدبل البصل بعدين منضيف المي لتغلي منحط الرز اول حوالي 6 دقايق على نار عالية بعدين منوطي ومنتركو متل العادة ليستوي بهدوء وبس تنشف ميتو تقريبا منحط الألوان اللي بدنا ياها اذا حبينا ومنرجع نغطيه ومنتركو يتهدى وانا عملت كمية زبيب خلطت نصها مع الرز ونصها حطيتو عالوش وبسسسس
عنجد جربوها لأني كتير حابة تستمتعو بطعمها
اصحكم ماتجربوها لأنو طقت ايدي وانا اكتب واشرح بهالوصفة هههههههههه ودعولي حبيباتي
بحبكم كتير قد كل الجاج المشوي اللي بالدنيا هههه♡
معليه ماتواخذونا تأثير المندي شغال..
