المفتول طبخة أصيلة بطريقة معاصرة! ليش لأ ؟سلسلة وصفات التوفير 2

المقادير

• كوب برغل ناعم منقوع
• 4 كيلو طحين اسمر
• حمص مسلوق
• عدس مسلوق
• دجاج
• بصل
• ورق غار
• صلصة بندورة
• بهارات دجاج
• بهارات كاري
• ملح وفلفل
• ماجي

الخطوات

المفتول طبخة أصيلة بطريقة معاصرة! ليش لأ ؟

السلام عليكم ورحمة الله وبركاته

طبخة المفتول طبخة شعبية قديمة ماكان بيت يخلو منها في الماضي بس يلي حافظوا عليها مش كثار للأسف لإنه شغلها بده وقت وتعب وتقنية وحرفيه بالشغل ، بس احنا بزمن السرعة والتكنولوجيا ليش ما نستغلها افضل استغلال ونسخّرها لخدمتنا ، حتى لو ادينا ما بوجعونا ولا بنتعب من الفتل اليدوي ، خلينا نستغل الاجهزة يلي دفعنا فيها مبالغ ونوفر وقت وجهد.

انا عمري مافتلت المفتول الا على ايدي على طريقة أمي الله يرحمها ، بس جربت أغير واستعمل العجان وطلع أكثر من رائع في الفتل وهوه بقوم بنفس حركة اليد بالفتل ورح اعرضلكم الطريقة كاملة وان شاء الله تعجبكم.

أولاً/ الفتل

بدنا نكون مجهزين برغل ناعم منقوع حوالي كاسة ، ممكن برغل خشن بس انا بحب حبة المفتول تكون صغيرة ، وبنكون مجهزين طحين اسمر حصرا ، وجاط فيه مي مملحة.

باستخدام العجان ومضرب الكف اللي عشكل حرف k بنبلش نحط ملعقة برغل وعليه طحين كمية بالنظر ولنقل 4 ملاعق وبنشغل العجان عالسرعة الثانية ونضل نرش طحين رح يبلش يتشكل كرات العجين المفتول بنحط رشرشة مي مملحة ومزيد من الطحين وبنكرر هالعملية تقريبا خمس مرات بالوجبة الوحدة بس اخر شي يضاف يكون طحين مش مي .

بنفرغ المفتول الرائع بمصفى عادية عشان ننخله قبل مانحطه بمصفى الطبخ وبنفرغه بعد النخل بمصفى الطبخ المدهونة زيت زيتون.

بنكرر لحتى نعمل الكمية المطلوبة طبعا حسب رغبتك بس نصيحة اعملي وكثري منه بتذوقي جيرانك اكله قليل اللي بعملها ومنه بتفرزي منها.

ثانياً/ التهبيل او الطبخ عالبخار

بنكون مجهزين طنجرة المفتول وهيه خاصة بالمفتول بتيجي طقم الطنجرة مع المصفى وبنحط بالطنجرة منتصفها مي بس لازم المي ما تقترب من المفتول بس البخار اللي يلمسه.

وبس تغلي المي بنركب المصفى وبنتركها ساعة تتهبل.

بعد الساعة بنفرغ المصفى بسدر كبير بكون كتله بنفتته وبنصب عليه زيت زيتون وبنبسه زي المعمول بين ادينا لحتى كل حبة مفتول تصير هيه واختها، طبعا سخن كثير بكون بدك تتحملي لازم هالخطوة وهو سخن.

بنشربه من الشوربة وبنغطيه ربع ساعة يتشرب قبل التقديم.

ثالثاً/ شوربة المفتول

بنقلي الدجاج بالاول وبعدين بنزيده مي وبنسلقه مع بصل وورقتين غار وبنضاف صلصة بندورة وحمص مسلوق وعدس حب مسلوق وبنتركه يستوي ويتسبك.

ملاحظة/

في ناس بتسلق العدس مع سلق الدجاج مابحب اعمل هيك لانه لون المرقة بتصير اسود، فبسلق العدس ثلاث ارباع استوا وبضيفها بدون ميتها عالمرقة.

رابعاً/ التقديم

بتقدمي المفتول بسدر وعليه الدجاج ومزين بحب الحمص والعدس ، لاتجربي تحطي مكسرات طعمها مريع مع المفتول.

خامساً/ التفريز

لا تشربي كل كمية المفتول حطي على قد الغدوة والباقي اتركيه ناشف وبس يبرد حطيه باكياس تفريز وفرزيه ليوم تكوني مش طابخة بتعملي بس المرقة والمفتول جاهز.

سادساً/

ان شاء الله كل ست بيت تقدر تعمل المفتول ونعلمها لبناتنا حتى نحافظ على هالتراث النفيس وما ينقرض.

اهداء/

هالوصفة مهداه للشيف مريم رمضان يلي ما وفّرت التكنولوجيا واستغلتها بحكمة وذكاء وانا معها في هذا الاستغلال.

ملاحظة التوفير/

كيلو المفتول الجاهز بدينار ونصف انا عملت 5 كيلو مفتول ما كلفوني 3 دنانير.