البطاطا اللولبية المقرمشة بدون ماكينة سلسلة وصفات التوفير 3

المقادير

• بطاطا حبات صغيرة لمتوسطة كاملة مقشرة او بقشرها
• اعواد شواء خشب
• نكهات بطاطا وجبنة
• مكونات الخلطة:
• نصف كاسة طحين
• نصف كاسة نشا
• ملعقة صغيرة بودرة ثوم
• ملح وفلفل
• ماء

الخطوات

البطاطا اللولبية المقرمشة

السلام عليكم ورحمة الله وبركاته

وصفة اليوم تعتبر سناك شهي ولذيذ وجميل وغالي من برا عادة بتكون البطاطا اللولبية بالملاهي والمولات وعالعربايات بس بكون سعرها مقارنة بالكلفة الحقيقية عالي شوي.

حبيت اقدم هالاكلة المحبوبة عند الكل بأقل تكلفة.

أولاً/ تجهيز البطاطا

بنحتاج حبات صغيرة لمتوسطة الحجم واذا شكلها طولي بكون احسن بنغسلها مزبوط وبنشفها بنتأكد انه مافي اي نوع من الاتربة عليها، او بنقشرها.

بنجيب عود شواء خشب بنغرسه في وسط البطاطا بالطول وبنجيب سكين وبنصير نلف فيها حولين العود بس بدنا نعمل الشرحات رقيقة قدر المستطاع، بنكمل كمية البطاطا ومابنغسلها من النشا.

ثانياً/ خليط القلي

بنجهز خلطة لتغميس البطاطا قبل القلي وهيه

نصف كوب طحين

نصف كوب نشا

ملح وفلفل

بودرة الثوم

ماء

بنخلط كل المواد الجافة وبنضيف مي لحتى يصير مزيج سائل ولكن لزج.

ثالثاً/ القلي

بنحمي الزيت لدرجة معقولة زي قلي البطاطا العادي وبنجيب كل عود بطاطا بنغمسه بالخلطة وبننزله بالزيت لحتى يستوي ويتحمر ويقرمش .

لازم تنتبهي انه حجم القلايه يتناسب مع طول اعواد البطاطا.

رابعاً/ التقديم

بس تتحمر البطاطا رشيها برشة من بهارات البطاطا او بهارات جبنة او بهارات بيتزا مشاوي مكسيكي حارة اي نكهه بتحبيها. وانزلي عليهم بخطوط كاتشب او خردل وصحة وهنا.

ملاحظة التوفير/

ال 6 حبات بطاطا صغار بيطلعوا كيلو تقريبا وكيلو البطاطا بنص دينار وبالغلا بدينار وباقي الخلطة والبهارات كلها مابتكلف نصف دينار ، فطلعوا عنا بكلفونا بالبيت دينار ونصف على اكثر تقدير بينما بالمولات بكلفوا 6 دنانير.