مارشميلو بدون بيض لازم تجربوه مستحيل تجيبوه جاهز بعدها سلسلة وصفات التوفير 4

المقادير

• 2كوب سكر
• كوب جلوكوز
• ثلاث ارباع كوب ماء ربع لحال ونصف لحال
• 3 ملاعق كبيرة ممسوحة جيلاتين حبيبات
• م.ص فانيلا
• رشة ملح
• نكهة فراولة
• نشا للتقطيع
• زيت ذرة لمسح الصينية

الخطوات

السلام عليكم ورحمة الله وبركاته

المارشميلو او حلوى الخطمي او حلاوة القطن حسب كل دولة ايش بتسميها مختلفين عالاسم بس متفقين عالطعم الرائع والقوام الهش ، بقدمها اليوم بطريقة جدا جدا سهلة وبسيطة وقياسات بالكاس ولا ميزان غرامات ولا ميزان حرارة.

أولاً/ الجيلاتين

بتحطي 3 ملاعق جيلاتين حبيبات ممسوحة بالجرن يلي رح تخفقي فيه وبتحطي عليه ربع كوب ماء وبتحركيه شوي واتركيه عجنب لحتى تعملي القطر.

ملاحظة/

الجيلاتين متوفر عند العطار وسعره مش غالي بدينار بطلعلك يمكن 8 ملاعق .

ثانياًً/ القطر

بنحتاج كاستين سكر حبيبات ناعمة بنحطهم بإناء غير لاصق وعليهم كوب الجلوكوز ونزلت طريقته قبل هيك سهل جدا ، ونصف كوب ماء وعلى الغاز نار متوسطة وبنحرك بلطف لحتى يذوب السكر تماما ويغلي المزيج ،

بعد الغليان القوي يعني بتشوفي القطر ابيض من الرغاوي وبفور تفوير بتحسبي ستين ثانية فقط لا اكثر ولا اقل.

بالتزامن مع غليان القطر بتكوني شغلتي الخلاط على الجيلاتين.

ثالثاً/ صب القطر

بس تمر الدقيقة على غليان القطر بترفعيه عن النار ومباشرة بتصبيه على الجلاتين وهو واقف الخلاط رح تلاحظي فوران المزيج وبتحركيهم بملعقة شوي يعني نص دقيقة وبعدين بتشغلي الخلاط على سرعة 2 لحتى مايتطاير من المزيج وهو سخن .

بعدين بترفعي السرعة درجة وهون المزيج رح يمر بمراحل سبحان الله فعلا الطبخ كيمياء بكون مزيج شفاف بالبدايه بعدين بصير ينفش ويبيض لونه ويعلى .

بتضيفي رشة ملح وم.ص فانيلا وبتخليه يخفق بس يرتفع وينفش بتضيفي النكهه انا اخترت نكهة الفراولة طعمها طيب ولونها حلو.

ملاحظة/

النكهه برضه من عند العطار العلبة اللي بالصورة بنصف دينار بتقعد اكثر من سنة لانك بتستخدمي قطرات منها بس.

_ بس تندمج النكهه بالمزيج بتطفي الخلاط، يعني تقديري للمدة وهو يخفق يمكن عشر دقائق او اقل.

ملاحظة مهمة/

هاي المرحلة يلي بنعمل منها عجينة السكر قبل النكهه وهو ابيض المزيج بتضيفي اله سكر بودرة وبتعملي عجينة السكر، واللي انا منزله طريقتها برضه .

رابعاً/

بتدهني صينية او بايركس بزيت كمية وفيرة وبتصبي المزيج فيها وبتغطيه وبتتركيه 4 ساعات اقل شيء برا الثلاجة لازم ، لا تستعجلي لا تحطيه بالثلاجة.

خامساً/ التقطيع

بعد الاربع ساعات بترشي وجه المارشميلو بالنشا وبترشي السطح اللي رح تقلبيها عليه والسكينة كمان.

حاولي سلكي الحواف بسكين او سباتيولا وشدّيها بايدك لا تخافي هيه متماسكه مثل المطاط مابصرلها شي، ونزليها من الصينية وقطعيها بالشكل والحجم اللي بتحبيه.

سادساً/التقديم

قبل ماتقدميه تخلصي من البودرة الزيادة وقدميه على زوقك .

انا زينته برشه من الفستق الحلبي وحبات جميلة من القيقب جمعتهم عن شجر القيقب ، شكل حلو وطعم رائع.

ملاحظة التوفير/

مابيخفى عليكم انه المارشميلو غالي بشكل واضح الكيس اللي فيه 200 غرام بحوالي 2.75 قرش وهو كله اكمن حبه لا وبيجو ملزقات ببعض كمان.

جربي اعمليه مرة ومتأكدة انك عمرك مارح تشتريه.

وصحة وهنا