كيكة ملعب كرة القدم ما أحلى فرحة الأطفال فيها سلسلة وصفات التوفير 6

المقادير

• كيكة فانيلا مستطيلة
• عجينة السكر لون ابيض واسود نزلت طريقتها موجوده بملفي
• كريمة زبدة
• كريما عادية باكيتات
• جوز هند ملون

الخطوات

كيكة ملعب كرة القدم

السلام عليكم ورحمة الله وبركاته

كثير بيجي مناسبات وبنحتاج فيها كيكة مميزة وفريدة من نوعها ، بس الكيكات الجاهزة غالية جدا يعني بتتراوح الكيكة المميزة بين 25 —40 دينار ، والله هدر ، وانا دوري اعلمك كيف تصنعي كيكة مميزة تفرحي فيها اولادك وحبايبك .

أولاً/ الكيك

بتعملي كيكة فانيلا عادية بأي طريقة معتمديتها بس يكون شكلها مستطيل واذا بدك الكيكة طبقتين وتطلع عالية اعملي كيكتين نفس القياس وحطيهم فوق بعض ، بس انا اكتفيت بكيكة وحدة لإنه عندي اصناف حلو كثير كان بالمناسبة.

وبتعملي كيكة ثانية وبتحاولي تكون عاليه شوي بتعرفي لاحقا ليش.

ثانياً/ تغليف الكيك

رح نغلف الكيكة بكريما دريم وب عادية او كريمة الزبدة زي مابتحبي وفوق الكريمه بدنا نرسم تفاصيل ملعب كرة القدم بجوز الهند الملون.

قاعدة الملعب بجوز هند اخضر بتلونيه بملون سائل.

والحواف ودائرة الوسط والمرمى باللون الابيض.

وحطيها بالثلاجة لحتى نجهز الكرة.

ثانياً/ كرة القدم نجمة الكيكة

هون اجا دور الكيكة الثانية اللي عملناها بدنا نختار جاط عشكل نصف كروي ونقص الكيكة على قد قياسه طبعا بدك تكوني قايسه الجاط بالنسبة للملعب يكون متناسق معه.

بنقص نصف دائرة وبننحتها لحتى تطلع مزبوطة وبنغلفها بكريمة زبدة وبنحطها بالثلاجة لحد ما نجهز عجينة السكر.

ثالثاً/ عجينة السكر

بنكون مجهزين عجينة سكر لون ابيض واسود واللون الاسود ربع الابيض مابنحتاجه كثير.

بنفرد من العجينة البيضاء وبنغلف فيها الكره ومش كثير مهم تكون ناعمه وملساء لانه فوقها رح ييجي كمان عجينة سكر.

العجينة السودا بنقطع منها اشكال خماسيه بتكوني قاصيتها من كرتون بقياسات محدده حسب حجم الكرة انا قياسات الشكل عندي طول ضلعه 4.5 سم وطبعا كل الاشكال الخماسيه والسداسيه بتكون نفس القياس والاضلاع متساويه كلها.

الاشكال السداسية باللون الابيض والخماسيه بالاسود

وبنقطعهم من العجينة وبنصير نلزقهم جنب بعض زي الصورة رح يلزقوا عالكريما بس بدنا نثبت الاطراف والحواف على بعض باستخدام غراء غذائي هوه خليط سكر بودرة وقطرات ماء بصيروا غراء .

وبس يخلص شكل الكرة معنا بننقلها بحذر على منتصف الملعب وهيك الكيكة بتكون جهزت.

رابعاً/ الكيكة اللي اخدنا منها الكرة

مارح نرميها طبعا فاستغليتها وعملت منعا كيكة ثانية كيكة فواكه جبت علبة فواكه مشكلة معلبة وفرغتها مع سائلها بالفراغ اللي بالوسط وشربت الكيكة صوص فراولة وعلى وجه الفواكه حبة تفاح شرحات.

وهيه اخر صورة بالصور

ملاحظة التوفير/

هذه الكيكة على احد المواقع اللي بتبيع كيك سعرها 35 دينار ، كلفتني مع الكيكتين والعجينة والكريما وكلشي 15 دينار.

عدا انه الكيكة اللي اخذت منها الكرة حولتها لكيكة فواكه عشان ما نهدر اي شيء.