بسكويت الموزاييك بحشوة الشوكولا سلسلة وصفات التوفير 8

المقادير

• 3 كوب طحين
• كوب سكر بودرة
• 250 غم زبدة يعني اصبعين صغار ونص
• كوب نشا
• نصف كوب زيت ذرة
• م.ص فانيلا
• م.ص بيكينج باودر
• م.ك ممتلئة كاكاو خام
• رشة ملح

الخطوات

السلام عليكم ورحمة الله وبركاته

كلنا بنحب هالبسكويته الهشة اللذيذة ذات اللونين البني والابيض وكنت اتسائل كيف هيك عاملينها لونين متناسقين لحد ماعرفت وحبيت اقدملكم طريقتها وان شاء الله تعجبكم.

أولاً/الخليط

بنخلط الزبدة الطرية مع السكر والفانيلا والملح لحتى تمتزج وتصير كريمية .

—بنضيف البيكنج والنشا والزيت وبنكمل خلط .

—بنصير نضيف الطحين بالتدريج ممكن ما ياخد كل الكمية بدنا عجينة طرية وتتشكل كرة باليد .

وكيف بتعرفي انها تمام صارت؟ بتعملي كرة وبتضغطي عليها من الوسط شوي لازم ما تتقطع او تظهر تشققات عليها.

— بتخلي ملعقة طحين عجنب من الكمية الاصلية.

— بس تجهز العجينة بتقسميها قسمين متساويين

بتضيفي لقسم ملعقة الكاكاو وللقسم الثاني ملعقة الطحين اللي شلناها عجنب، عشان يطلعوا نفس القوام.

— بنخلط العجينة منيح بصير عنا عجينة بيضاء وعجينة بني.

ثانياً/ احلى مرحلة تقطيع وتشكيل البسكويت

بنقطع العجينة لقطع متوسطة وبعدين بنبرمها مثل الحبال بنعملها وبنقسمها اجزاء متساوية وصغيرة .

— بنكوّر الاجزاء اللي قطعناها لكرات صغيرة بحجم نصف حبة الزيتون.

بنكور العجينة البيضاء والعجينة البنية.

— التشكيل بكون بإنه نجمع 3 كرات بيضا و3 كرات بني بالتناوب ابيض وبني وبعدين بنجيب قطعة شوكولا خام تكون نوعيتها كويسة وبنحطها بوسط الكراة وبنلم الكرات على بعض وبنعملهم كرة كبيرة بنكوّرها بين راحة ادينا بلطف رح يطلع معك شكل البسكويته الحلو.

—طبعا عادي يطلع معك بعض حبات مش مزبوطة رسمتهم معك معك بتتعودي، انا اول حبة طلعت معي مثل الشبح.

ثالثاً/ شوي البسكويت

لازم وضروري ولابد يكون الفرن هادي مش ساخن كثير ، اذا كان ساخن رح تتشقق الحبات معك .

بتحطي البسكويت بفرن محمي على حرارة 170 لمدة ربع ساعة، بدون تحمير، التحمير بخفي الرسمة المميزة.

رابعاً/التقديم

بعد ماتطلع من الفرن لا تلمسيها بتكون طرية اتركيها تبرد شوي وشيليها وقدميها بطريقتك الخاصة وصحة وهنا.