ذرة محمصة تسالي لزوم الشتوية سلسلة وصفات التوفير 9

المقادير

• كاستين ذرة مجففة
• مقادير الخلطة
• نصف كوب طحين
• نصف كوب طحين ذرة صفراء بتطحني ذرة مجففة صفراء بمطحنة البهارات لحتى ينعم
• ربع كوب نشا
• بودرة ثوم
• ملح
• فلفل
• بابريكا
• زيت للقلي
• نكهة ذرة بودرة

الخطوات

السلام عليكم ورحمة الله وبركاته

دايما بسهرات الشتوية بنصير ندور شوفي شي نتسلى الليل طويل ولا روحة ولا طلعة ، ليش مانجرب نعمل تسالينا بايدنا منه نضيفة ومضمونة ومنه توفير عالجيبة.

(الطريقة الأولى)

أولاً/ الذرة

بنحتاج ذرة تاعة الزراعة بتكون كبيرة ومختلفه شوي عن ذرة البوشار واذا ماتوفرت زي حالتي بتستخدمي ذرة البوشار . بس رح تطلع قاسيه شوي ، اذا قدرتي جيبي بذور الزراعة احسن.

بتنقع بماء يغلي من قبل بليلة يوم كامل ، وثاني يوم بنسلقها بمي بس لمدة ساعة عالاقل لحتى تطرى مش تنهري بس تطرى ونقدر نقضمها بأسنانا بسهولة.

ثانياً/ خلطة التغليف

بنجهز مكونات الخلطة وبنخلطها كويس وبنحطها على الذرة بعد مانصفيها من المي مباشرة عشان تمسك عليها وهي رطبة وبنقلبها فيها وبننخل الخلطة الزايدة عنها.

ثالثاً/ القلي

بنقليها في زيت غزير اول شي حرارته عاليه بعدين عالوسط بتاخد تقريبا ربع ساعة قلي.

بنطلعها على ورق مطبخ وبنرش عليها رشة ملح زيادة ورشة نكهة ذرة بتعزز الطعم.

(الطريقة الثانية) الاسهل والأطرى

أولاً/ انقعي ذرة البوشار حصرا يوم كامل 20—24 ساعة

ثانياً/ بتنشفيها من المي تماما تماماً وبتحمي الزيت عالاخر وبتنزلي فيه الذرة وبتغطيها ضروري تغطيها وعايري 4 دقائق.

رح ينفجر جزء من حبات الذرة بس ما بصير بوشار بصير شي ثاني مش عارفه شو اوصفه من الزكاوة ، عشان هيك بقلك غطي القلايه .

ثالثاً/ التقديم

بعد ما ترفعيه من القلايه على ورق مطبخ مباشرة نشفيه من الزيت ورشي عليه وهو سخن رشة ملح ناعم ورشة بهارات ذرة ، شو بدي احكيلك عن زكاوتها وقرمشتها عنجد انها رائعة ونفسي تجربوها.

رابعاً/ مقارنة بين الطريقتين

الطريقة الاولى صحيح بهاراتها اكثر وطريقتها اطول وخطواتها اكثر بس قاسيه شوي صدقاً.

الطريقة الثانية طريقتها اسهل واسرع واطيب واطرى ، فقدمتلك الطريقتين وبنصحك بالطريقة الثانية.

وهيك تسالينا جاهزة وصحة وهنا.

ملاحظة التوفير/

مابيخفى على حد انه المملحات سعرها مرتفع ، فليش ما نحاول نعمل يلي بنقدر عليه بالبيت وبكلفة اقل ، ما بوعدك تكون نفس الجاهزة بالضبط ، لا في اختلاف بس طعمها لذيذ وبحبوها الصغار احسن من الشيبس والسكاكر.

كيلو ذرة البوشار بدينار

كيلو الذرة المحمصة ب6 دنانير

واحسبي الفرق بنفسك.