جعاجيل أكلة شعبية قديمة زكاوة وعلاج وتوفير سلسلة وصفات التوفير 10
جعاجيل أكلة شعبية قديمة زكاوة وعلاج وتوفير سلسلة وصفات التوفير 10
جعاجيل أكلة شعبية قديمة زكاوة وعلاج وتوفير سلسلة وصفات التوفير 10
المقادير
- عشر بيضات
- 2 كيلو لبن غنم
- عشبة جعدة او لوف نصف كوب
- ملح
- فلفل
- كاري
- كركم
- طحين اسمر يفضل خشن
- بصلة مفرومة
الخطوات
السلام عليكم ورحمة الله وبركاته
الجعاجيل او كعاكيل بغض النظر عن الاسم هالاكلة الشعبية القديمة من قرى شمال الاردن اصلها وكانت زمان تطبخ كعلاج للمغص لانه فيها عشبة الجعدة او اللوف واللي هيه علاج المغص بس طعمها لوحدة غير مستساغ فدخلوها لهالطبخة اللذيذة والبسيطة والاقتصادية.
أولاً/ العجينة
بنخفق عشر بيضات مع رشة ملح وفلفل وبنضيف عليهم طحين اسمر يفضل خشن يكون ولكن اذا مافي غير ناعم عادي ، وبتحتاج الكمية تقريبا 2— 2.5 كوب طحين لتمسك بعضها بس مابدنا تصير قاسية وبنتركها على جنب لبين مانحضر عشبة الجعدة.
ثانياً/ الجعدة
الجعدة عادة بتكون مجففة زي اللي بالصورة فبناخذ كمية منها ولنقل مقدار كاسة شاي ولازم ننقعها بمي سخنة لنتخلص من المرار اللي فيها وتطرى بنفس الوقت.
بنقلي بصلة بزيت زيتون وبنضيف الجعدة بعد عصرها من المي وبنقلبها مع البصلة وبنضيف شوية مي يعني ملعقتين بس عشان تستوي الجعدة وبنغطيها خمس دقايق لعشرة حسب ماتتنشف وبنخليها تبرد شوي قبل اضافتها للعجين.
بنضيفها للعجينة وبنخلط وهيك صارت جاهزة عجينتنا.
ملاحظة/
ممكن الاستغناء عن العشبة واستخدام البقدونس مكانها برضه طيب ونكهته كثير طيبة. وبهاي الحالة ما بنقلبها مع البصل بنحطها نية ومفرومة بالاضافة لبصلة مقلية للعجين.
ثالثاً/ الطبخ
بنحضر اللبن زي لبن المنسف بالضبط بنخفقه وبنغليه وبنزيده مي ونراعي انه رح يثقل بسبب الطحين اللي بالعجينة.
بنوطي الغاز عاللبن وبنبلش ناخد من العجينة بالايد او بملعقة صغيرة بس باليد احسن لانه بطلع شكلها دائري اكثر وبنسقط باللبن وبنوزع على قاع الطنجرة ما ننزل العجين فوق بعضه ، والحبات اللي بيستووا رح يرتفعوا ويطوشوا عوجه اللبن ، وبتضلي تزيدي كرات عجين لاتخافي لانه بيستوي بسرعة وبطوش فالقاع بيفضى للكمية القادمة.
بس تخلص كمية العجين بنخليها تغلي وتتسبك لثلث ساعة تقريبا بتكون جاهزة وضيفي ملح وماجي وعصفر حسب الرغبة. وقدميها ساخنة.
وصحة وهنا.
ملاحظة التوفير/
طبعا معروفه طبخة الجعاجيل انها ام التوفير كله لانها طبخة وبتشبع ومفيدة ووجبة تطلب وتشتهى رغم هيك مافيها لحوم هيه قوامها البيض وعشر بيضات بطلعوا بدينار ، و2 ك لبن بدينارين ، هي تغدينا ب3 دنانير.
