طريقة عمل بسكويت بسكريم اخر دلال سلسلة وصفات التوفير 12

المقادير

• كوب زبدة بحرارة الغرفة الكوب 200 غم
• 3 كوب طحين ابيض
• ثلث كوب نشا( 4 ملاعق)
• ربع كوب زيت ذرة
• كوب سكر بودرة
• 2 م.ك حليب بودرة
• 2 بيض
• م.ص فانيلا
• م.ص بيكينج باودر
• للحشوة:
• شوكولا سائلة اي نوع

الخطوات

السلام عليكم ورحمة الله وبركاته

ولا ازكى ولا اشهى ولا احلى من شغل البيت خاصة اذا كان بشغف من ست البيت وهالبسكويته تحديدا من اكثر البسكويتات المفضلة عندي فحبيت اشارك طريقتها معكم وان شاء الله تجربوها وتعجبكم.

عفكرة انا عامله نصف المقادير.

أولاً/ العجينة

بنخلط الزبدة والسكر ورشة الملح بشكل ممتاز لحتى تصير الزبدة كريمية وبنضيف الزيت والبيض والفانيلا وبنكمل خفق لحتى تختفي البيض تماما و بنضيف الحليب البودرة والنشا وبنخلط واخر شي بنضيف البيكينج باودر و الطحين بالتدريج لحتى تتماسك العجينة ممكن ما تاخد كمية الطحين كلها.

بتصير عنا عجينة جاهزة طرية وعند الضغط عليها ما بتتشقق.

ثالثاً/ التشكيل

بنشكل كرات بحجم حبة الجوز لحتى تخلص كل الكمية وبعدين بنجيب كرة بنفردها باصابعنا ببساطة وبنعصر فيها شوكولا سائلة كمية متوسطة مانكثر فيها وبنسكر العجينة عليها وبلطف شديد بنعملها دائرية بدل كروية وبنخطط عليها علامات زي اللي عالبسكريم باستخدام سكينة او عود خشب .

ملاحظة/

ممكن عملها بنكهة الكاكاو باضافة ملعقتين كاكاو بدل ملعقتين طحين.

رابعاً/ الخبز

بنخبز البسكويت بفرن محمي على 180ْ مش اكثر وممكن 170 عشان تستوي وما تتشقق . لمدة ربع ساعة تقريبا بس تشقر من تحت والاطراف خلص بتكون استوت اذا بدك تعطيها لون عالوجه لازم يكون ذهبي فاتح ما تزودي التحمير لانها بتنشف وبتغير لونها.

خامساً/التقديم

قدمي البسكويتات مع فنجان قهوة او كاسة شاي بأي شكل كانت طعمها رووعة .

ملاحظة/ جودة نوع الشوكولا

الصور نتائج مرتين من البسكريم اللي معها البسكويت البني بنوع شوكولا جيد، واللي معها البسكويت بسكّر بنوع شوكولا غير جيد ، بدي تنتبهوا للفرق بين الشوكولاته لما يكون نوع جيد بكون ناعم وشكله مرتب ولما يكون نوع غير جيد ببين خشن ومش ناعم ولامع.

ملاحظة التوفير/

باكيت البسكريم فيه اكمن حبة يمكن 12 حبة ب 60 قرش

الكمية اللي عاملينها بتعمل 65 حبة تقريبا وتكلفتها لا تذكر بالنسبة للجاهز.