شيبس بطاطس منزلي مضمون وشهي سلسلة وصفات التوفير 14

المقادير

• حبة بطاطا صغيرة مسلوقة ومطحونة
• حبة فلفل حلو احمر مسلوقه ومطحونة
• ملعقة بابريكا
• 3 م.ك زيت ذرة
• 2 كوب طحين
• م.ص سكر
• نصف م.ص خميرة
• م.ص ملح
• نصف كوب ماء وممكن اقل
• للفرد:
• نصف كوب سميد
• نصف كوب طحين
• ملعقتين نكهة جبنة او ذرة او اي نكهه مفضله الك.
• خليط القلي:
• نصف كوب خل
• ملعقة شطة
• ملعقة صغيرة ملح

الخطوات

السلام عليكم ورحمة الله وبركاته

مافي يوم ما بيشتروا فيه اولادنا الشيبس ، ليش مانجرب نعمللهم ياه بالبيت عالاقل بنعرف شو حطينا فيه وكيف تحضر.

أولاً/ تجهيز المواد

بنسلق حبة بطاطا صغيرة وبنطحنها مزبوط .

بنسلق حبة فلفل حلو احمر وبنطحنها مزبوط.

ثانياً/ العجينة

بنحط كل المواد مع بعض مع البطاطا والفلفل وبنعجنها باليد او بالعجان بصير عالجهتين وبنصير نزيد مي بالتدريج لحتى نحصل على عجينة طرية وناعمة بنتركها تختمر.

ملاحظة/

ممكن ما تستخدمي كل المي لانه البطاطا والفلفل مليان سوائل فانتبهي لهاي النقطة.

ثالثاً/ تحضير رقائق الشيبس

بعد تخمير العجينة بنقطعها كراة صغيرة اكبر من حبة الجوز بشوي. وحطيهم بصينية مرشوشة خليط من طحين وسميد وبهارات نكهات مثل الذرة او البيتزا او المكسيكية حسب الموجود عندك.

— رشي السطح يلي رح تفردي عليه بنفس الخلطة طحين وسميد ونكهه وافردي الكرة رقيق جدا رح تنفرد بسهووولة.

— وبعدين بتكون مسخنة قلاية تيفال على نار هادية وبتحطي فيها نقاط زيت وبتدهنيها بس اول مرة بعدين عادي. بتحطي الرغيف اللي فردتيه وبتخليه يتشمع من الجهتين بس تنشيف بتنشفيه وبتشيليه وهكذا لتخلصي كل الكمية.

— بتقصي الارغفة المنشفة مثلثات.

رابعاً/ طريقتين للطهي اما قلي او تحميص

(القلي)

بتجهزي خليط مكون من خل وملح وشطة وبتسخني الزيت على حرارة وسط .

— بتصيري تغمسي المثلث بالخلطة وتنزليه بالزيت لا تكثري بالقلاية عشان ما يلزق ببعضه ويطرى.

ملاحظة مهمة/

لا تتركي القلي وتروحي ، وبملعقة مثقبه بتضلي ترفعي الشيبس من الزيت لثواني وترجعيه عالزيت ، عشان ياخد وقته بالاستواء بدون ما ينحرق.

(التحميص)

للتحميص ما بتعملي خطوة الخل وخلطته بس بترشي زيت عالمثلثات وبتدهنيها باديكي كويس وبتفرديها بصينية فرن وعلى نار هاااادية جدا جدا لمدة ساعة ونص.

—بعد التحميص بنرش ملح ونكهة وتمتعي باجمل وازكى شيبس وقرمشة بطير العقل .

مقارنة / مين الافضل قلي ولا التحميص؟

جربت الطريقتين والصراحة التحميص ازكى بمراااااحل من القلي وقرشتها اكثر ومافيها طعم زيت وما بتاخد مجهود ووقفة عالقلي.

فبنصحك بالتحميص

خامساً/ التقديم

بعد القلي بنرش على الشيبس النكهه المفضلة عندنا وبنقدمه وصحة وهنا.