دللي نفسك بقطعه فخمة من lava cake سلسلة وصفات التوفير 15

المقادير

• نصف كوب طحين
• نصف كوب سكر بودرة
• نصف كوب شوكولا
• 4 ملاعق كبيرة كاكاو
• 2 م.ك زبدة
• 3/4 كوب حليب سائل
• نصف م.ص بيكينج باودر
• هذه الكمية لأربع قطع

الخطوات

السلام عليكم ورحمة الله وبركاته

ولا اجمل من منظر الشوكولا لما تكون سايحة من كيكة وخاصة بهالبرد ، اللافا كيك او المولتن كيك من اطيب وافخم انواع الكيك والاجمل منظر طبعا ، رح اقدملكم ياها اليوم بكل سهولة وان شاء الله تعجبكم.

أولاً/ عجينة الكيك

نذوب الشوكولا مع الزبدة بحمام مائي او بالميكرويف

نخلط جميع المكونات الجافة عدا البيكنج باودر وبنضيف الحليب بالتدريج ونخلط لحتى يتجانس ، بنضيف الشوكولا المذابة وبنخلط واخر شي بنضيف البيكنج باودر وبنخلط.

وهيك خليط الكيك جاهز

ثانياً/ تجهيز القوالب

بنحتاج قوالب صغيرة اللي هيه راميكن اسمها بس اذا مش متوفرة رح نصنع قوالبنا بايدنا زي ماتعودنا الحاجة ام الاختراع.

بنجيب كاسة او صحن بنقلبها وبنحط طبقات قصدير وبنزبط شكلهم على قاعدة الكاسة وبنتحكم بالارتفاع مايكون عالي ولا منخفض يعني ارتفاع 10 سم كويس.

واذا عنا ورق الزبدة بكون الخيار المثالي لتبطين القوالب ، او بتدهني القوالب زيت ورشة كاكاو .

ثالثاً/ الخبز مهم جدا

في فرن محمي على حرارة 230 لمدة 8 دقائق فقط على الرف الوسط.

حرارة مرتفعه ، لانه بدنا الكيكة تستوي من برا بس ومن جوا تضل سائلة.

رابعاً/التقديم

لازم تقدم ساخنة عشان الشوكولا تنزل سايحة ، بس مش من الفرن عالصحن يعني استني دقيتين او ثلاث تهدى الكيكة احسن ما تنقطع معك ويخرب كل الفيلم، بدنا نكون حذرين جدا اثناء قلب القوالب ونقلبهم بلطف ، وبتتزين عادة بالسكر المطحون وحبات فواكه او حبات شوكولا وصحة وهنا.

ملاحظة التوفير والمقارنة صادمة/

سعر ال 4 قطع ميني لافا كيك من المحلات 14 دينار اردني.

تكلفتها بالبيت = 3 دنانير اقل من سعر حبة وحدة.

فعلا المقارنة صاادمة.