البقلاوة التركية سلسلة الوصفات التركية 13

المقادير

• للعجينة:
• ملعقة ك زبدة
• ملعقتين ك خل
• بيضة
• ثلثين كوب حليب
• نصف كوب ماء
• نصف كوب زيت
• حوالي 4 كوب طحين او حسب الطحين
• لفرد العجينة:
• كمية من النشا
• للحشوة:
• اي نوع مكسرات او اي شي بتحبوه
• للقطر:
• 3 كوب سكر
• 3 كوب ماء
• عصرة ليمون

الخطوات

☆بسم الله الرحمن الرحيم☆

اول شي منخلط كل مكونات العجينة منيح عدا الطحين بعدين منضيف الطحين بالتدريج لنوصل لعجينة طرية بتلزق شوي

منرش شوية نشا ومننزل العجينة عليها ومنقطعها لكرات متساوية

هلا ركزو معي اي هههه

منفرد كل كرة من العجين بالنشا

يعني منرش تحتا وفوقا حسب الحاجة ومنفرد بهدوء لنحصل على طبقة عجين شفااااااااافة ها وهيك لنخلص الكمية

صارت عنا طبقات العجين الرائعة جاهزة للاستخدام

طبعا بتستخدموهن حسب الشكل اللي بدكم تعملوه

اما الشكل المعتاد بانو نحط طبقات فوق بعضها والمكسرات او القشطة بالنص وكمان عدد طبقات فوقهم

او بانو تاخدو طبقة عجين وتحطو عليها المكسرات وتلفوها رول وبعدين تقطعوها

الخيار بيرجع الكم

بعد ما تصير البقلاوة جاهزة بالصينية منحط عليها السمنة المدوبة

تقريبا لهالكمية منحتاج حوالي ربع كيلو سمنة سايحة

وبعديييين يا حلوات غطو الصينية وحطوها بالبراد

ممكن كم ساعة وممكن ليلة كاملة حسب مابدكم

اول شي الطبقات هيك رح تتشرب السمنة

تاني شي بحال كنتو بدكم تقطعوها بعد ماطبقتوها بالصينية فهيك رح يكون التقطيع أسهل بكتييير لانو الطبقات رح تكون متماسكة مع بعضها بفضل السمنة المتجمدة بيناتهم وبالتالي مارح تتزحزح معكم ويخرب شكلها

ووقت بدكم شووها بفرن حامي من فوق ومن تحت لتاخد التحمير المطلوب وطالعوها وهية سخنة فورا نزلو عليها القطر وهو عم يغلي

وتركوها لتتشرب القطر وتهدى❤

مرة تانية رح اعتذر منكم انو مافي صور للخطوات لانو صور هالبقلاوة كمان قديمة شوي عندي

بس بتمنى كون شرحتلكم ووضحتلكم الطريقة منيح واللي عندها اي سؤال ماتتردد أبداً

انا جاهزة حبيباتي♡

ماتنسوني من الدعاء يا أحلى أميرات