التفريز 2 سلسلة نصائح ام ديما في الطبخ 8
التفريز 2 سلسلة نصائح ام ديما في الطبخ 8
التفريز ضروري ومفيد النا وخاصه في رمضان لأنه كل شي بيصير غالي وفي اشياء ما بكون موسمها وبنشتهيها واحنا صايمين…
من أكثر الخضار اللي بنستخدمها هي البطاطا… وااااخ لو كانت غاليه شو بدنا نعمل
حتى تفرزي البطاطا وتحفظيها عندك وقت اللزوم،،، افرميها بالشكل اللي بدك اياه مقلوبة أو أصابع قلي أو مفركة مربعات واسلقيها ب مي وشوية خل وبس تحسي انه صارت طريه بتطلعيها وبتبرديها وتحطيها باكياس تفريز وع الفريز وادعي لام ديما ههه
الزهرة… اسلقيها نص سلقه بالمي فقط وتحطيها بالفريز وفي ناس بحطها بدون سلق بس انا ما بحب هي الطريقه لأنه بتغلب بالطبخ وتأخر الزهرة تستوي.
الباذنجان…. تعودنا بسفره برمضان ع المتبل مشان هيك بس يكون باذنجان زيادة وخايفه يخرب عالفاضي… اشويه على الغاز ما تنسي تعملي ثقوب في حبه الباذنجان حتى تأخذ نكهة الشوي وتستوي بسرعه وبس تنظفيها احفظيها بكيس تفريز.
الفاصولياء… فرميها واغسليها وبعدين حطيها بطنجره ع نار هاديه بدون زيت حتى يتغير لونها واتركيها تبرد وضعيها باكياس تفريز في الثلاجه.