شعيبيات بالخطوات المصوّرة
شعيبيات بالخطوات المصوّرة
المقادير
- 5 كاسات ونص طحين
- كاسة لبن رايب
- كاسة زيت قلي
- كاسة حليب سائل
- ملعقة كبيرة بيكنج باودر
الخطوات
بسم الله نبدأ…….
أولاً بنخلط الحليب والرايب والزيت وملعقة البكنغ باودر وبنذوبهن سوا وبعدها ببلش اضيف كمية الطحين بالتدريج واعجن وبس نكمل عجن بتركها ترتاح ساعة كاملة.
بعد ماترتاح العجينة بعملها كرات صغيرة متساوية وبرش تحتها نشا وبتركهن ربع ساعه
على رخامة مطبخك بترشي نشا وبتبلشي ترقي بالكرات وحدة وحدة كل كرة لازم تعمل رغيف متوسط الحجم لا رقيق ولا ثخين
طبعاً كرة العجين برقها بحطها بصينية مناسبة وبرش فوقها نشا وبحط الارغفة فوق بعض وبين كل رغيف والثاني نشا لحتى اكمل كل الكمية
بس اكمل رق الارغفة بمسكهن بايدي الثنتين وبحاول انزل كمية النشا الزايدةمن بين الارغفة وارجعها عالرخامة وابلش ارقهم مع بعض حتى يتكون معي رغيف كبير ورقيق ومتساوي بالمستوى
بعدها بلف الرغيف ع شكل رول وباستخدام السكينة بقطع الرول قطع متساوية
بوخذ القطعة بفرشها بايدي بحيث يكون الشكل اللولبي ع باطن الايد ، بحشي قشطة حلويات وبسكرها مثل القطايف وبحطها بصينية مدهونة بكمية سمنة وفيرة ولازم يكون مكان التسكيرة لتحت لحتى اكمل الكمية
بدهن وجه الشعيبيات بالسمنة وبحطها بفرن محمى درجة حرارة 200 عالرف الوسط وبس يشقرو من تحت بطلع الصينية وبدهن سمنه للشعيبيات مرة ثانية وبحمرهن وبس تطلعيهن من الفرن سقيهن بقطر ثقيل عيار كاستين سكر بكاسة مي وبس يتشرب القطر شيليهن من الصينية ورشيهن بفستق حلبي وصحة وهنا للجميع.
