كبسة حائل
كبسة حائل
المقادير
- لحمة قطع بالعظم وبصير بالدجاج
- ارز بسمتي
- خضار
- فليفلة حلوة وحارة
- باذنجان
- جزر
- بصل
- ثوم
- بهارات كبسة ناعمة وخشنة
- صلصة بندورة
- كزبرة مطحونة
- ورق غار ولومي
- زيت ذرة
- لوز وزبيب للتقديم
- بندورة
الخطوات
كبسة حائل
السلام عليكم ورحمة الله وبركاته
حبيت اجرب انواع جديدة من الطبخ فلفت نظري كبسة حائل لانه اللي بميزها انه الخضار قطع كبيرة وظاهرة عالكبسة وانواع خضار خارجه عن المألوف.
أولاً/ طبخ اللحمة
بنقلب بصلة مفرومة ناعم بزيت لحتى تذبل وبنضيف الثوم مفروم وملعقة بهارات كبسة ناعمة وملعقة بهارات كبسة خشنة وم.ص كزبرة مطحونة وفلفل وورق غار والومي وبنقلب البهارات لحتى تفوح ريحتهم بننزل اللحمة وبنقلبها معهم وبنضيف البندورة المفرومة وملعقتين صلصة بندورة وبنخليها تنزل تحت اللحمة وقرنين فلفل كامل وجزر حبات كاملة وبنضيف مي مغلية تغطي اللحمة وبنتركها تستوي وتاخد وقتها.
ثانياً/ الخضار
بنحتاج خضار بصل صحيح قرون فليفلة كاملة او فليفلة حلوة بس كبيرة مقسومة بالنص وباذنجان مقطع قطع كبيرة و بينحط قرع وكوسا قطع كبيرة بس ماحطيتهم ماكان عندي.
ثالثاً/ طبخ الخضار
بعد استواء اللحمة بنشيلها من المرقة على صينية للشوي وبنزل مكانها الخضار الخشنة عشان تستوي بمية اللحمة و بندهن اللحمة بصلصة بندورة مع زيت وخل وبنحمرها بالفرن وبنحمر معها الخضار بعد ماتستوي.
رابعاً/ الارز
بنشيل الخضار من المرقة وبنزل مكانها الرز بعد مانكون زبطنا ملحها وبهاراتها وزيتها وبنطبخه عادي.
خامساً/ طريقة الخلطة الاضافيه
مع اني ماعملتها لانه البصل صار كثير بالوصفة بس رح اكتبها لانها بالوصفة الاصلية.
بتقلي بصلة كبيرة بزيت وبتضيفيلها بهارات وملح وفلفل وزبيب بتقلبيهم شوي وبينضافوا لوجه الرز وهوه بيتنشف.
سادساً/التقديم
بنقدم الارز وعلى وجهه اللحمة والخضار والمكسرات مع سلطة ولبن وصلصلة الدقوس وصحة وهنا.
