شيبس ليز ملح وخل
شيبس ليز ملح وخل
المقادير
- بطاطا بيضاء الخاصة للقلي
- ماء مثلج معه خل
- زيت للقلي
- ملح
الخطوات
شيبس ليز ملح وخل
السلام عليكم ورحمة الله وبركاته
استكمالا للوصفات المنزلية الموفرة والصحية بقدملكم شيبس ليز المشهور ولكنه طبيعي مئة بالمئة وبدون مضافات غذائية او مواد حافظة .
أولاً/ تجهيز البطاطا
بنحتاج بطاطا حجم متوسط شرط من البطاطا البيضاء مش الصفراء لانه الصفراء للطبخ مش للقلي وما بتنجح ابدا.
—بنقطعها شرائح رقيقة جدا باستخدام اي اداه متوفرة انا استخدمت قشارة البطاطا نفسها.
— بنغسلها من النشا وبننقعها بماء مثلج ونصف كوب خل ابيض لمدة ساعة.
— رح يتغير شكلها وتنشف شوي البطاطا ولونها بفتح.
— بنصفيها من النقع وبنشفها كويس.
ثانياً/ القلي
بعد التنشيف بنقليها بزيت غزير حرارته حامية وبعدين بنزلعا للوسط ودفعات قليلة من البطاطا حتى ما تلزق ببعض وعشان كل حبة تاخد حقها بالقلي.
— حركيها بملعقة مثقبة من تحت لفوق باستمرار خلال القلي بلطف.
— بنرفع الشيبس من القلي على مصفى ما تحطي تحتها ورق مطبخ ابدا لانه بخليها تطرى ، المصفى بنزل الزيت الزيادة.
ثالثاً/التقديم
الشيبس جاهز رشي رشة ملح ناعم وهيك صار عنا شيبس بنكهة الخل والملح كثير طيب وبحبوه الصغار والكبار وصحة وهنا.
ملاحظة/ أقسى النقّاد
بكل أمانة طعمه رائع زي طعم الليز حتى اولادي اللي همه أقسى النقاد فكروه ليز ما اكتشفوا انه شغل بيت الا بعدين.
ملاحظة/ عوامل نجاح الشيبس
1. شرائح رقيقة جدا
2. النقع بالماء المثلج
3. اضافة خل للنقع
4. التنشيف من ماء النقع
5. التحريك عن طريق التغطيس باستمرار اثناء القلي
6. عدم وضع مناديل مطبخ تحت الشيبس.
ملاحظة
الصور لأكثر من مرة عشان هيك كثار شوي وكل مرة بيطلع فيها نفس الطعم الرائع.
