فن رسم ورود ثلاثية الأبعاد بالجيلي
فن رسم ورود ثلاثية الأبعاد بالجيلي
المقادير
- مقادير الجيلي الشفاف:
- 2 كوب سفن اب
- 3 م.ك جيلاتين
- ربع كوب ماء
- 4 ملاعق سكر
- نكهه سائلة شفافة اللون اختياري مثل نكهة الموز او الاناناس شرط شفافة.
- مقادير خليط الحقن:
- كوب ونصف حليب سائل
- نصف كوب حليب مكثف محلى
- علبة قشطة
- 3 م.ك جيلاتين
- ثلث كوب ماء
- م.ص فانيلا
- الوان غذائية
- ادوات الحقن
- سرنجة طبية
- ملعقة صغيرة
- شلمونة
الخطوات
رسم ورود ثلاثية الأبعاد بالجيلي
السلام عليكم ورحمة الله وبركاته
من فترة وانا بشوف جيلي شكله روعة جواته ورود ملونة وشكلها ملفت للنظر فقررت اخوض هالتجربة واشوف النتيجة وكانت مبهرة الصراحة خلينا نشوف الطريقة
أولاً/ الجيلي الشفاف
بدنا نعمل جيلي شفاف اول شي بنحط 3 ملاعق جيلاتين وعليهم ربع كوب مي من الحنفية وبنحركهم وبنتركهم عجنب.
بنحتاج لسفن اب لانه في نكهه وبنضيف نكهة سائلة شفافة اختياري ممكن تعملي بمي كمان عادي بنضيفله السكر وبنذوبه وعالغاز نسخنه مابدنا نغليه .
وبس يسخن بنرفعه عن الغاز وبنذوب الجيلاتين بالميكرويف ل 15 ثانية بس وبنضيفه للسفن وبنحرك ليختفي تماما بنصبه بزبادي تكون شفافة ومافيها زخارف.
—لازم يبرد ويجمد تماما بجو البرد ما بياخد وقت يعني ساعتين بكفي.
ثانياً/ خليط الحقن
لعمل الزهور اللي داخل الجيلي بدنا خليط بيشبه الكاسترد
قبل مانعمل الخليط بنحط 3 ملاعق جيلاتين بثلث كوب مي وبنخلطهم وبنتركهم عجنب .
وخليط الحقن عبارة عن كاسة ونص حليب سائل عليه نصف كاسة حليب مكثف محلى وعلبة قشطة بنخلطهم سوا ليتمازجو. وعالغاز عالهادي يسخنوا بنرفعهم وبنذوب الجيلاتين بالميكرويف وبنضيفه للحليب وبنحركه وبنتركه يبرد بحرارة الغرفة بس مش يبرد عللاخر لانه بيجمد يعني يكون دافي تقريبا.
—هاد الخليط بنعمله بعد ما يكون الجيلي برد وتماسك.
ثالثاً/ تلوين الخليط
بناخد من الخليط بصحون صغيرة او كاسات وبنضيف قطرات لون غذائي حسب زوقنا وبنحطهم بجاط فيه مي سخنة عشان يضل سائل اثنائ الشغل.
رابعاً/ كوني جاهزة تماما
لما تيجي تبلشي بالشغل كوني محضرة كلشي عندك بصينية الادوات كلها انا استخدمت ادوات من عندي لانه ماعندي جهاز الحقن الجاهز فاستعملت
1—سرنجة طبية مع الابرة
2—ملعقة صغيرة
3-شلمونة مقصوص طرفها بشكل مائل شوي وطرفها الثاني مقصوص بميلان اكبر
4— ادوات تزيين عجينة السكر بس مش ضروريات هدول.
لازم تحضري كلشي لانه اذا بلشتي شغل وتذكرتي انك بدك شغله مثلا شلمونة وتقصيها مابتعمليها الا الخليط جامد او ماعندك سرنجة تصيري تدوري، خليكي جاهزة اريحلك.
رابعاً/ طريقة الحقن
— اول شيء بدك تحددي الوسط بالجيلي بغطاء علبة بالوسط بالضبط وبتفرغي جزء من الجيلي مش كثير يعني بعمق 1 سم وعرض 2 سم عشان ندخل منه مادة الحقن.
—بدأت بالوردة البرتقالية اول شي عبيت بالسرنجة لون اصفر وعملت حبوب اللقاح اللي بكونوا بالوسط بتدخلي الابرة لمسافة قريبة ما تتعمقي دخلي الابرة واضغطي واسحبي بنفس الوقت وكرري العملية اعملي مثلا عشرة صغار بالوسط.
—للبتلات استخدمت الشلمونة المقصوصة بعبي بالحفرة اللي فرغناها اللون البرتقالي و بدخلها من جنب الخيوط اللي عملتهم وبس اشد الشلمونة لفوق وتحت تلقائيا رح ينزل اللون مكانها بسحبها بصير مكانها نفس شكلها بس لون.
وهكذا بستمر عالداير من جوا لبرا وكل ماطلعت لبرا بكبر البتله وبخليها اطول.
—للوردة الحمراء
نزلت بالحفرة لون احمر وبطرف ملعقة رفيع بضغط لتحت وبحرك يمين شمال بنزل اللون مكان الملعقة.
— للبتلات استخدمت السرنجة بنزلها على قد طول البتله وبضغط وبلفها بشكل جانبي بنفس الوقت عشان يتشكل معي بتلات ملويه ومنحنيه وبكرر من الداخل للخارج.
—للاوراق الخضراء
بملعقة صغيرة بدخل طرفها وبحقن بالسرنجة داخلها لحتى تتعبى لون وبعمل اكمن ورقة حول الوردة.
خامساً/ التقديم
بتبين معك الوردة من تحت لانك بترسميها بشكل عكسي اذا بتطلعي من تحت الكاسة بتبين معك الورود شكلها عنجد خرافي.
اتركيهم يجمدوا ويبردوا وعند التقديم بتحطي الكاسات بمي سخنه وبتقلبيهم ورح تنسي كل تعبك بس تشوفي هالتحف الفنية، ولما تقسمي منها يالله شو هالمنظر بياخد العقل.
سادساً/ عمل قالب كبير
ممكن تعملي قالب عائلي مش فردي وبتبين الورود كإنها بتسبح فيه .
بتجيبي جاط شفاف وبتحطي القوالب الصغيرة اللي عملتيها بالعكس الوردة لتحت وبتعملي خليط جيلي ثاني من السفن زي الاولاني وبس يبرد تماااااما بتنزليه عالورود بالجاط وبتتركيهم يجمدوا وبتقلبيهم بعد ما تحطي الجاط بمي سخنه وشوفي كيف المنظر شو ما احكي ما بيونصف .
سابعاً/ متعبة بس مستاهلة
يمكن تشوفيها صعبة بدها شغل كثير ووقت وتركيز صح ما رح انكر بس النتيجة بتنسيكي كل تعبك خاصة بس تشوفي الدهشة مرسومة على وجه كل اللي بشوفوا قوالب هالجيلي وبفكروها كرات زجاجية مش شيء بيتاكل.
جربيها ومارح تندمي.
ملااااااحظة/
سامحوني الصور كثااار بس عشان توضح الصورة وأقدر اوصل الطريقة.
