حلا الورد الشهي
حلا الورد الشهي
المقادير
- 2 كوب طحين
- 1 م.ك سكر
- 1م.ك خميرة
- 1 م.ك نشا
- 1 م.ك سمنة ممتلئة
- رشة ملح
- م.ص فانيلا
- صفار بيضة
- بياض بيضة
- خل للصق
- ماء حسب الحاجة تقريبا كوب
- نشا للفرد
- زيت للقلي
- قطر ثقيل
الخطوات
السلام عليكم ورحمة الله وبركاته
حلا الورود جدا زاكي ومقرمش ومنظره روعة يعني ضيافة مفتخره وطعم شهي.
أولاً/ العجينة
بنخلط كل المواد الجافة مع بعض وبنبسهم مع معلقة السمنة وبنضيف المي بالتدريج لانه حسب نوع الطحين بتحتاجي مي بس لنقل كاسة مي انا اخدت مني كاسة الا شوي، بنعجنها مزبوط لحتى نحصل على عجينة متماسكة وملساء بنتركها ترتاح عشر دقايق.
ثانياً/ التشكيل
بنرول العجينة على نشا وبنقسمها 3 اقسام وبنفرد كل قسم فرد واسع يعني رققيها منيح وبنحتاج قطاعات ورود احجام متعددة.
بنقطع نفس العدد من كل الاحجام يعني مثلا عشرين كبار عشرين وسط عشرين صغار عشرين صغار جدا.
—نصيحة
قطعيهم كلهم بعدين بلشي شكليهم.
بنحتاج بياض البيضة اللي اخدنا صفارها بنخلطها مع شوية خل وبنستعملها لاصق.
بندهن وسط اكبر حجم من الورود وبنلصق عليها الحجم الاصغر فالأصغر فالأصغر لحتى تخلص كل الاحجام ، طبعا منظرها وهي نيه حلو كيف بعد القلي!
—ممكن تخلي اكمن وردة هيك بدون طبقات او اشكال ثانية فراشات مثلا او اشكال ورود مختلفة.
ثالثاً/ القلي
بندفي الزيت عالغاز ما بنسخنه وبنزل فيه الورود بحذر لا تكثري بالقلاية عشان تاخد راحتها ولانها رح تنفش من الخميرة.
بعد ما ننزلهم بالزيت بنخلي النار عالوسط ما بنعليها ابدا لحتى يتحمروا منظرهم خرافي عنجد، بنطلعهم على مصفى وعالقطر مباشرة.
— عفكرة بضلوا مقرمشين ما بيطروا ابدا ابدا.
رابعاً/ التقديم
قدميهم على ذوقك الشخصي بتحبي ترشيهم مكسرات بصير بس همه لوحدهم مزينين حالهم مش بحاجة زينة.
