الخبز التركي الخاص لرمضان فقط وصفة ولا أروع سلسلة وصفاتي لرمضان 3

المقادير

• كوب حليب دافئ
• نصف كوب ماء دافئ
• ملعقة كبيرة خميرة
• ملعقة كبيرة سكر
• ملعقتين كبيرتين زيت
• ملعقة صغيرة ملح
• حوالي 3ونص او 4 كوب طحين حسب ما نحتاج المهم نوصل لعجينة طرييية يعني بتلزق نتوفة ههههه
• للوجه منحتاج خليطين الأول:
• ملعقة كبيرة طحين
• ربع كوب ماء
• الخليط الثاني:
• صفار بيضة
• ملعقة زيت كبيرة
• ملعقة لبن

الخطوات

☆بسم الله الرحمن الرحيم☆

اييييه من وين نبلش يانوارة

تعو معي لقلكم على هالمطبخ وانشرو الطحين في كل الانحاء وعيشو الجو هههههه

أول شي منحط الحليب والمي الدافيين مع السكر والخميرة ومنخلطهم ليدوبو ببعض وبعدا منضيف الزيت وكوب من الطحين منخلطهم ومنغطيهم شي ربع ساعة وبعدين منرجع نضيف الملح وباقي الطحين بالتدريج لنوصل للقوام المطلوب منعجنها أقل شي عشر دقايق ومنرجع نغطيها ونتركها ترتاح حوالي ربع ساعة او نص ساعة بكفيها..

هلأ بقى حان وقت الاستمتاع

بتمسكو رشة طحين وبتزتوها لفوق وبتنطو شوي ههههه

عفوا قصدي بتزتوها محل مارح تفردو العجينة

هالكمية ممكن تعملوها لقسمين او حسب مابتحبو انا عملت وحدة كبيرة ووحدة صغيرة وعادة هية بتكون كبيرة مشان يبين شكلها

بتفردوها بشكل دائري وخلوها سميكة شوي متل مو واضح بالصورة

هلا منغط اصابعنا بخليط الطحين والمي ومنبلش نغرزهم عالداير على بعد شوي من الأطراف

ومنرجع نغطهم بنفس الخليط كل ماغرزناهم كم مرة

منعمل خطوط مستقيمة بعدين خطوط مايلة

ومنرجع منغز العجينة بالشوكة بكل الاماكن اللي غرزنا فيها أصابعنا وبعدين منخلط صفار البيضة مع الزيت واللبن ومندهن القرص فيه ومنرش عليه سمسم وحبة البركة ومندخلها الفرن المحمى مسبقاً على درجة حرارة 200 لتتحمر ومابتاخد وقت كتير

يارب تكون عجبتكم وتعملوها لأهل بيتكم وخاصة برمضان كنوع من الأجواء التركية هههههه وتدعولي بالبركة

وعلى قولة ام اوس الله يسعدها جربوها شو بتستنو ههههههههههه

خلص سكتت يلا باي♡