طريقه عمل البقلاوه من الألف إلى الياء طريقة 1 وهيه الطريقة اللي اعتمدتها

المقادير

• كيلو طحين او 6 كوب
• كوب زيت ذرة
• كوب لبن رايب
• كوب حليب سائل
• رشة ملح
• نشا للفرد
• سمنة للشوي
• قطر ثقيل للتحلية
• فستق حلبي

الخطوات

السلام عليكم ورحمة الله وبركاته

مين مابحب البقلااوة ، ولما تضوي الفكرة براسك خلاص لازم تعمليها  خلينا نشوف الطريقة

أولاً/ العجينة

بنخلط الطحين والزيت واللبن والحليب ورشة الملح وبنعجنها منيح بدها عشر دقائق عجن .

— بنقطعها ل24 قطعة صغيرة وبنكورها وبنريحها ساعة.

ثانياً/ الفرد

—بناخد كل كرة بنضغطها بايدنا شوي وبنرشها نشا وبنعمل الباقي كلهم هيك وبنرتب كل 12 فوق بعض وأهم أهم أهم شيء انه ترشي نشا بين كل قطعة والثانية.

— صار عنا مجموعتين كل مجموعة فيها 12 عجينة

بناخد اول محموعة وبنفردها بايدنا شوي لحتى تصير قد رغيف الخبز الوسط وبعدين بنفرد بالشوبك من الوسط باتجاه الاطراف بس لا تضغطي عليها بتلزق، هيه مجرد ما مشيتي عليها الشوبك بتفرد لحالها مثل معجونة الاطفال وبس تفرد شوي معك وقبل ما تكملي فرد افصلي من اطراف الرقاقات ورشي نشا.

— ارجعي افردي بس ما تبالغي بالفرد هيه طالما انتي بتفردي بتضل توسع توسع توسع ما بتوقف بس رح تلاقيها تقطعت من النص عشان هيك بس توصل يعني قد حجم سدر اكل وسط وقفي فرد او بتتفقدي الرقاقات بس تصير شفافة خلص وقفي.

ثالثاً/ تشكيل البقلاوة التاج

فردنا 12 رقاقة بنتخلص من الاطراف وبنخليها مربع بدل دائرة بقطاعة البيتزا اسهل شي وبنقطعها مربعات حاولي تكون متساوية.

— بناخد كل مربع وبنضفه من النشا الزيادة بلطف وبنجمع زواياه على بعض زي ما تمسكي رشة ملح مش عارفه اذا واضح قصدي.

—وبتضغطي شوي عليها وبترتبيهم في صينية مدهونة سمنة مذابة، وبندهنهم سمنه مذابة وسخنة وبنحاول نصب سمنة على أعلى المربع من فوق عشان تنزل جواته وتخليهم يورّقوا. بس لا تكثري سمنة تغرقيها لاء بالمعقول لانه الدنيا شتوية واذا زادت السمنة بتجمد وبتصير لا منظر ولا محضر.

رابعاً/ تشكيل اساور الست

— هلا رح نستخدم المجموعة الثانية بنفردهم بنفس الخطوات.

— بناخد رقاقة وحدة بندهنها سمنة وبنجيب عصاية زي العصا اللي بتكون لعلاقة الملابس بالضبط، انا استخدمت وحدة منهم مغسولة ونظيفة.

— بنلف الرقاثة على العصا وما بنوصلها للاخر بنخلي شوي من العجينة .

— بنضغط على الرول من الاطراف للداخل عالعصاية وبنطلع العصاية وبنلف العجين عشكل اسوارة وقطعة العجين اللي ما لفيناها رح تكون بمثابة قاعدة للاساور عشان تحطي مكسرات فيها.

— بنصفهم بصينية مدهونة وبنصب سمنة سخنة بنفس الطريقة.

خامساً/ الخبز

بنشوي البقلاوة واساور الست بفرن محمي على 160 يعني فرن هادي عشان تاخد وقتها بالتوريق والقرمشة لمدة

25— 30 دقيقة وبس تتحمر من تحت بنرفعها بالفرن لفوق وبنحمرها.

سادساً/ التحلية بالقطر

بتتحلى البقلاوة بس تطلع من الفرن فورا والقطر يكون سخن كمان عشان تشربه الطبقات لجوا.

—اذا كان بارد رح تتحلى من برا بس.

ملاحظة/ القطر

القطر لازم يكون ثقيل وعياره 2 كوب سكر عليهم كوب ماء وعصير نص ليمونة وبتمسحي أطراف الاناء من حبيبات السكر وبس يغلي بتخفضي النار وبنخليه ربع ساعة يغلي.

سابعاً/ التقديم

بعد التحلية بالقطر بنجيب فستق حلبي مطحون وبنعبي بالفتحات للبقلاوة التاج وبالفراغ اللي بوسط اساور الست

وصحة وهنا.