كبسة بالكستناء مميزة بطعم رائع وجديد سلسلة وصفاتي لرمضان 7
كبسة بالكستناء مميزة بطعم رائع وجديد سلسلة وصفاتي لرمضان 7
كبسة بالكستناء مميزة بطعم رائع وجديد سلسلة وصفاتي لرمضان 7
المقادير
- كستناء مشوية واذا كانت الحبات كبيرة ممكن نقطعها نصين
- نصف كيلو أرز بسمتي
- هلأ بالنسبة للجاج إما قطع شيش منحطها مع الرز ورح تشوفو تحت كيف أو جاج رح نشويه بالفرن ونحطو فوق الرز
- لخلطة الرز منحتاج:
- بهارات:
- ملح
- فلفل أسود
- بابريكا
- بهارات كبسة
- شوية كركم
- فلفل أسود حب
- كم حبة قرنفل صحيحة
- مكعبين ماجي او مرق جاج
- للصلصة:
- بصلة وسط
- سنين توم
- بندوراية صغنوتة
- حبة فليفلة خضرة صغيرة
- برش جزر ناعم اختياري
- فطر اختياري
- مقادير خلطة التتبيلة للجاج:
- بهارات الجاج:
- نفس البهارات الناعمة الموجودة بصلصة الرز
- بهارات صحيحة وهية عبارة عن:
- أعواد من القرفة
- حبوب هيل
- قرنفل
- فلفل أسود
- زنجبيل
- ورق غار
- صلصة الجاج:
- نصف كوب لبن
- ثلث كوب زيت
- ملعقة ونصف كبيرة دبس بندورة
- ملعقتين كبار خل
الخطوات
☆بسم الله الرحمن الرحيم☆
ركزو معي وماتندوخو لتدوقو ألذ كبسة ههههه
هلأ اول شي عنا خيارين
إما رح نحط قطع شيش بقلب الرز أو جاج فوق الرز
اذا شيش فما رح نحتاج الو تتبيلة خاصة
اما لو جاج فرح نخلط مكونات تتبيلة الجاج اللي مكتوبة آخر شي بالمقادير ونتبل الجاج فيها والأفضل ينتقع فيها كم ساعة أو ليلة كاملة ومنحطو بصينية مع شوية مي ومنغلفو بقصدير ومندخلو الفرن او منحطو بكيس حراري وبس يستوي منشيل القصدير او الكيس ومندهنو بسمنة او زيت ومنحمرو تحت الشواية..
تاني شي الرز رح نحمس بزيت وسمنة فلفل اسود صحيح وحبات قرنفل وبعدهم البهارات الناعمة والبندورة والبصل والفليفلة اللي انضربو عالخلاط ونحمسهم ليدبلو
هلا بقى لما تدبل الخضار اذا رح نستخدم شيش فمنضيفو بهالمرحلة ووقت يقرب يستوي منضيف برش جزر وشرائح فطر اذا حبيتنا واذا ماحبينا بلاها بس بيني وبينكم الطعم خرافي ههههه وبعدهم منضيف الكستنا المشوية
واذا مارح نستخدم شيش ورح نعمل الجاج بالفرن الغوه وكملو باقي المكونات بترتيبها اللي حاطتو
هلأ بقى منقلب الكستنا مع الصلصة وبعدها منضيف الماء والملح ليغلي مننزل الرز المغسول والمصفى منيح ومنحرك كل شي مع بعضو ومنخليه أول شي على نار عالية حوالي 8 دقايق بعدين منوطي النار ومنتركو ليستوي ويتهدى على مهلو..
في بعض جماعة بعرفهم مابيسمحولو يتهدى أصلا لأنو بضلو يفتحو ويدوقو بحجة يشوفوه استوى ولا لأ ههههههه
وهيك منكون خلصنا أطيب كبسة وياهومالاااااالي هههههه
بالله عليكم اللي بتجربها تعزمني اي تعزمنيييييي
ماتنسو تدعولي بالبركة وتجربوها وبحبكم أنا♡
ملاحظة
الصورة الأخيرة أنا حاطة شرحات كريسبي عالكبسة والطعم رهيييييييب
جربوها من باب التجديد واللي بتحب تعمل نفس طريقتي تدخل على ملفي وتشوف طريقة الكريسبي
ويلا انا رايحة وجعتلكم راسكم بما فيه الكفاية ههههه
