شوكولا سنيكرز والطعم حكايه
شوكولا سنيكرز والطعم حكايه
المقادير
- للطبقة الاولى:
- 2 باكيت بسكويت دايجستيف كل واحد 450 غم
- علبة حليب مكثف محلى
- م.ك قشطة احتياط
- للطبقة الثانية:
- 2 كوب سكر
- 2 علبة قشطة
- 2 م.ك زبدة
- نصف كيلو فول سوداني
- للطبقة الثالثة:
- شوكولا بديل نوتيلا نزلتها قبل يومين عزاكي
- نصف كاسة سمنة مذابه
الخطوات
سنيكرز
السلام عليكم ورحمة الله وبركاته
ياسلام على قطعة سنيكرز مع فنجان قهوة عند العصرية مع الحبايب ، عشان كلنا بنحب السنيكرز جبتلكم طريقته وان شاء الله تعجبكم.
أولاً/ القاعدة
عبارة عن كوبين بسكويت دايجستف مطحون عليه علبة حليب مكثف محلى بنعجنه مع بعض كويس. واذا ضل مفرول ضيفي ملعقة القشطة الاحتياط .
ثانياً/الكراميل
وهوه عبارة عن كاستين سكر بنحطهم بقلاية على نار هادئة لحتى يذوب السكر تماما ولونه ذهبي بنضيف علبتين قشطة وبس تندمج القشطة مع الكراميل بنضيف الزبدة وبنحرك بحذر وبسرعة لحتى يصير المزيج كراميل. بنخليه يغلي عالغاز عنار هادية جدا شوي لحتى تصير لون الفقاعات مش بني على افتح شوي.
بكون جهز بنضيف عليه كمية الفول السوداني اللي بنكون محمصينه بقلاية ناشفه عنار هادية وبنخلطه كويس.
ثالثاً/ الشوكولا
اعملي صوص شوكولاته بديل نوتيلا وسبق ونزلت طريقته على زاكي. بس بعد ما تكمليه ويجهز ضيفي نص كاسة سمنة مذابة باردة عليه واخلطيه عالخلاط عشان يعطيكي تماسك احسن للشوكولا.
رابعاً/ تجميع المكونات
بدنا نكون حاطين ورق زبدة او نايلون تغليف داخل الجاط المستطيل ومخلين اطرافه مبينه عشان نرفع السنيكرز منها.
بنحط طبقة البسكويت وبنرصها كويس وفوقها الكراميل بالفول السوداني وبدك تفرديه بسرعة فوق البسكويت لانه بيجمد بسرعة واخر شي طبقة الشوكولا.
— بنتركها بالثلاجة ساعتين قبل التقديم.
خامساً/التقديم
بعد ماتبرد بتطلعيها باستخدام اطراف النايلون من الجاط وبتقسميها مستطيلات ، طعمها خيالي وشكلها روعة وصحة وهنا.
ملاحظة/
المكونات اللي بالوصفة عملت كمية كبيرة من السنيكرز ومبينه الكمية بالصور فإذا عيلتك صغيرة اعملي نصف المقادير.
سادساً/ الحفظ
تحفظ بالثلاجة لمدة اسبوع لانها فيها مواد سريعة الفساد مثل الحليب والقشطة.
