طريقة عمل كريمة الزبدة جديدة ومتماسكة
طريقة عمل كريمة الزبدة جديدة ومتماسكة
المقادير
- 340 غم زبدة
- ربع كوب طحين
- 3 م.ك نشا
- 2 م.ص فانيلا
- نصف م.ص ملح
- كوب ونصف سكر
- كوب ونصف حليب سائل
الخطوات
كريمة الزبدة جديدة ومتماسكة
السلام عليكم ورحمة الله وبركاته
كريمة الزبدة معروفة في كافة انحاء العالم ولكن طريقتها المعروفة ممكن تعطي طعم زبدة غير محبب الا اذا اضيف نكهات عليها وأغلب الناس بيشيلوها عن الكيك لما يتناولوه، فاليوم حبيت اقدم وصفة لكريمة الزبدة طعمها شيء مختلف مافي طعم زبدة وطريقتها جديدة والحلو فيها ما بتحتاجي سكر مطحون وتماسكها رااااائع.
أولاً/ الخلطة السرّية
بتخلطي المكونات الجافة سوا وبنضيفلهم الحليب وبنخلطهم بشكل ممتاز وبنصفيهم من اي تكتلات ، وبعدين عالنار الهادية مع التحريك المستمر لحتى يغلي ويشتد بنطفي الغاز وبنتركها تبرد تمااااااااماً.
ملاحظة/
لو فيها شوية دفا بتخربلك الكريما كلها .
ثانياً/ الزبدة
بنبدا بخفق الزبدة ووبدها تكون بحرارة الغرفة يعني طرية فقط مش ذايبة نهائيا ، بنخفقها عمضرب الكهربا لحتى تبيض شوي وبنصير نضيف الخلطة السرية ملعقة ملعقة لحتى تخلص الكمية وبنخليها تخفق مع بعض 3 دقائق لا تطولي بالخفق لانه المضرب بيسخن وبيذوبلك الزبدة وبتخرب.
ثالثاً/ الاستخدام
تستخدم للحشو والتغليف وعمل اشكال متعددة رائعة وممتازة جدا وطعمها مافي زبدة ابدا .
— ممكن اضافة الالوان والنكهات باخر مرحلة.
رابعاً/ الحفظ
هالنوع من الكريمة لازم يستخدم طاااازج ينفس اليوم لإنه بيتغير قوامه ثاني يوم بيجمد ولما تيجي تحركيه بحبحب .
عشان هيك اعمليها واشتغلي فيها دغري وصحة وهنا.
