انواع بيتزا متعددة
انواع بيتزا متعددة
المقادير
- مقادير عجينة تكفي 3 بيتزا وسط:
- 6 كوب طحين
- كوب زيت ذرة
- كوب حليب بودرة
- 2 م.ص بيكينج باودر
- 2م.ك خميرة
- 2 م.ك سكر
- ماء دافئ 3 كوب
- حشوات مختلفة
- جبنة موزريلا
- صوص البيتزا ل 3 بيتزا:
- 5 بندورة حمراء طرية
- 3 سن ثوم مهروس
- م.ص بصل بودرة
- م.ص ثوم بودرة
- 2 م.ك خل
- ربع كوب زيت زيتون
- ملح وفلفل
- اوريجانو (زعتر برى)
الخطوات
بيتزا
السلام عليكم ورحمة الله وبركاته
الكل بحب البيتزا ، اللي بحبها بخضار واللي مع دجاج واللي سادة ، حبيت اقدم كل انواع البيتزا تقريبا الشائعه في مجتمعنا العربي وان شاء الله اوفيها حقها .
اولاً/ العجينة
هالعجينة معتمدة عندي لكل انواع البيتزا واغلب المعجنات لانها قطنية ورائعه .
—بننخل الطحين وبنضيف عليه الحليب والبيكينج باودر والملح والخميرة والسكر وبنضيف عليهم الزيت وبنخلط لحتى يتوزع الزيت على كل الطحين.
—بنضيف المي الدافيه بالتدريج وبنعجن لحتى نحصل على عجينة ملساء وطرية .
—بنتركها تختمر .
—بنقطعها اقسام وبنفرد في كل صينية قطعه وبنبدأ باضافة الصوص.
ملاحظة/
كل صينية بيتزا وسط بدها عيار كاستين طحين.
ملاحظة/ الاطراف المنتفخة
اذا حابة تعملي اطراف البيتزا منفوخة بتلفي طرفها للداخل وبتغطي عليها منيح وممكن تحشيها طبعا جبنة موزريلا قبل اللف والتقفيل.
ثانياً/ صوص البيتزا
بنبرش بندورة حمراء وطرية 5 حبات تكفي وبعد البرش بنقلبها في زيت زيتون وثوم طازج وثوم بودرة وبصل بودرة واوريغانو ( انا ماضفته ماكان عندي بس بعطيها نكهه مميزة) وملح وفلفل وخل ابيض وبنتركها تتسبك وتسمك لازم تصير تقريبا معجون طري.وبنفردها على العجين.
ثالثاً/ حشوة البيتزا
لكل انواع البيتزا بنفرد عالعجينة اول شي الصوص.
طبعا اسم نوع البيتزا حسب حشوتها ورح اعرض بعض انواعها
1. بيتزا الخضار
لكم الخيار في انواع الخضار كل عائلة حسب الذوق الخاص فيها.
بنضيف البصل والزيتون وفليفلة الوان
بنضيف الجبنة الموتزريلا واذا كان نوع شيدر بتطلع اطيب.
2. بيتزا الدجاج
بنقطع الدجاج مكعبات صغيرة وبنقليهم عالغاز مع زيت وملح وفلفل وبنقلبه لحتى يستوي ويتحمر.
بنوزعها فوق الصوص وفوقها الموزريلا.
3. بيتزا اللحمة
استعملت لحمة مفرومة خشنة مقليه مع بصل اصلا كانت موجوده عندي زيادة من قبل بيوم واستغليتها بتنفرد عالصوص وفوقها الجبنة.
وممكن تستخدمي اللحمة المفرومة عالسكين فرم اصغر من راس العصفور.
4. بيتزا الدجاج او اللحمة بالخضار
وهون بندمج بين الخضار واللحمة او الدجاج بنفس الطريقة وفوقهم الجبنة.
5. مارغريتا
وهيه اللي ما فيها حشوة بس صوص وعليه جبنة .
6. بيتزا الفصول الأربعه
وهيه اللي بتجمع بين الاربع انواع بنفس القرص بتقسم افتراضيا اربع اقسام وبنحط على كل ربع حشوة شكل وبنوزع الجبنة عالكل.
7. ميني بيتزا
وهيه بيتزا بأي حشوة بس حجمها صغير بتكون وعادةً تستخدم في المناسبات والعزائم.
رابعاً/ الخبز
في فرن محمي مسبقا على حرارة 220 مئوية لمدة عشر دقائق الى ربع ساعة بتكون استوت بتحمريها وبتكون جاهزة.
خامساً/التقديم
قدميها ساخنة واستمتعي بأزكى طعم ومطة الجبنة اللي بتعطي زكاوة زيادة للبيتزا وصحة وهنا.
