طريقة دجاج تندوري مع ارز بالهيل والقرفة
طريقة دجاج تندوري مع ارز بالهيل والقرفة
المقادير
- تتبيلة الدجاج
- دجاجة مقسومة نصفين
- ربع كوب لبن
- ملعقتين ماء
- ملعقتين زيت زيتون
- ملعقة ونصف بهارات تندوري
- ملعقة بابريكا يفضل مدخنة
- م.ص صلصة حارة
- م.ص من كل من ثوم وبصل بودرة
- ملح وفلفل
- عصير نصف ليمونة
- بصل شرائح وورق غار للشوي
- بهارات الارز
- نصف م.ص قرفة
- م.ص هيل مطحون
- رشة كركم
- ملح وفلفل
الخطوات
السلام عليكم ورحمة الله وبركاته
الدجاج التندوري من الذ انواع الدجاج وبيتميز بلونه القاني ونكهته الحارة ، وحبيت اقدم معه ارز بالهيل والقرفة على بساطته الا انه من الذ نكهات الارز خلينا نشوف الطريقة.
أولاً/تتبيل الدجاج
بنحتاج دجاجة كامله انا قطعتها نصفين بنتبلها بخلطة من لبن وزيت وبهارات تندوري وبابريكا وصلصة شطة وبصل وثوم بودرة وماء وليمون بنتبل الدجاج فيهم كويس مع تشريح الدجاج عشان التتبيلة تدخل للداخل.
ملاحظة/
—ممكن تتبيل الدجاج من قبل بيوم او لعدة ساعات
—ممكن الاستغناء عن الحار اذا ما بتحبوه.
ثانياً/ شوي الدجاج
بنحضر صينية وبنفرشها شرائح بصل وورق غار وبنحط الدجاج عليهم وبنرش رشة بابريكا زيادة بتعطي لون حلو همه بضيفوا لون غذائي احمر للدجاج بطلع اللون خرافي.
— وبندخلها عالفرن على نار حاميه 200 بدون تغطية بالرف الوسط اول ساعة ، وبعد مرور ساعة بتطلعيها بتغطيها بقصدير وبترجعيها عالفرن ساعة ثانيه بس على حرارة منخفضة.
— مابتحتاج تحمير لانها بتكون تحمرت خلال الساعة الاولى وهيه مكشوفه.
ثالثاً/ الارز بالهيل
بنحط بطنجرة زيت وبنقلب فيه ملعقة صغيرة هيل مطحون خشن ونصف ملعقة صغيرة قرفة ورشة فلفل ورشة كركم ومكعبات ماجي وبس تفوح ريحتهم بنضيف مي وبعد الغليان بنضيف الارز المنقوع وبنطبخه كالعادة.
ملاحظة/
على قد ماهو بسيط ومافي توابل بس طعمه عنجد مختلف عن انواع الارز المتعودين عليها طعم لطيف وريحة بتشهي.
رابعاً/التقديم
بعد استواء الدجاج بندهنه من الصوص اللي نزل منه عشان اللمعه وبنقدمه فوق الارز والبصل اللي تحت الدجاج بكون تكرمل وصار روعة بنوزعه فوق الارز طعمه عنجد روعة.
وصحة وهنا.
