طريقة عمل اللانشون صدر الدجاج المدخن

المقادير

• 3 سن ثوم طازج
• صدر دجاج مقطع شرائح
• 8 بيض
• ربع كوب خل
• 8 ملاعق كبيرة طحين
• نصف كوب زيت ذرة
• م.ص بصل بودرة
• م.ص ثوم بودرة
• نصف م.ص هيل مطحون
• نصف م.ص ملح
• 3 مكعبات مرق الدجاج
• نصف م.ص فلفل اسود او ابيض
• فحم للتدخين

الخطوات

لانشون صدر الدجاج المدخن

السلام عليكم ورحمة الله وبركاته

بناءً على طلب الأخوات سوزان ونور بقدم اليوم طريقة اللانشون البيتي ، وطبعا كل اولادنا بحبوه وسمعنا كثير عن اضراره والشك بمصدره ، واللانشون اللي عملته عبارة عن وجبة بروتينية مغذيه بامتياز ، خااصة للأطفال اللي مابحبوا البيض لانها فيها مصدرين من مصادر البروتين ، البيض والدجاج خلينا نشوف الطريقة

أولاً/ الخلطة

بنخلط البيض والبهارات والملح والخل والثوم بالكبّة لحتى يصير لونها فاتح على بياض .

—بنضيف عليها الدجاج المقطع ومكعبات مرقة الدجاج وبنتابع الطحن لحتى يختفي الدجاج تماما.

—بنضيف الطحين وبنتابع الطحن لحتى يختفي.

—اخر شي الزيت وبنطحن شوي رح يصير قوام الخلطة قريب من خليط الكيك. هون اذا بتحبي تضيفي نقطة صبغة حمرا عشان اللون. انا حبيت لونها زي ماهيه بدون لون خاصة انها صدر دجاج فطبيعي لونها يكون أبيض.

ثانياً/ السلق

بنفرغ الخلطة بكيس بلاستيك او كيس حراري وبنربط بابه بمطاط وبنربط بقوة وبإحكام.

—ممكن نفرغه بعلبة لانشون فارغة بدل الكيس او بأي شيء ممكن يتحمل المي المغلي، بس القوالب زي هيك بدها تكون مية السلق واصلة ثلثين القالب وبنغطي الطنجرة كل مدة السلق.

—بنكون حاطين مي بطنجرة عالغاز لحتى تغلي وبننزل كيس اللانشون فيها وهون لازم كل شوي نقلب الكيس عشان ياخد تسوية من كل الجهات.

—بدها تسلق لمدة نصف ساعة وبس تستوي بتكون معبيه الكيس مزبوط نافخه والكيس مشدود عليها وملمسها قاسي مش طري زي اول.

—بنطلعها من المي وبنشيل عنها الكيس وبنحطها على شبك عشان التدخين.

ثالثاً/ التدخين والتحمير

بنجهز كمية منيحة من الفحم المشتعل وبنحطها بصينية فيها قصدير وفوق الصينية بنحط الشبك اللي عليه اللانشون وبنصب ملعقة زيت عالفحم وبنغطي فورا بقصدير وبنلفه عالصينية مع الشبك وبنتركه ربع ساعة.

—بعد الربع ساعة رح تلاقي اللانشون تحمر تحميرة حلوة بسبب الفحم وريحته دماااار من التدخين.

—هون اما بتكتفي بتحمير جهه وحدة او بترجعي تحطي فحم وتطبقي نفس اللي عملتيه بس بتقلبي اللانشون عالجهه الثانية وإذا بدك رأيي مافي داعي.

رابعاً/التقديم

لازم تغلفيها وتتركيها بالثلاجة يوم كامل قبل تقطيعها .

وبتقطعيها عادي وبتقدميها ساندويتشات او عالسفرة وممكن تقلي الشرائح بطلع طعم مختلف كليا واحلى أحلى شي مكعبات عالبيتزا طعم خرافي.

ملاحظة مهمة/ طعم وحفظ اللانشون

بالنسبة لطعمها هيه بعيدة عن طعم اللانشون العادي ولكن طعمها طيب جدا جدا اقرب طعم الها الشيش طاووق يعني لو غميتي عيون حد وطعميتيه منها رح يقلك شيش .

— وتحفظ بالثلاجة لمدة اسبوع. او بالفريزر شهر وصحة وهنا

(ملاحظة بالنسبة لريحة البيض)

كمية البيض كبيرة صح بس بأكدلكم انه مافيها طعم ولا ريحة البيض نهااائيا وحتى ذاقته

(ام محمد) وما حكيتلها انه في بيض وماصدقت حتى انه فيها بيض لا ريحة ولا طعم نهائيا، وانا بطلب شهادة ام محمد ههههه سلفتي الغالية.

—رح اجرب لانشون البقري وانزله ان شاء الله قريبا.