كيكة البرتقال بالتوفي
كيكة البرتقال بالتوفي
المقادير
- 6 بيض مفصول
- كوب ونصف سكر مقسوم لقسمين
- 2.25 كوب طحين ابيض
- كوب زيت ذرة
- م.ك فانيلا
- م.ك خل
- م.ك بيكينج باودر
- كوب عصير برتقال عليه 3م.ك حليب بودرة
- برش برتقالة
- للتوفي:
- علبة حليب مكثف محلى
- للزينة:
- مكسرات
الخطوات
السلام عليكم ورحمة الله وبركاته
ياسلام لما تندمج وتمتزج نكهة البرتقال الشهية مع نكهة صوص التوفي بصير عندك تفجير للنكهات وقوام بيذوب بالفم لازم تجربوا عشان تعرفوا اشهى كيكة برتقال بالصوص خلينا نشوف الطريقة
أولاً/ بياض البيض
بنفصل البياض عن الصفار وبنضربه بالخلاط مع رشة ملح وم.ص خل وبس تظهر الرغاوي بنضيف نصف كمية السكر على 3 دفعات لحتى ينفش ويصير ميرنج متماسك بنتركه على جنب.
ثانياً/ الصفار
بنخفق الصفار مع نصف كمية السكر الثانية وبرش برتقالة وكاسة زيت وملعقتين فانيلا لحتى يفتح لونه بنضيفه على البياض وبنقلب من تحت لفوق شوي شوي لحتى تمتزج كل المكونات .
—بنضيف الطحين المنخول 3 مرات مع ملعقتين صغار بيكينج باودر وبنضيفه للخليط على شكل رشات بالمنخل وبنقلب من تحت لفوق شوي شوي بالتناوب مع كوب عصير برتقال مذاب فيه 3 م.ك حليب بودرة حتى تجهز خلطة الكيك.
ملاااحظة
بتقدري تعملي اي كيكة فانيلا عطريقتك وتضيفيلها برش برتقال وكاسة السائل تكون عصير برتقال.
ثالثاً/ الخبز
بنخبز الكيك في فرن محمي على 170 لمدة ساعة بالرف الوسط وبتختبريها بعود خشب على 45 دقيقة اذا ما استوت بتكمليها عالساعة. الكيكة المغلقة من الوسط بتاخد ساعة بالفرن عالاغلب مش زي المفتوحة بالوسط بتاخد وقت اقل.
رابعاً/ صوص التوفي
انا بعمله من الحليب المكثف المحلى اسهل
—بنغمر علبة الحليب المكثف بالماء وبنحطه عالغاز لحتى يغلي بنوطي الغاز على اقل حرارة وبنتركه ساعتين.
—بعد الساعتين طفي الغاز واتركي العلبة بالماء لحتى تبرد.
—وهيك بتكون جاهزة بس تفتحيها بتلاقيها تحولت لصوص توفي رووووووعة بالمذاق والقوام واللون .
خامساً/التقديم
بتزيني الكيكة بعد ماتبرد بالتوفي ورشة مكسرات ومش قادره اوصف الطعم ولا القوام مع قرقشة المكسرات سحر حقيقي، وقدميها لاحبابك وصحة وهنا.
ملاحظة/
بنصحك تشربي الكيكة بالصوص على دفعتين يعني غطيها اول مرة واتركيها تمسك وبتردي تغطيها كمان مرة عشان تحصلي على تغطيه جيده ومنظر رائع.
