طريقه كبه باللبن سهله
طريقه كبه باللبن سهله
المقادير
- ١ كوب ارز مطحون ناعم جدا
- نصف كيلو لحمه مفرومه ناعم جدا
- بصله مطحونه ( ع مطحنه البهارات )
- ١ م ك هيل مطحون ناعم
- ملح وفلفل اسود حسب الرغبه
- الحشوة:
- ٣ بصل مقطع مربعات متوسطه نوعا ما
- ربع كيلو لحمه مفرومه ناعم او اكتر شوي حسب ما تحبو حشوة الكبه
- فلفل اسود
- ملح
- هيل حسب الرغبه
- ربع كوب زيت زيتون مخلوط مع زيت نباتي
- ربع كوب لوز محمص ومفروم خشن
- اللبن:
- كيلو لبن رايب
- ١ م ك طحين _واحد ونصف م ك طحين
- بكيت ماجي بودرة
- ١ م ك هيل مطحون ناعم
- ٢_٣ كوب ماء
- التزين:
- ربع كوب بقدونس
- ربع كوب لوز محمص
الخطوات
الارز انا طحنتو بالماكينه ..ولكن في ارز مطحون بالمولات .. الي تحبوه اعملو ( ولكن اطحني الارز بطريقه متقطعه لانو قاسي كتير على الماكينه وممكن تنحرق …فبشكل متقطع )
البصله رح نزل صورتها حتى تشوفو كيف مطحونه
نضع الارز المطحون مع اللحم مع البصله وجميع البهارات المذكورة للعجينه ونعجنها جيدا جدا باليد …ثم نضعها في الماكينه حتى تتعجن جيدا وتصير ناعمه
نعصج اللحمه ( نحوسها) مع البصل والبهارات حتى. تنضج ..ثم نضع اللوز المفروم خشن
نجهز صحن فيو كوب ماء فقط ..حتى نبلل ايدينا كويس ( لانو الارز رح يشرب كل المي بالبصله واللحمه ) عشان هيك لازم ناخد قطعه من العجينه ونبللل ايدينا كتير منيح ونعجنها بايدنا ثم نحشيها متل ما نحب ونكبكبها وهيك لتخلص الكميه
نضع اللبن مع الطحين بالمولينكس ونضرب جيدا حتى اللبن ما يفرط ونضعو ع الغاز مع التحريك المستمر ….وعند الغليان نضع كوب ماء مع بكيت الماجي
ننتظر ان يغلي مرة اخرى ثم نضع الكبه بحذر …كل مرة نضع حبه بعيدة عن التانيه وممنووووع تحريك الكبه الا بعد ربع ساعه وع الهادي جدا …….بدها تقريبا نصف ساعه للاستواء على نار هادية ( حتى ما ينشعط اللبن) …..ضعي ملعقه الهيل المطحون اخر شي
عند الاستواء رح يثقل اللبن كتتيييرررر زيدي كوب الماء المتبقي … وتحكمي بثقل اللبن متل ما تحبي
تقدم بجانب الارز الابيض ….وتزيين باللوز والبقدونس
ملاحظاتي :::: هاي الكبه تعلمتها من تيتا وهي كبه متوارثه من طولكرم واغلب اهل طولكرم بيعرفوها …لهيك يمنع العبث بمكوناتها والتغيير فيها ابدا ههههههه بمزح …..لا ما بمزح ئي بقلكم متوارثه …راعو قلبي الرهيف
مميزات هالكبه انها الحمدلله ما بتفرط او تفتح باللبن لانها من الارز والارز كل ما تعرض لسوائل بيشتد
كل ما بدك تزيدي رز للعجينه تاكدي انها رح تشد اكتر وتصير قاسيه مع الاكل ..لهيك حاولي توازني ما بين كميه الارز واللحمه ….وكل ما كان فيها لحمه كانت اطرا
الطعم الاساسي بهالوصفه يمكن لاحظتو انو ( الهيل المطحون) هو يلي بيعطيها الطعم الاصلي لكبة الارز
اتمنى تعجبكم وعليكم بالعافيه والصحه
