كيكة جمعت عيد ميلاد ولد وبنت
كيكة جمعت عيد ميلاد ولد وبنت
المقادير
- مقدار كيكة فانيلا وكيكة شوكولاته
- كريمة بودرة
- لكل كوب كريما بودرة بحط كوب حليب سائل وبخفقها
- ملونات غذائية
- دونات للزينة
- دربس
- فوم للزينة
- مقادير صوص الكرامل:
- نص كوب سكر
- ملعقة كبيرة زبدة
- علبة قشطة
الخطوات
اول شي انا اشتقتلكم كتييييييير كتييييييير
بعرف اني غبت كتير عنكم
تاني شي نبلش بالكيكة هههههههه
عملت كيكتين وحدة فانيلا ووحدة شوكولا وكل كيكة قسمتها نصين
هلا جبت القسم الاول من الشوكولا ودهنته كريما بعدين جبت القسم الاول من الفانيلا ودهنته بصوص الكرامل
بالنسبة لصوص الكرامل : كرملت نص كوب سكر عالغاز ولما تكرمل ضفت الزبدة والقشطة وحركتهم منيح خمس دقايق عالغاز وبعدين رفعتهم عن الغاز وخليتهم بحرارة الغرفة وبعدين دهنت الكيكة فيها
بعدين نرجع للكيكة جبت القسم التاني من الشوكولا وكمان دهنته كريما واخر شي جبت القسم التاني من الفانيلا وحطيته عليهم كلهم وهلا الكيكة كلها قسمتها نصين متل ما موضح بالصور
هلا قسم البنت دهنتها بكريما زهرية وزينتها بالدونات والدربس والفوم
نيجي لقسم الولد دهنتها بكريمة بيضا بعدين جبت ورقة ع شكل خماسي طبعا انا طبعتها عالكمبيوتر وهاي الورقة حطيتها ع جوانب الكيكة وصرت احدد عليها بالسكينة بعدين بكيس الحلواني وقمع النجمة ( صورتلكم القمع ) صرت اعبي الصورة بالكريما متل ما موضح بالصورة
هدا بسموه الرسم بالتنقيط الخماسي باللون الاسود والفراغ اللي ضل برضو بالقمع النجمة باللون الابيض
واخر شي حطيت كرات شوكولاته ولاعب ( اهم شي اللاعب هههههههه ) طبعا اللاعب غير قابل للاكل….. وبس
انشالله ما اكون طولت عليكم وانشالله فهمتو علي
وانا حاولت اصورلكم الخطوات بالضبط.
ملاحظة : انا صورتلكم السباتولا اللي بستخدمها لفرد الكريما عالكيكة لحتى تطلع معي هيك مضبوطة.
