كيد الرجال بقلم هلا غرابلي الحلقة الثانية والأخيرة
كيد الرجال بقلم هلا غرابلي الحلقة الثانية والأخيرة
#الجزء التامن
سوزان :امانة بس خمس دقايق ولله ما بأخرك
ديما: ….
سوزان : يلا ولو
مسكتني من ايدي و سحبتني ،فتح الباب مهند ،و فتنا ،تفتلنا بالبيت كلو
ديما :حلو الله يهنيكن
مهند:اهم شي يعجبك الك حبيبتي سوزان
سوزان :عجبني كتير
لف ايدو على خصرا و سحبو لعندو و هو عم يطلع فيا كان عم يحاول يقنعني انو بحبا ،تابع حكيو
مهند:حبيبي شو بتحبي نعدل بالبيت …
ديما:انا لازم روح رح اتأخر على الجامعة
نزلت ركض على الدرج انا و عم احبس دمعتي ،رحت على الجامعة بس ما فتت حضرت ابدا ،كل تفكيري بمهند و افعالو ،مهند يلي عم يديق الخناق علي و حتى و انا اعدة ببيتي ما رح يخليني قاعدة مرتاحة و بعيدة عنو ،رح يبقى محاصرني ،رجعت على البيت بعد ساعتين ،طلعت على الدرج و سمعت صوتو عم يحكي مع رجال و عم يقلو انو يدهن حيطان الصالون لون بيج فاتح ،فكرت كتير ارجع انزل حتى ما يشوفني ،بس رجعت تابعت طلوع ،وقفت على باب بيتنا و بس شافني صار يعلي صوتو
مهند:خطيبتي بدا اللون البيج يكون الغالب بالبيت كلو و انت بتعرف انا ما فيني قلا لا ،عروس و من حقا تدلل و خلص بسرعة لانو انا مستعجل و العرس ما مطول
فتحت الباب و فتت و بدون ما اطلع عليه ابدا و تابعت على غرفتي ،غيرت تيابي و اقعد ابكي ،كان البكاء عندي روتين يومي و خاصة وقت شوف سوزان و مهند مع بعض ،بعد اسبوع نزلت نهار الخميس على الجامعة كالعادة بوقتي دوامي المعتاد ،كنت واقفة ناطرة الباص ،وقت شفت مهند و سوزان مع بعض واقفين كمان
سوزان:صباح الخير
ديما :صباح النور
سوزان :رايحة على الجامعة ؟
ديما:اي طبعا هيدا وقتي المعتاد
سوزان :و نحن كمان رايحين على الجامعة مهند بدو يعرفني على رفقاتو
ديما :تضربي انت و مهند الله ياخدك و ياخدو الهي تروحو دعس تحت هالشاحنة وين ما بروح بتطلعو بوجهي و انا عم اهرب منكن (هيك كان نفسي قلا بس بلعتا)
ديما:اي كتير كويس بتتسلي
اجا الباص و طلعت قبلن ،لحقوني و اختارو المقعد يلي قدامي و قعدو فيه ،قعدو جنب بعض و مسكلا مهند ايدا لسوزان و باسا و صارو يحكو بصوت واطي و يضحك مهند بصوت عالي ، و انا كنت دايرة وجهي على الشباك ،وقف الباص بالموقف التاني و طلعو شباب فيه و اجا شاب قعد جنبي
مجهول:عفوا يا انسة اديش الساعة معك؟
ديما:الساعة تسعة
التفت مهند و اطلع بالشاب و رجع دار وجهو لقدام و تغيرت ملامحو
مجهول:حضرتك رايحة على الجامعة ؟
ديما :ايه ،حضرتك طالب الا موظف بالجامعة ؟
مجهول:لا انا معيد بكلية التجارة و الاقتصاد
ديما:اي ولله بكليتي يعني بس انا ولا مرة شفتك
مجهول:انا اليوم تعينت و جاي من غير محافظة
التفت مهند على الشاب
مهند:يعني سالتا عن الساعة و قلنا طيب ماشي ،شو بدك اذا رايحة على الجامعة الا لا ،يعني شفتا بنت قاعدة لحالا و قلت يلا منطق حنك معا
مجهول:عفوا مين حضرتك ليش حتى تحكي معي بهالطريقة
مهند:انا بكون ابن عما و بفضل انك تقعد بهداك المقعد او تقعد انت و ساكت
التفت علي
مهند : و انت حسابك مع اخوكي سالم
اطلعت فيه و انا متفاجئة منو كيف انبحت على الشاب،قام الشاب قعد بالمقعد يلي على صفي و انا حطيت ايدي على تمي و ضحكت و سوزان بقيت ساكتة و ما علقت على الموقف ابدا ،نزلنا من الباص و نزل الشاب ورانا ،انا تابعت طريقي على كليتي و مشي الشاب على صفي ، و مهند و سوزان تابعو طريقن باتجاه تاني .فتت على القاعة و بعد شوي دخل الشاب نفسو يلي شفتو بالباص و عرف عن اسمو جود و انو هو يلي بدو يتابع اعطاء المادة عن الدكتور السابق يلي كان يعطينا من قبل ،بعد ما خلص اعطاء المادة ،رحت لعندو
ديما:مرحبا
جود:اهلين مو انت يلي شفتك بالباص و علق معي ابن عمك
ديما :اي انا نفسا،انا بدي اعتذر كتير عنو و هو ما بكون ابن عمي هو بكون خطيب بنت عمي و ابن حماه لاخي
جود:ايواا ولا يهمك انا بعتذر اذا سببتلك ازعاج و احراج
ديما :ولا يهمك
كانت واقفة رفيقتي مايا جنبي ،بعد ما مشي جود
مايا:لك العمى بقلبك من وين بتعرفيه كمان لهيدا ،لسا اليوم اول يوم الشاب بيعطينا
ديما: لك شفتو بالباص و قعد جنبي بالباص. و…
مايا:اي باص ،شو رقم الباص يلي عم تطلعي فيه و عم تلقطي هالشباب الحلوة ،طب قلك تاني مرة انطريني بطلع انا و اياكي سوا
ديما :ههههههه وليه حسد الا ديقة عين
مايا:الاتنين ،اخ بس لو عندي شوي من جمالك بس لكنت خربت الدنيا
ديما:تاخدي جمالي و مصيبتي مع بعض شو رايك ؟
مايا :لا جمالك بس
ديما :اي خلص معناتا اسكتي و احمدي ربك
#كيد_االرجال_بقلم_هلاغرابلي
#الجزء التاسع:
مايا :احكيلي طلع مهند و سوزان معك ؟
ديما :ايه
مايا :جايبة خصوصي حتى يجاكرك
ديما :ايه
مايا:بتستاهلي
ديما:عنجد عم تحكي من كل قلبك انت بتعرفي اديش انا عم اتعذب كل ما بشوفن مع بعض
مايا :الحق عليكي كنت احكيلو شو مشكلتك و هو بقرر
ديما :لا مستحيل انا ناهية اموري من زمان ،قلي الدكتور ما تفكري تتزوجي ابدا و بتصير حالات كتير طلاق من هالموضوع
مايا:دكتور غبي ،جربي غيرو ،رح روح انا و اياكي و بدون ما اهلك يعرفو شو رايك ؟
ديما:مايا ولله ما بقدر اتحمل فوت بهيك تجربة تانية بتعب و بكتئب اكتر
مايا :بس هالمرة ولله ،و بعدين ما بقا تحاولي او تجربي ابدا ،اصلا شكلنا رح نعنس انا و اياكي وللله لنكيف هههههه
ديما :هههههههه انت بدك تعنسي ،لا مستحيل
مايا:ايه ايه هديك المرة كنت قاعدة بالباص و كان عم يطلع فيني شاب ،قلت و اخيرا لقيتو لفارس احلامي ،كتير حلو و مرتب ،قام اشرلي بايدو قمت اشرتلو فورا ،قام اجا باتجاهي ، قمت قعدت و زبطت حالي و اخدت وضعية البنت الخجولة ، قلت اكيد جاي يقلي انا معجب و ممكن نتعرف قام طلع عم يأشر للبنت يلي وراي بتكون رفيقتو هههههه
ديما :ههههههه كيف طلع منظرك بهالخجلة ؟
مايا:انا وقتا تمنيت كون كرسي بالباص او عليقة لك تمنيت يقلب الباص فينا 3قلبات هههههه
ديما:بقلك مية مرة الشاب بحب البنت التقيلة
مايا :صح بس ما متلك لانو من تقلك طار مهند و اذا بضلي هيك رح يطير التاني
ديما :اخ ما تذكريني لاقصة تقل ولا شي ،خلص منروح سوا عند دكتورة لانو بخجل روح عند دكتور و انت اساليلي من تحت لتحت عن دكتورة شاطرة بهالاختصاص
مايا:اتفقنا ماي ليدي هههههه
ديما:ههههه قولتك عم يقلا ماي ليدي
مايا:لا مستحيل
بعد اسبوع دقتلي مايا و رحنا عند الدكتورة سوا و خبرتا انو معي سلس بولي ليلي بشكل غير مقبول و هالموضوع عاملي اكتئاب ،و قدمتلا كل نتائج التحليل يلي بتأكد انو ما عندي اي خلل عضوي ،قلتلي انو الموضوع نفسي عندي لهيك حولتني عند الدكتورة النفسية فرح و رحنا فورا لعندا
الدكتورة فرح:طيب هلأ ما عندك مشكلة عضوية ابدا و الموضوع نفسي ،شو صار معك و ايمت بلش معك هالمرض ؟
ديما :بلش معي من اول الاحداث بالبلد يعني فيكي تقولي نتيجة خوف و صار بمنطقتي ضرب رصاص كتير و من وقتا صرت فيق و شوف تختي مبلول و بداية ما خبرت حدا حتى امي ،لانو خجلت كتير و لحد الان ما حدا بيعرف غير اهلي و رفيقتي بس ، هالمرض مأثر على حياتي كتير و حاسستو عم يدمرني شوي شوي
الدكتورة فرح:ما تاكلي هم انا رح اكتبلك دوا مضاد للاكتئاب و بيحبس البول لفترة طويلة و انشالله بيتجاوب جسمك معو و بتتحسني كتير و حتى نفسيا رح تفرقي كتير من اسبوعين لشهر
ديما :طيب دكتورة بحال وقفتو ممكن ارجع لوضعي القديم ؟
الدكتورة فرح :…ممكن بس خليكي مستمرة عليه هلأ لمدة 6شهور حاليا و بالاضافة للعلاج السلوكي و الرياضة ،الرياضة الها دور كبير بتحسن حالتك ، و خاصة التمارين يلي بتقوي عضلات البطن لهيك سجلي نادي رياضة او فيكي تلعبي الرياضة بالبيت و كمان الرياضة بتحسن من النفسية كتير و خاصة الركض او المشي السريع و شغلة اخيرة انت بنت حساسة كتير و كبوتية و هالشي حسيتو من طريقة حكيك و حركة جسمك و توترك و خجلك مني و دائما مننصح انو ما حدا يكبت غضبو و خوفو او اي مشاعر حتى لو كانت مشاعر حب لانو كلو بيرجع على الجسم بامراض بدنية و نفسية لهيك الواحد لازم يفرغ هالمشاعر و الطاقات السلبية بطرق تانية و بنفس الوقت ما تكون تأذي غيرنا ،يعني مثلا منطلع نتمشى او منمارس هواية منحبا او منكتب مثلا اومنحكي مع شخص منحبو و منرتاح معو عن الشي يلي مدايقنا ،يعني يا ديما قدامك عدة وسائل و اختاري يلي بريحك لانو المهم نروح عن نفسنا و اعتبري هالمشاعر السلبية و الهموم متل الجبال يلي حاملينا على ضهرنا ،معقول وين ما نروح بدنا ناخدن معنا بالاخير نحن بشر و بدنا نتعب لهيك شيلين من عن ضهرك و عيشي حياتك و ما تخلي هيك مرض بسيط كتير يوقف بطريقك و يمنعك من اي شي اوك ،بدي شوفك بعد اسبوعين و تخبريني بانك تحسنتي انشالله
ديما :دكتورة سؤال اخير انا ..فيني اتزوج؟
الدكتورة فرح :ههههههه طبعا فيكي ،تتزوجي و تجيبي اولاد كمان بس طبعا صارحي الشخص يلي بدو يتقدملك بهالشي و ما تخبي عنو و انشالله مع هيدا الدوا رح يكون وضعك متل اي بنت و ربك هو الشافي بالاخير
طلعنا من عند الدكتورة و كانت مايا مبسوطة اكتر مني
ديما:مشي اقعدي عندي بس ما تخبري امي بعرف لسانك طويل ،ما بدي اياها تتامل على الفاضي بجوز ما اتحسن على هالدوا
مايا:بتعرفي شو ؟ انت نكدة كتير فورا حكمتي على الدوا ، لك لسا ما اشتريناه و اطمني رح حاول امسك لساني بس ولله يا ديما اذا بتتزوجي و ما بتاخديني سلفتك لاعمل فيكي العمايل
ديما : هههه تضربي هيدا كل همك انا هيك سالتا للدكتورة يعني بس مو كرمال بدي اتزوج لانو خلص مهند رح يتزوج سوزان و قاعدة بوجهك
مايا:قاعدين بوجه بعض
#الجزء العاشر:
ديما:بكرا منتخرج و منتوظف و منشتري سيارة و ما ضروري نتزوج
مايا:احلام وردية مشي مشي
رجعنا انا و مايا على البيت و نحن طالعين و عم نضحك ،كان مهند واقف عم يفتح باب بيتو ،وقت شافنا صار يماطل بفتح الباب و وقت شافتو مايا
مايا : الشاب مرتب كتير و معيد كمان شو بدك احسن من هيك
انا سكتت و ما عرفت مايا عن شو عم تحكي بس جاوبتا
ديما: اي منحكي بالموضوع هلأ
فتنا على البيت
مايا:هههههههه
ديما:شو حكيتي وليه
مايا:عم جاكرو لهل الغبي ،اكيد فهم علي ،ترك كل البيوت و اجا قعد قبالك طب شو رايك دقلا لسوزان و قلا انو خطيبك بحب بنت عمك و اخدك ليجاكرك بس
ديما :يييي اوعى تفكري تعملي هيك يا مجنونة ولله بتخربي الدنيا
بلشت اخد الدوا و حسيت بتحسن خفيف بعد اسبوعين و رجعت شوف مهند كل يوم خميس على موقف الباص و مرة طلع قعد وراي و دقلا لسوزان
مهند :يسعدلي صباحك يا عروستي ….لحمدلله مشتقلك كتير …لك دخيلو انا ….بعدك نايمة …ايه فيقي يا قمر انا نازل على الجامعة عندي كام شغلة بخلصن و بمر عليكي رح اخدك مشوار اليوم غير شكل اوك حبيبي بحبك باي
سكر الخط و صار يدق باصابيعو على ضهر الكرسي و يغني
بدي ياكي انتي بدي تكوني مرتي
انتي هلأ صرتي حبيبة قلبي
رح جيب المحابس يا عروس العرايس
وقلّن بالمجالس حبيبة قلبي
مهند:ممكن اذا بتريدي تفتحي الشباك من عندك
ديما:ما خرج برد كتير غير محلك اخي و روح اقعد جنب الشباك التاني و ريحنا من طربك عند هالصبح
رجع يدق باصابيعو على ضهر الكرسي و يغني ،بالخميس التاني وقت شفتو لمهند ،طلع على الباص قبلي و انا وهمتو اني بدي اطلع وراه بس ما طلعت و رجعت وقفت على الموقف ،كنت واقفة عم اطلع عليه هو و عم يدور علي بس وقت شافني واقفة برا و عم اضحك عليه ، اطلع فيني و زورني و مشي الباص و انا اخدت الباص يلي بعدو و بالخميس التاني ما شفتو ابدا بس وقت رجعت على البيت ،شفتو قاعد عنا بالصالون هو و سوزان ،فتت سلمت و تابعت على غرفتي ،لحقتني امي
ديما:شو عم يعملو هدول الجوز عنا ؟
ام سالم:كانو عم يشوفو بيتن و مرو يشربو فنجان قهوة عنا يعني هاي شغل بنت عمك سوزان عم تجاكرنا فيه يعني انا هيك حاسة عليها اجت اخدت بيت قبالنا
ديما :اممم لا ما بظن بس صدفة الشغلة
ام سالم:اطلعي قعدي ما حلوة ،انا عم اقلي بادنجان بالمطبخ
ديما :طيب بس لغير تيابي
طلعت امي و انا غيرت تيابي ،كنت متأكدة انو مهند هو يلي اقترح على سوزان ليفوت عنا و يشرب قهوة ، طلعت و قعدت معن
ديما:ايييه شو صار معكن وين وصلتو بالبيت ؟
سوزان:بقي ال…
مهند:رح يخلص شغلة شهرين و منتزوج بس
ديما: الله يتمملكن على خير
سوزان:تسلمي يا رب عقبالك ،ايمت عرسو لسالم ؟
ديما :ما مطول ،اخرة الشهر هيدا ،عم يعفش هلأ
مهند: اوووف رح يتزوجو قبلنا مع انو عم احرق حالي ليخلص البيت و نتزوج بسرعة
سوزان:عم دقلي امي رح فوت على غرفتك ديما رد
فاتت سوزان على غرفتي ترد على اما و انا تابعت حديثي مع مهند
ديما:عم قول ريحة الشعيط طالعة من وين ههههه طلعت يا مهند عم تحترق
مهند: انا بحرق و ما بنحرق بس كرمال سوزان ما بس بحرق حالي و بحرق يلي حولي
ديما : ما واصلني شي من هالنار ،نارك باردة
مهند:كذابة
ديما:ما تعبت
مهند : لسا ما بلشت
ديما:هاي عم نتفرج
مهند: رح تموتي بقهرك
ديما:بتموت لحالك
…ايهه لنقوم نعملكن قهوة مع السلامة
قمت على المطبخ و عملت القهوة و ضيفتن و طلعت امي قعدت معنا و شربو القهوة و راحو ،بعد شهر تحدد عرس اخي سالم و شذى و حجزت عند الكوفيرة لاعمل شعري و مكياجي و سوزان دحشت حالا معي و قلتلي بعمل حالي محل ما بدك تعملي ،بعد ما خلصنا رن موبايلا لسوزان
سوزان:الو …اي حبيبي ….ايه خلصنا ….اي ناطرينك …الله معك …ديما رح نروح مع مهند
ديما: لا روحي انت معو و انا بجي اخي سالم بياخدني
سوزان:سالم بدو يجيب شذى عالصالة اكيد ما رح يفضى يجيبك و مهند استأجر سيارة ،بترجعي معنا
نزلنا و شفنا مهند واقف ناطرنا ،كان مزين السيارة بالورد باسم سوزان
مهند:شو رايك؟
سوزان:ياااااا بجنن شو هالمفاجأة الحلوة
ديما :مطولين نحن بالشارع هيك ،الناس عم تطلع فينا
#الجزء الحادي عشر:
فتحت باب السيارة و قعدت و بقيت سوزان و مهند واقفين عم يتفرجو على زينة السيارة و بعدين ركض مهند و فتحلا باب السيارة و قلها تفضلي يا روحي ،قعدت سوزان من قدام و طلع و مشي فينا ،حط على اغنية بحبك انا كتير و مسك ايدا لسوزان و صار يبوسا و يقلا طالعة بتجنني و يطلع كل شوي فيني بالمراية ،كنت رايحة على عرس اخي و معكر مزاجي لانو ما كنت حاطة بالحسبان يعمل فيني مهند هيك و يسملي بدني ،وصلنا على العرس و نزلت فورا و بقيت سوزان شوي و بعدين لحقتني واخرة العرس فاتو اخواتا لشذى مهند و عمر ،و بلش مهند يرقص مع سوزان ،حتى رقصة السلو ما وفرا ،كنت قاعدة انا و رفيقتي مايا عم نتفرج علين
مايا :يا ربي صبرني علين ما اتقل دمن ، نفسي قوم اضربو بوكس بنص وجهو …ديما …احكي كلمة
ديما :انا فايتة على الحمام
مايا :لحظة جاي معك
قمت ابكي بالحمام
مايا:معقولة انت هلأ هيك خلاكي تبكي بعرس اخوكي ،العمى بقلبو فورلي دمي ،خلص طنشيه
ديما(تبكي ) : ولله كيف بدي طنشو ، وين ما بروح بطلع بوجهي هو و اياها صرت بكرهن كتير كنت جاي على عرس اخي و خايفة منن يعملو هيك قدامي و ما اقدر اتحمل اعصابي
مايا:اذا بعرس اخوكي هيك عملتي ،بعرسن شو بتعملي
ديما (تبكي): مستحيل اقدر احضرو مستحيل
مايا :خلص ولو المهم انت ،االمهم انت عم تتحسني و صدقيني الله اخترلك الخير و بكرا بتنسيه و بتحبي غيرو و هو منيحة عليه سوزان و زيادة عليه اصلا …يلا مسحي دموعك حبيتي و خلينا نطلع قبل ما يجي حدا و يشوفك
طلعنا من الحمام و رجعنا قعدنا لنكفي فرجة على المهزلة يلي عملوها مهند و سوزان و كأنو العرس صار عرسن ، خلص العرس و طلعنا من الصالة
مايا :انا رح اخد تكسي و ارجع على البيت
ديما:لااا بترجعي معي الساعة 1 ،امي رح تطلع مع سالم ،الساعة و نحن منرجع مع عمي ..
نحن و عم نحكي اشرلتنا سوزان بايدا بانو نجي لعندا
ديما:تعي شكلنا رح نرجع مع مهند ههههه الله يصبرنا
رحنا لعندا
سوزان:اطلعو معنا في وسع بالسيارة و في عمر كمان بدو يطلع معنا ليكو اجا
مايا:لا خلص برجع لحالي
عمر :يلا بسرعة اطلعو رح تمشي سيارة العرسان …مهند خدنا لفة ها
طلعت سوزان من قدام و طلعت انا و مايا و قعد جنبا عمر و مشي مهند
عمر:انت رفيقتا لديما بنفس الكلية
مايا:ايه و انت ؟
عمر:انا بدرس هندسة زراعية جيرانكن يعني اخر سنة الي و اخيرا
مايا : اممم و انا سنة التخرج كمان
اطلعت فيني مايا و ابتسمت و انا فهمت عليا فورا
عمر:حطلنا اغاني مهند و علي الصوت و خدنا لفة على البحر ما ضروري نبقى ورا سيارة العرسان
مهند:حاضر باش مهندس عمر شو رايك تجي تسوق عني
عمر:لا انا مرتاح بمحلي كتيرررر
حطيت ايدي على تمي و خبيت ضحكتي و اطلعت على مايا و شفت وجها احمر و ما بقا قدرت امسك حالي و ضحكت بصوت عالي ،قرصتني مايا
مهند:ديما شوفي شي بضحك
ديما:ولاشي بس مبسوطة
مهند:اي دوم
سوزان :مهند كتير عم تأسرع ،شوي شوي
ديما :بدنا نوصل مايا بالاول
عمر :لاااا…. قصدي يعني منوصل سوزان لانو بيتا اقرب و بعدين انت و اخر الشي منوصل مايا
ديما(تضحك): ليش انت بتعرف وين بيتا لمايا ؟
عمر:ههههههههه يبعتلك الهنا
ديما :انا اخر وحدة بتوصلوني لانو انا ساكنة جنبكن بالحارة يا فهيم
عمر:اااه صح ولله نسيت يعني خلص بقيانة للاخر
ديما : بقيانة
نزلت سوزان اول وحدة من السيارة و تابعنا لبيت مايا
عمر:بيتك جوا ؟
مايا:اييه
عمر: يلا بنزل معك بوصلك على بيتك بلكي طلع شي حدا بطريقك…
مهند: شهم مشالله عليك …ما طول داي الشجاع رح ننطرك هون
عمر:انا بفرجيك يا مهند لارجع
نزل عمر و مايا من السيارة هن و عم يضحكو و انا و مهند بقينا لحالنا ، صار يقلب بالاغاني هو و ساكت و مدايق و عم ينفخ ، رن موبايلو و ما رد
ديما:هاي سوزان يلي عم دقلك اكيد
مهند:لا لو سوزان كنت رديت عليها فورا ،ما بنطرا ابدا لانو انا ما بحب انطر حدا
ديما :امممم بس في شي اسمو صبر و يلي ما عندو صبر مشكلة كبيرة
مهند : اووووف …شو صار معو لهداك طول كتير
اجا عمر من بعيد ،طلع بالسيارة و رجعنا على البيت ،وصلوني على البيت و راحو ،مر شهور على خطبة سوزان و مهند و كنت متأملة باي لحظة يتركا و يرجع يعطيني فرصة ، خلال هالفترة كنت شوف مهند كالعادة كل نهار خميس و كنا نطلع بالباص و ما نحكي ابدا ،و احيانا كنت اصدفو على باب بيتو او واقف جوا و عم يحكي العمال و فاتح الباب على الاخير ،لليوم يلي اجتنا كرت دعوة عرس مهند و سوزان ليلة الخميس و بالصالة يلي عنا بالحارة ،بكيت كتير حتى مسكت كرت الدعوة قدام امي و شقفتو مية شقفة و حكتلا كل شي انا و عم ابكي
#الجزء الثاني عشر:
ام سالم:يعني خطبا لسوزان حتى يجاكرك و بدو يتزوجا هالغبي كرمال يجاكرك كمان
ديما(تبكي ) : اي بس انا تحسنت و رحت عند دكتورة و اعطتني دوا و تحسنت بس ما بقدر قلو هالشي شو بدي قلو انو كنت …ما بقدر قلو هالشي ابدا كنت خايفة هو يلي يتركني و انقهر كتير اكتر ما انا مقهورة هلأ ،فضلت انو انا يلي اتركو و لا هو يلي يتركني
ام سالم:……ليش حكمتي انو بدو يتركك ؟
ديما:لانو ما رح يقبل فيني و انت بتعرفي هالشي
ام سالم:طيب يا حياتي طولي بالك كل شي بهالدنيا قسمة و نصيب بس هو واحد حقير ليعمل كل هالشي حتى يجاكرك ، و هو ما بيعرف شو وضعك و انك بتخجلي تقليلو ،خلص انسيه
ديما:انساه و هو رح يسكن قبالي
ام سالم :ما رح خليه قاعد هون بس يخلص العرس رح حكيه انا و يصطفل يدبر حالو و ينقلو بسرعة من قبالنا و الا رح افضحو قدام اهلو و بيت حماه
ديما:ما بدنا فضايح
ام سالم:انت بنتي الوحيدة و هيدا اقل شي بقدر اعملو ما رح خليه يضل يقاهر فيكي ، بس ايمت رحتي عند الدكتورة ؟
حكتلا كل شي لامي و بعدين دقيت لمايا و قلتلا انو اجتني كرت الدعوة و خلص رح يتزوجو ،تاني يوم اجت سوزان و نقلت جهازا على البيت هي و اما و خالاتا و بيت حماها ،بس انا ما قدرت فوت لعندن ابدا و بقيت بالبيت بحجة اني مرضانة ،اجا يوم العرس و كنت منهارة على الاخر ،كنت قاعدة بغرفتي و الدنيا عم تمطر و عم اتسمع على اغنية انا و ليلى و عم اكتب كل الحكي يلي كان نفسي قلو اياه لمهند وقت فاتت امي عندي و قلتلي ما بدك تروحي ، قلتلا لا و اتحججي باي شي ،امي هي الوحيدة يلي كانت حاسة فيني و كنت شوفا كتير عم تصلي و هي عم تبكي و تدعيلي ، نزلت امي على العرس و انا بقيت لحالي و تابعت كتابة ،رن الجرس و قمت لافتح
مايا :كيفك
ديما (تبكي ) :كيفني كيفني
مايا :طولي بالك
لفتني رفيقتي و صرنا نبكي انا و اياها ،كانت مايا عم تبكي علي
ديما (تبكي ) :شفتي اندل من هيك بدو يتزوج بهالصالة بيعرفني انو ما رح اقدر روح بدو يسمعني صوت فرحو لهون و اخرة العرس بدن يطلعو سوا على بيتن يعني ما في مجال لاهرب …يا ريت جيت عندك و نمت بهالليلة ..انت ليش ما رحتي على العرس ؟
مايا :دقلي من شوي عمر و قلتلو اني اهلي ما خلوني روح
ديما :ليش ما خلوكي تروحي ليش ما دقتلكن ام مهند و عزمتكن ؟
مايا:اي طبعا بس امي بتعرفي ما بتحضر اعراس بعد ما استشهد اخي و انا مستحيل كنت روح احضرو و اتركك بهيك لحظة .
رن موبايلي مسج ،ركضت مسكتو و فتحت الرسالة ،كانت رسالة مصورة ،كانت صورة مهند ببدلة العرس
مهند :(شو رايك بهالعريس ؟؟ما في مبروك بما انو ما رح تحضري عرسي )
ديما(تبكي):شوفي شو بعتلي
مايا:هاتي لشوف ……العمى بقلبو …بس ليكي عيونو حمر بكيان كتير
ديما(تبكي ) : غبي مجنون
مايا : خلص ما تبكي ولو فوتي عمليلنا فنجانين شاي و لفيلي سندويشة زعتر و قيميلي عن هالاغاني
فتت انا و عم ابكي ، اعمل شاي و سندويش و رجعت ،شفت مايا ماسكة موبايلي و اول ما شافتني ،تلبكت و زتت الموبايل على التخت
ديما:شبك …شو كنت عم تعملي بموبايلي
مايا :ولاشي
مسكت الموبايل و فتحتو و شفت رسالة عم تطلع من موبايلي ،فتحت على قسم الرسائل حتى االحق الرسالة قبل ما تنبعت بس طلعت فورا ،فتحت الرسالة و قرأتا
ديما (تبكي) :لك شو عملتي
مايا :يلي كنت لازم اعملو من زمان اصلا تأخرت كمان
ديما :ليش سويتي هيك يا مجنونة
مايا : سويت الصح ، كان لازم يعرف ….خلينا نقعد و نتفرج شو بدو يصير
ديما :مين قلك انو انا بدي خبرو و هلأ هلأ ما بقا بفيد هالحكي
سحبت الموبايل من ايدي
مايا :هاتي لشوف تسلمت الا لسا ……اي منيح بكون قرأها هلأ ….ديما خلص اهدي بقا و ما تتوتري و بعدين كتبتلو بالرسالة انو انا مايا
رجعت فتحت الرسالة و قراتا
(مسالخير انا مايا رفيقتا لديما انا عندا هلأ و ما بتعرف اديش حالتا صعبة ، رح تموت البنت و خطيتا برقبتك ، هي معا سلس بولي ليلي و عم تتعالج هالفترة و عم تتحسن ، خجلت تقلك شو وضعا و تقوم تتركا انت و هي بتحبك كتير و ما رح تقدر تتقبل هيك صدمة بحياتا ارحما بقا للبنت و حاج تجاكرا ، اذا قررت تابع بهالجازة الغلط ، ما ضروري انت و جايب عروستك السحلية تزمرو بالسيارة و تزلغطو اطلعو على الساكت لانو فرحكن عم ينقام على دمار هالبنت و بالمناسبة ديما ما بتعرف بهالرسالة لانو كبريائها اكبر من انو تتنازل و تبعتلك هيك رسالة بهيك وقت )
ديما :يا الله منك الي سنة ما حكتلو و انت حكيتي هلأ ،هلأ بروح بقول لاهلو و لسوزان و كل الناس بتصير تعرف
مايا:طيب و تعرف و خلي العريس يلي بدو يجيكي يكون بيعرف وضعك قبل ما يتقدملك
ديما :انت بتعرفي اديش هالموضوع بتحسس منو
مايا :حاج تنقي هلأ هاتي السندويشات و روحي تابعي انهياراتك العاطفية على الورق و على اغاني كاظم لنشوف شو بدو يصير
قعدنا انا و مايا نحن و ساكتين و انا عم هز برجلي و اكل اضافيري و عم نطلع ببعض و بالساعة و الساعة كانت عم تمشي ببطئ ،كنا مترقبين يصير شي ،متل معجزة الهية او شي كارثة طبيعية تلغي العرس او ردة فعل من مهند
#الجزء الثالث عشر:
مايا:خدي سندويشة كلي
ديما:ما الي نفس ،كيف الك نفس تاكلي نيالك على برود هالاعصاب
مايا:الا الاكل هيدا موضوع تاني هديك المرة تشارطنا انا و عمر على 4سندويشات شاورما
ديما:ايييه و اكلتي 4سندويشات شاورما!!!
مايا:طبعا لكن بدك اياه يربح الشرط علي
ديما:وليه بكون عم يختبر انوثتك
مايا:انوثة شو ههههههه انا وقت الاكل بيطلع جعفر يلي عندي
ديما:اييي و شو قلك ؟
مايا:قلي يا هيك البنات يا بلا ،هو ما بحب من هدول البنات يلي بقولو ياااي انا فيجتيريان و يييع بئرف
ديما:شو انك دبة ههههههه
مايا :لحظة ….صوت زمامير ……اجت السحلية
ركضنا على البرندة ،انا قعدت على الارض و قلتلا لمايا تقلي شو عم تشوف لانو ما قادرة شوف سوزان لابسة الابيض
مايا : نزلت سوزان من السيارة بس مين يلي سايق السيارة …..هيدا عمر …..بس وينو مهند ما لازم هو يلي يجيب العروس
ديما : ما بعرف بلكي عم يزبط حالو لسا
مايا: هاي مرة عمك نزلت من قدام ،يعني مهند ما معن ….فاتو …راح عمر ….وينو مهند …ما مبين ابدا …شو رايك اتصل بعمر و اسالو ؟
ديما : لاااا…لو صار شي كان هو دقلك فورا خلينا نفوت جوا عم تمطر الدنيا و برد
فتنا لجوا و رجعنا على نفس القعدة ،صارت الساعة عشرة و ما صار شي
مايا :لو اجا العريس كنا سمعنا و شفنا الزفة
ديما :ما بعرف ما بعرف
مايا :حاج تهزي …وترتيلي اعصابي ….عم يدقلي عمر عم يدقلي عمر
ردي و افتحي السبيكر امانة
مايا :الو اهلين عمر
عمر :مايا شوفي على هالمصيبة دخيل الله ما عارف شو بدي اعمل ؟
مايا :شوفي ؟
عمر :مهند اخدوه الامن من عن الحاجز هو و جاي لهون
مايا :هههههههه
عمر:عم تضحكي!!!!
مايا :…..ما قصدي ولله …ييي ليش هيك صار ليش اخدوه؟يييي على حظو انا
عمر :ما بعرف ولله العظيم رح جن انا و ما عارف كيف بدي خبر امي
مايا :ياااه شو عرفك انت؟
عمر :دقلي رفيقو و خبرنا
مايا:وينو هلا ؟ على اي فرع اخدوه ؟
عمر:ما بعرف شي، دقلي رفيقو و قلي خبر امو انو شحطوه الامن و حطوه بالسيارة و راحو فيه شو اعمل شو اتصرف ؟
مايا :خبر امك و قلها انو خلص تلغي العرس
عمر:تلغي العرس ؟
مايا:يعني يوقفوه قصدي ،يعني اكيد العرس ما رح يمشي و العريس ما معروف وين و حتى ما معروف ايمت رح يطلع ،فوت خبرا يلا و بعينك الله
عمر:انا لازم بالاول روح على الحاجز و اسال عنو و نقلن هيدا عريس ما بصير ياخدوه هيك فجأة بس ما بعرف اي حاجز
مايا :لااااا لا ما تروح انا بخاف عليك بلكي اخوك كان متورط بشي ،تقوم تعلق معو انت و ياخدوك كمان ،لا الله يخليك
عمر:انا رح خبر امي و هي تقلي شو اتصرف سلام
سكرت الخط مايا و اطلعت فيني و هي فاتحة تما
مايا: يااااا ما عم صدق و لا شفت اذكى من هيك شاب لك كيف خطرلو …
ديما:مايا ليكونو عن جد اخدوه ،يعني كان دقلي على الاقل
مايا:لا وليه صدقتي هاي كذبة من عندو
ديما:و بلكي ما كذب معقول يعمل هيك كرمالي
مايا:لك هيدا مجنون نظامي اذا خطب كرمال يجاكرك انشالله اخوه عمر يكون هيك عاشق مجنون بس طبعا ما يروح يخطب غيري ليجاكرني وقت بقتلو فورا انا ما عندي مزح بهيك قصص
ديما:شو بكونو عملو بالصالة ،وجه سوزان كيف بكون
مايا:يا حرام يا سوزان ما راحت الا عليها بلشت اتعاطف معا هالسحلية ييييي ديما معقول تلفى على عمر حاكم هاي شكلا هوايتا تقشط الرجال من حبيبتو
ديما:اذا عرفت انك السبب ورا هالرسالة اكيد رح تحاول معو هههههه
مايا:لحظة ….سامعة هالصوت ….علقة رجال ….حبكت..
قمنا ركض على البرندا و شفنا عمر و حامد عم يعلقو مع بعض و يضربو بعض و الرجال ملتمة علين و عم يفكون عن بعض
مايا :يييي عمورتي..يبعتلك بقتلك يا سوزان
ديما:يووو الله لا يعطيكي شطارة يا مايا شفتي رسالتك شو عملت خربت الدنيا
مايا : عم يرن جرس بيتكن
ركضت لافتح
ديما : امي شو رجعك ؟
ام سالم:اللهم لا شماتة بس مهند اخدوه على بيت خالتو هههههه
ديما :يييي عمر و حامد عم يضربو بعض ؟
ام سالم : بعرف هلا مريت من جنبن ،تركت اخوكي سالم عم يفك بيناتن
ديما :ليش ؟
ام سالم: مرة عمك سمعتا لام مهند عم تقول قدم سوزان ما خير علين ابدا و مرة عمك طق عقلا و علقو مع بعض بالصالة و حامد وقت سمع هيك علق مع عمر
ديما :و سوزان شو عاملة ؟
ام سالم :عادمة عقلا ، لو بتشوفي كيف صار منظرا بعد ما ساح مكياجا المعازيم خافو و هربو
ديما :و هلأ ؟
ام سالم :ما بعرف ليطلع مهند بقا و يشوف المصايب يلي صارت من تحت راسو
رجعت على البرندا و شفت مايا عم تحكي على الموبايل مع عمر
مايا:ماشي الله معك
ديما:شو صار هديو مو
مايا :ايه
ديما:شو قلك عمر ،في اخبار عن اختفاء مهند المفاجئ؟
مايا :ما بيعرف شي ،المشكلة رح تكبر كتير و خاصة وقت يرجع يظهر مهند من جديد في طلاق و محاكم و مية قصة بس بيستاهل لانو تسرع و خليه وحده يتحمل نتيجة اغلاطو
ديما:و نحن اكيد بدنا نعلق مع بيت عمي و مستحيل ابي يوافق عليه بعد ما عمل هيك ببنت عمي ،اخ شي بوجع الراس القصة تعقدت كتير
مايا:ما دخلك انت بشي ،هلا الطابة بملعبو و نشوف الذكي كيف بدو يحلى بس ما بينخاف عليه ابدا مشالله رح يطلع حالو من القصة متل الشعرة من العجين
#الجزء الرابع عشر:
مر اسبوعين كاملين على اختفاء مهند و ما دقلي ابدا خلال هالفترة ،و بعد شهر دقتلي مايا
مايا :اسمعي اخر خبر
ديما :شو قولي
مايا :خربانة الدنيا ببيت اهلو لمهند
ديما :عنجد مين قلك؟
مايا :يعني مين ،عمر ،عمر صار بيعرف كل شي و اهلو بيعرفو كل شي
ديما:طب هو وينو؟
مايا:عند رفيقو قاعد هالفترة بس قلن قولو انو بالامن السياسي و انو امورو مطولة كتير ليطلع
ديما :و سوزان شو حكت؟
مايا:سوزان ناطرتو ليطلع
ديما :و هلأ ؟
مايا:هلأ اخوكي سالم معقول مرتو ما قلتلو شي
ديما : لا مستحيل شو بدا تقلو اخوي بحب اختك ،طب ما قلك ايمت راجع ؟
مايا:لااا اكيد لتهدا العاصفة ،ما دقلك مو او بعتلك مسج ؟
ديما : لا ابدا
مايا:طيب مننطر معناتا لنشوف شو بدو يصير
ديما :طب حامد و عمر بعدن متخانقين ؟
مايا:يس يس يلا قحطي عم يدقلي منحكي بعدين سلام
بعد اسبوع تاني ،كان اخي سالم قاعد عنا وقت دقتلو شذى عم تبكي و قلتلو لحقني مهند و حامد عم يعلقو ،نزل اخوي من البيت فورا و انا دقيت لمايا فورا
ديما:مهند رجع ،معك خبر؟
مايا :لاااا ما قلي عمر
ديما:عم يعلق مع حامد ليش ؟امانة دقيلي استفهميلي قلبي متل النار الله يقطع الساعة يلي بعتي الرسالة فيها خايفة يروح شي حدا من ورا هالقصة
دقت مايا لعمر و ما رد عليها ابدا و بعد ساعة سمعنا صوت حدا ببيتو لمهند ،فتحنا الباب و شفنا باب مهند مفتوح ،حطت امي الروب عليها و راحت تشوف شو القصة ،شافت مرة عمي و سوزان بالبيت و عم يضبو الجهاز ، وقفت على باب بيتنا و سمعت مرة عمي اصواتا طالعة و عم تقول
ام حامد:الله ينتقم منو طلقا للبنت بس ليش علقنا مع امو بالصالة ،كان بدو اياني اسكتلا وقت قالت عن بنتي قدما ما كويس على الزلمة بس انا بفرجين بدي خلين يدفعولا متأخرا كامل
كانت امي عم تهديا ،لمو اغراضن و راحو ،رجعت امي على البيت و قالتلي عودة مهند ازمت الوضع كتير ،مين قال يصير هيك ،كانت امي عم تحكيلي وقت فات اخي سالم على البيت و عم يناديلي بعصبية و بصوت عالي
سالم:ديمااااااا..وينك وليه
انا سمعت صوتو و ركضت على غرفتي و قفلتا
ام سالم:شبك امي
سالم:افتحي الباب لشوف افتحيه شو مخبصة انت و رفيقتك بليلة عرسو لمهند
ام سالم:ييييي امي شوفي احكيلي
سالم:كل هالخراب من تحت راس بنتك و رفيقتا ،اطلقت بنت عما و عملو علقات رجال و مدابح
ام سالم:شووو شو صار ؟
سالم: ابن حماي اكل ضربة سكين من حامد ،هداك فار دمو وقت عرف انو مهند طلق اختو واحد بالمشفى و التاني بالسجن
انا سمعت هالسمعة و حسيت حالي رح اوقع بالارض
ديما:ييي مهند وينو هلأ ؟
سالم:افتحي الباب لقلك وينو علقتي الناس ببعضا حتى انا علقت مع مرتي و بيت حمايي قالولي مدام اختك بدا اياه من الاول ليش ما وافقت عليه وقت جينا طلبناها نطرت لليلة عرسو لتبعتلو انو بتحبو و تخرب الدنيا
ام سالم:ديما امي مزبوط هالحكي ؟
ديما (تبكي):ما انا يلي بعتلو هاي مايا ،ما دخلني انا
ام سالم:اهدا ابني فوت لنشوف هلأ كيف بدنا نحل هالامور
سالم:هلأ ليرجع ابوكي حسابك، مفكرين تاخدو بعض ابوكي مستحيل يقبل فيه بعد ما طلق بنت عمك و هاي رفيقتك مايا على هالبيت ما الها دخلة
ديما:ما الك علاقة انت احكي عن بيتك و بس
سالم:عم تجاوبي كمان ..افتحي لقلك هالباب ولله لكسرلك راسك
فات قعد سالم عنا و اجا ابي و سمع بالقصة و بهدلني كتير و راح عند عمي ليطمن علين و انا بقيت مقفلة الباب علي بعد شوي اتصل سالم بمهند و اطمن عليه و قلو انو الجرح ما غميق كتير و صار بالبيت و اسقط حقو عن حامد و قلو يجي ياخد شذى على بيتا لانو هن ما الن علاقة بكل القصة ،راح سالم و انا فتحت الباب
ديما:راح
ام سالم:راح ..شو عاملين انت و رفيقتك ؟
ديما:خلص انسي كيفو مهند سمعتو عم يحكي معو
ام سالم :منيح منيح الله يستر بس من الجاي ،بتعرفي اذا فكر يجي يطلبك شو بدو يصير ،بدا تقوم علقات و مدابح بين اخوكي و ابن عمك حامد المجنون بدو يقلو اعطيتو بنتكن ل يلي عمل ببنت عمكن هيك ،الحق عليكن انتو الاتنين كبرتو راس ، ما بعرف شو بدي قول بس غير الله يسترنا يا رب
رجعت فتت على غرفتي و مسكت موبايلي انا و عم ارجف و بعتلو مسج لمهند
مسج ديما:( لحمدلله على سلامتك كيف صرت ؟)
مسج مهند:(لحمدلله جرحي احسن بس لو وصلت هالرسالة قبل بشهور ما كنا وصلنا لهون ابدا )
مسج ديما :(انا ما كنت بدي ابعتلك اياها لانك اخترت و مشي الحال بس مايا هي السبب بكل هالخراب)
مسج مهند:(بعرف انت اكبر من انك تتنازلي و تبعتيلي هيك كلام ،على كل حال بعدنا باول المشوار لسا جهزي حالك على المعارك يلي بدنا نفوتا و هلأ اهلي جنبي بس يصرلي جو بدقلك و بفهمك شو تعملي )
دقيت لرفيقتي مايا و حكتلا كل شي
مايا:الله حيووو ..ولله لنكيف
ديما:لنكيف قلتيلي لكن ،كل هالشي من تحت راسك
مايا:خلص وليه انا خدمتك ما ضريتك تصوري لو هلأ مهند تزوج سوزان و سوزان حبلت منو شو بدو يكون شعورك ؟
ديما : اااخ بس
#الجزء الخامس عشر :
بعد اسبوع دقلي مهند و قلي شو اتصرف بالضبط ،سكرت معو و دقيت لمايا و خبرتا
مايا:اي تمام اعملي متل ما قلك
ديما:ما بيطلع بايدي
مايا:بيطلع و نص و انت الوحيدة و اهلك ما برفضولك طلب يلا جاي اليوم عندك خليني دربك هههههه
ديما:ولله شكلو اخرتي على ايدك يا ست مايا
مايا:اخرتك لمهند
اجت عندي العصر مايا و قعدت عندي ساعة و راحت و تاني يوم اجو اهلو لمهند و رجعو طلبوني بس ابي رفض نهائيا كرامة لعمي ابو حامد و وقاية من المشاكل بين العيلتين و انا كنت مستحضرة لهل الشي ،لهيك بلشت اعمل متل ما قلي مهند ،وقفت الدوا و حبست حالي بغرفتي و اضربت عن الاكل و الطلعة و الفوتة بس كانت مايا تجي كل يوم عندي و تجبلي سندويش بجزدانا ،بقيت على هالحالة 4ايام و امي تفوتلي الاكل و انا ما ارضى اكل
ام سالم:لايمت يعني بدك تموتي حالك ؟
ديما:انا ما صدقت ايمت اجا شخص عرف بحالتي و قبل فيني و ابوي رفضو بس كرمال ما تزعل سوزان
ام سالم:القصة ما قصة سوزان القصة اكبر من هيك اذا نحن وافقنا على مهند ابوكي و عمك بيعلقو و اخوكي و ابن عمك بتخرب الدنيا بيناتن
ديما:اول فترة بس بعدين بيرضو و بيهدو الله يخليكي اقنعيه انت بتعرفي انا اديش بحبو لهل الشب و تعذبت كرمالو و هو كمان…يعني هو صح غلط و تسرع بس لانو بحبني يعني
رجعت امي فتحت مع ابي الموضوع هن و عم يشربو القهوة و عصب ابي كتير و ضرب فناجين القهوة بالحيط
ابو سالم : احمدي ربك يلي ما خليت سالم يطلق شذى من ورا عملة اخوا ببنت اخوي ،سكري على الموضوع و ابعتيلن انو ما موافقين و يروح يرجع مرتو
ام سالم:و البنت بدا اياه خايفة تروح من ايدي ،اذا بصرلا شي ما رح سامحك وقتا،الها 4ايام ما عم تاكل قالبة على نصا ،كلو كرمال اخوك ما يزعل كلو قسمة و نصيب بهالدنيا سوزان بكرا بجيها نصيب و بتنساه، اما هاي بنتك الها وضع خاص ،فضلت بنت اخوك على بنتك..
ام سالم:و البنت بدا اياه خايفة تروح من ايدي ،اذا بصرلا شي ما رح سامحك وقتا،الها 4ايام ما عم تاكل قالبة على نصا ،كلو كرمال اخوك ما يزعل كلو قسمة و نصيب بهالدنيا سوزان بكرا بجيها نصيب و بتنساه، اما هاي بنتك الها وضع خاص ،فضلت بنت اخوك على بنتك
طلع ابي من البيت هو و معصب و دقيت لمايا و قلتلا انو ما تجي عندي هالفترة لانو انا قررت فعلا اضرب عن الاكل ،دقلي مهند و ما رديت عليه و بعتلي مسج انو يا مجنونة ما تعملي شي اعطيني شوية وقت بس لفكر بحل تاني بس انا ما رديت عليه ابدا و بعد 3ايام تعبت كتير لدرجة ما بقا قدرت قوم من التخت و اخدوني اهلي اسعاف على المشفى و بقيت يومين نايمة بالمشفى ،بعتلي مسج مهند
مهند :(انا على الطريق جاي لعندك )
ديما :(اوعى يا مجنون بخاف يجي ابي فجأة يشوفك و تعلقو )
مهند:(اذا ما كبرت ما بتصغر)
بعد شوي اجا مهند و جايب معو بوكيه ورد ، فات و شاف امي عندي و ابي كان بشغلو ،سلم علينا و قعد على الكرسي جنبي
مهند:طلعتي مجنونة اكتر مني
ديما : لابقين لبعض كتير
نحن و عم نحكي مع بعض و نضحك ،اجت مرة عمي و سوزان يشقو علي ،اول ما شافونا ،جمدو بارضن بعدين صارت تصرخ ام حامد بالمشفى
ام حامد:هادا شو عم يعمل هون ؟
ام سالم :طولي بالك ام حامد
سوزان :شوفي بينك و بينا
قام وقف مهند
مهند :انا بحبا لديما و طلبتا من اهلا و جاي اطمن عليها
سوزان :بتحبا ؟؟بتحب بنت عمي !!
مهند:اي بحبا
التفت علي مهند
مهند:انا لازم روح
تركنا و مشي و بقيت سوزان واقفة و عم تطلع فيه و عم تبكي ،راح بسرعة
ام حامد:زوجك شو رايو بهالمسخرة ؟
ام سالم :……
ام حامد :مشي امي سوزان مشي خلينا نخبرو لابوكي
طلعت مرة عمي و بنتا من عنا من المشفى و بعد ساعتين اجا ابي و معصب و طلعني من المشفى و علق هو و امي بالمشفى ليش استقبلتو لمهند و خلتو يقعد معنا ،رجعنا على البيت و قامت مشاكل بين امي و ابي و ابي ضربا كف لامي لانو قالتلو البنت بدا تتزوجو غصب عن الكل ،انا تعبت اعصابي كتير و دقيت لمهند انا و عم ابكي و قلتلو شو صار و انو ما ضل شي ما جربناه و ابي بعدو معند على رايو و ما بدو يوافق على زواجنا ،و المسا بعتلي مهند رسالة
مهند:(انا تعبت انا رح سافر )
رجعت دقتلو و ما رد ،طلعت عند امي
ديما (تبكي):خلص رح ترتاحو هلأ مهند رح يسافر
ام سالم : شووو لوين
ديما (تبكي):يعني لوين متلو متل كل هالعالم يعني خلص راح و ما بقا يرجع ولله اذا بسافر رح موت حالي هاي عم قلكن من هلأ ما بعيش بلاه
ام سالم:يا رب صبرني بس ،شو بدي اعملك اكتر من هيك،ابوكي بحياتو ما مد ايدو علي و اكلت كف من وراكي انت و اياه و لهلأ ما بحكي معو بس يرجع انت وقفي بوجهو و قليلو هالحكي انا ما بقا الي علاقة بالموضوع
رجع ابي من شغلو و اجا سالم و شذى عنا يسهرو و خبروه لابي انو مهند بدو يسافر لانو ما قبلان تزوجو ديما و امي قالتلو انو ديما بدا نموت حالا بحال سافر مهند ،كنت حاطة داني على الباب و عم اتسمع
ابوسالم:طيب بعشرين يوم بس بيتزوجو حتى ما يصير شي و عرس مختصر
انا سمعت هيك و صرت نط من الفرحة و دقيت لمهند و خبرتو و انبسط كتير و قلي بلشي معناتا و جهزي حالك فورا ،خلال هالفترة قاطعونا بيت عمي و بعتولنا حكي كتير بانو ما رح يحكو معنا ابدا بعد هالعملة وبعد عشرين يوم كان عرسنا انا و مهند ، رحت عند الكوفيرة انا و مايا يلي ما تركتني ولا لحظة اخر فترة و حتى هي يلي ساعدتني ب لبس البدلة
ديما :انشالله بلبسك البدلة بعرسك انت و عمر
مايا :ايمت يجي هاليوم يا ربي ؟
ديما :انشالله بيجي و هاي ما تقولي ما اخدتك سلفتي
مايا :ههههههه انا يلي اخدتك سلفتي لولاي ما كنت تزوجتي مهند
ديما :و لولاي ما كنت عرفتي عمر …اسرعي يلا هلأ بيجو
رحنا على الصالة و في كان كتير من قرايبين ابي ما حضرو العرس كرمال مرة عمي بس كنت قاعدة بالعرس و اعصابي متوترة و خايفة كتير ،قرب علي مهند
مهند:شبك
ديما:خايفة طب علينا سوزان و اهلا فجأة او يجي ابن عمي
مهند :هههههه و انا خايف لهيك عندي حل
ديما: شو ؟
قام وقف مهند
مهند:قومي لقلك
ديما:شبك اقعد
مهند:لك قومي
مدلي ايدو و قمت ،حملني و نزلنا من البرزة و الناس عم تطلع فينا و تضحك
مهند :هههههه تابعو انتو حلفنا ما بتوقفو
و طلع من باب الصالة و مرة عمي لحقتنا
ام مهند:لك لوين ؟
مهند :ههههه على بيتنا انتو كملو هز و رقص تصبحو على خير
نزلنا من الصالة و طلعنا بالسيارة و مشي بسرعة
ديما :انا كنت شاكة انك مجنون بس هلأ تأكدت ههههه
مهند: لسا ماشفتي شي ،هلأ بس نرجع على البيت بفرجيكي الجنون على اصولو هههههه
انتهت.