الثعلب بقلم هلا غرابلي
الثعلب بقلم هلا غرابلي
لينا:شي بملل ولو
ربا:اي ولله كتير هاتي شي نعملو و نتسلى فيه
لينا:متل شو ؟
ربا:اسمعي انا عندي اقتراح
لينا:هاتي لنشوف
ربا:بما انو اليوم اهلك بالضيعة و للمسا ليجو و نحن لحالنا بالبيت ،تعي ندق ارقام عشوائية على التلفون و نتغالظ على العالم و نعلقن ببعض
لينا:ههههه يبعتلك الهنا بس عجبتني الفكرة …قومي التلفون بغرفة القعدة
ربا:ولله لنكيف ههههه
رحت انا و رفيقتي ربا على غرفة القعدة و قعدنا على الصوفا و حطيت التلفون الارضي بحضني و بلشنا نألف ارقام من عقلنا و نتصل
لينا :الو مرحبا
مجهولة: اهلين
لينا:ممكن احكي مع زوجك
مجهولة :زوجي؟عفوا ؟مين حضرتك
لينا:انا سوسو
مجهولة :سوسو ؟ مين سوسو ؟ شو عرفك بزوجي ؟
لينا: زوجك بكوون زوجي يا مدام ،قليلو بس يجي انو انا ما عاد بدي اياه و يطلقني
ربا:هههههه سكري حاجتا
سكرت الخط نحن و عم نضحك
لينا:هلأ بتكون علقت معو ، قولتك بتكون صدقتنا
ربا : ما بعرف ،هاتي دوري …انا بحب الارقام المفردة *******….الو مرحبا
مجهول :اهلين
ربا :ممكن احكي مع المعلم وفيق قلو الرقاصة سماهر
حطيت ايدي على تمي و صرت اضحك
مجهول:الرقاصة سماهر ؟
ربا :اي رقاصة شو ما عاجبتك ما فيك تحكم قبل ما تشوف رقصي
مجهول: و وين فيني شوف رقصك ؟
ربا:شرفنا بزيارة على كباريه هات ايدك و رقصني
مجهول :ههههههه بدك ايدي بس ولا بدك جيبتي ؟
ربا : ههيهيهيهيهي انت كريم و نحن منستاهل يلا انا لازم سكر عندي وصلة سلام
لينا :هههههههه العمى بقلبك اذا انا صدقتك ،هاتي دوري ، شوفيلي هالرقم ******* ..عم يرن ……يلا ردو بقا …
ا…الو
مجهول :الو
لينا: شو صار معك ؟ خفيت الجثة محل ما قلتلك
مجهول :اييييه كل شي تمام ،بس بعدا عم تصفي دم
حطيت اايدي على السماعة و قلتلا لربا ههههه هادا خالص على الاخر
لينا :ليش عم تصفي دم لهلأ ؟بشو قتلتوه؟
مجهول :قتلتا بالسكينة 3طعنات بالبطن و نحرناها بالرقبة متل ما اتفقنا
لينا : …….
سكرت الخط فورا بوجهو
ربا : شبك ليش انخطف لونك ؟
لينا :ما بعرف خفت ،قلي قتلناها بالسكينة ،حسيتو عم يحكي جد ما بس عم يسايرني ولي ليكون فعلا مزبوط
ربا :هاتي لايدي و بلا هبل
اخدت ربا التلفون من ايدي و قبل ما ترفع السماعة ،رن التلفون
ربا :خدي شوفي مين عم يتصل فيكن ؟
لينا : هاتي لشوف يمكن هبة عرفت انو قاعدين لحالنا ….الو
مجهول :الووووو …انت كيف بتحبي اقتلك ،نحر بالرقبة او طعن بالبطن متل هالجثة يلي مرمية قدامي
لينا :مين معي ؟
مجهول : مين معك ….امممم ….معك واحد بحب الدم كتير و بحب القتل كتير و اختصاصو البنات حصرا …معك قاتل متسلسل محترف و لقبي الثعلب
سكرت الخط بوجهو فورا انا و خايفة
لينا :ولي قلبي حاسستو رح يوقف
ربا :شبك وليه عم ترجفي شو قلك
لينا :ربا قلي انو هو قاتل و بيقتل البنات بس و قلي كيف بتحبي اقتلك ،كيف رجع دقلي شو عرفو بالرقم
ربا : ما بعرف شي غريب …عم يرن
لينا : خدي ردي انتي …انا خفت
ربا : الو …
مجهول:الو
ربا: يا اخي ما بقا ترجع تتصل لهون
مجهول :هسسسس …اعطي السماعة لرفيقتك
ربا :شو بدك منا ؟
مجهول : اذا حابة تموتي معا ردي علي مرة تانية وقت بتصل
اطلعت ربا فيني و زتت السماعة بحضني
ربا :خدي بدو يحكيكي الك
لينا (ترجف): االو
مجهول : الوووو ….شو اسمك انت يا حلوة ؟
لينا :شو بدك باسمي ،و اصلا شو عرفك برقمنا
مجهول :انت يلي اتصلتي فيني بالاول و سالتيني عن جثة
لينا(تأتأ): ايييه كنت …عم …امزح …يعني
مجهول :بس انا ما كنت عم امزح
لينا : …….
مجهول :ههههههه خفتي …معك حق تخافي ….بس ما رح خليكي تتعذبي …رح خليكي تموتي فورا اول الشي بحط الخنجر ببطنك و بخليه يفوت لجوا احشائك و بعملك فتحة كبيرة ببطنك و بطلعلك امعاء الغليظة و الدقيقة و بعدين…
سكرت الخط فورا بوجهو
لينا(تبكي) :ربا انا ما بقا قادرة …رجلي ما عاد يحملوني …هيدا عم يحكي جد
ربا :شبك
لينا : دخت و لعيانة نفسي قلي بدي طلعلك امعائك و….
ربا :التلفون عم يرن
لينا :ما تردي ما تردي ..دخيل الله شو بدنا نعمل هلأ
ربا:بلكي هادا ضل يدقلك بعد ما رجعو اهلك
لينا :شو بدي اعمل …ردي انت و قليلو ما بقا يتصل لهون و كنا عم نمزح بس
ربا :الو
مجهول : الوووو ….ليش بطولو لتردو ،انا ما كتير عندي صبر
ربا :شو بدك مننا انت …ما بقا ترجع دق لهون احسن ما ….
مجهول :انا حكيي ما معك انا حكي مع رفيقتك ….لينا …
#الجزء التاني:
حطت ربا ايدا على السماعة و قلتلي عرف اسمك
لينا : شووو ….كيف …اسمي انا
ربا : قلي رفيقتك لينا…خدي ردي
لينا:ما بدي …ما بدي
ربا :ردي انت …انا ما دخلني بكل هالقصة
لينا :الو
مجهول :الوووو
لينا :شو بدك مني انت ،شو عرفك باسمي؟
مجهول:القاتل المحترف بيعرف كل المعلومات عن ضحيتو قبل ما يقتلا
لينا (ترجف):..انت مين …انا وقت سالتك عن الجثة كنت عم امزح بس ولله كنت عم امزح
مجهول:له له له ليش صوتك عم يرجف …اوعى تكوني عم تبكي…بس جيبك لعندي ابكي على راحتك…… انا كتير حابب شوفك خايفة و عم تبكي و تترجيني ما اقتلك بس قد ما ترجيتي و بكيتي رح ادبحك ….
لينا:…..
مجهول :شبك سكتي ….عم شم ريحة الخوف منك ،اكيد وجهك ااصفر هلأ و عم ترجفي و عم تقولي شو هالورطة بس من سوء حظك انك اتصلتي على هالرقم ،رقم موتك
سكرت الخط بوجهو و رجع اتصل ،سحبت الخط من التلفون و فتت على غرفتي انا و ربا ،قعدت على التخت
لينا :الله لايعطيكي شطارة يا ربا على هالاقتراح …اعصابي تعبت و ميتة رعبة
ربا :شبك وليه صدقتيه ما تخافي العمى ما اجبنك
لينا :انت شو فارقة معك ،هو متقصدني الي ما الك و عرف اسمي…لك كيف عرف اسمي رح جن و كيف رجع اتصل على الرقم
ربا :ما بعرف شي غريب معقول بيعرفك من قبل
لينا :كيف بيعرفني و نحن دقينا رقم غريب
ربا: يعني حدا من عيلتك و دقيتي بالصدفة على رقمو و حب يعمل فيكي هالمقلب
بقينا ساعة انا و ربا نفكر مين ممكن يكون هالشخص لرن جرس البيت
لينا :مين اجا …ليكون هو ..يا امي ..بطني صار يجعني كانو سهلت
ربا :هههه شبك وليه صدقتي انا رايحة افتح
لينا:لاااا ما تفتحي
ربا :لك بلكي كانت اختي رهف الصغيرة باعتينا اهلي ، رح اسال مين قبل ما افتح …قومي معي
قمنا و رحنا على الباب ،طلعنا من العين الساحرة و ما كان في حدا ،قالت ربا ميين 3مرات ،ما حدا رد
لينا :وليييي هادا هو هادا هو ،جاي يقتلني
وطت ربا على الارض و طلعت من تحت الباب
ربا :ما في حدا ،خلص اهدي شو بدو يجيبو وليه هبولة ،رح افتح الباب
لينا:لا ما تفتحي
فتحت الباب ربا و ما شافت حدا بس شفنا ظرف على الارض ،قامتو ربا من الارض و فاتت لجوا و سكرت الباب بسرعة
لينا:شو هادا ؟
ربا :…مابعرف …خلينا نفتحو نشوف شو بقلبو …شوفي ..ولي ..لينا صورة ثعلب اسود ..الصورة بتخوف كتير
لينا :ثعلب ..هادا هو ..خلص عرف بيتي …خلص رح يقتلني الله لا يوفقك يا ربا انت السبب ،انا لازم خبر اهلي
قلبت الصورة ربا على قفاها
ربا :مكتوب عليها
لينا :شو مكتوب ؟
ربا :مكتوب (لينا ،الضحية رقم 15 قريبا ، مع حبي الثعلب )
قعدت على الارض و بلشت ابكي
لينا :لازم خبر اهلي ،لازم خبر الشرطة ،رح يقتلني بس ليش انا شو عملتلو
رحت فورا على غرفة القعدة و وصلت الخط
ربا :شو بدك تعملي؟
لينا :شو الرقم ،ما بقا بتذكرو
ربا :دقي على الذاكرة
لينا:بتروح الارقام وقت منسحب الخط و منرجع منحطو
رن التلفون و انا عم احكي مع ربا
ربا :هادا هو يمكن
لينا :الو
مجهول:الوووو…كنت عارف انك رح تردي …وصلتك الصورة ،عجبتك
لينا :ليش هيك عم تعمل معي ؟
مجهول:…انا لسا ما عملت
لينا :انا رح خبر الشرطة عنك
مجهول :امممم ..خبرين …بس شو بدك تقليلن ….في واحد بدو يقتلني …طيب شو اسمي انا ..بتعرفيه؟ …اكيد لا ….من وين انا عم حكيكي …بتعرفي؟ ….اكيد لا …طب كيف شكلي …اكيد كمان ما بتعرفي بس انا بعرف …بعرف اسمك و عنوانك و صوتك و شكلك و بعرف كيف جيبك لعندي
لينا: …انت بتعرفني من قبل …انت حدا من العيلة …انت ابن عمي رجب
مجهول : لااا
لينا : معناها انت ابن خالي محمد ،و عم تعمل فيني مقلب ولله لقلو لابوك لخليه يبهدلك
مجهول:لااا ….انا لا رجب و لا محمد انا الثعلب
لينا :انت محمد و انا بفرجيك
سكرت الخط بوجهو و دقيت لبيت خالي و ردت علي مرة خالي و سالتا عن محمد قالتلي جوا نايم ،سكرت و دقيت لابن عمي رجب ،ردت علي اختو و قالتلي رجب بالشام من يومين
لينا : مين بدو يكون ،انا كنت شاكة بهدول الاتنين و ما طلعو ،ربا عنجد هيدا قاتل و بدو يقتلني
ربا :طولي بالك شو الدنيا سايبة هيك
بقيت انا و ربا طول نهار عم نقلب و نشقلب بالقصة ،رجعو اهلي من الضيعة ،و اول ما فاتو و ارتاحو ،لحقت اخي فادي على غرفتو
لينا :فادي بدي اسالك ،هلا في ميزة على الهاتف الارضي،اذا الواحد دقلنا مثلا نعرف رقمو و اسمو وعنوان بيتو
فادي:ههههههه يا لطيف كل هيدا بدك تعرفيه ،طبعا لا ،في الكاشف هلأ هاي ميزة جديدة بتتفعل بشركة الاتصالات و بيظهر رقم المتصل بس بدون اسمو او عنوانو ،ليش عم تسالي؟
لينا : ولاشي هيك ،طلبت مني ربا اسالك بس لانو في واحد عم يتغالظ عليا على تلفونا الارضي
فادي:ولله كانت عندك اليوم ربا
لينا:ايه لكن بدي ابقى لحالي بالبيت ،اجت قضت النهار عندي
فادي : سالتك شي عني؟
لينا:عنك ؟لا
فادي:امم قليلا تعطيني الرقم يلي عم يتغالظ عليا و انا بتصرف معو
لينا:شو عرفا بالرقم ،ما مفعلة الميزة
فادي:ايوا ،خلص معناها ما تعطيه وجه و تسكر الخط بوجهو او تخلي ابوها يحكيه
لينا:طيب بقلا
رحت على تختي و انا كل عقلي بالثعلب و ما نمت منيح هديك الليلة ابدا ، فقت تاني يوم الصبح و لبست و نزلت على مدرستي ،كنت خايفة انا و ماشية بالطريق و الشوارع فاضية ،يطلعلي فجأة و ييخطفني ،بقيت اسبوع روح على المدرسة انا و مترقبة شي حتى و انا بالبيت بقيت عيني على طول على التلفون ايمت ما يرن ،يهبط قلبي و ااركض لاعرف مين المتصل بس ما كنت انا يلي رد،كنت اسمع امي مع مين عم تحكي و بس اطمن ارجع على غرفتي ،حاولت كتير انسى هداك اليوم و انسى كلامو حتى اجا يوم الخميس ،كنت رايحة على مدرستي و الدنيا عم تمطر كتير ، حسيت في حدا ماشي وراي ،التفتت وراي و شفت واحد لابس اسود من فوق لتحت و حاطط طاقية سودا على راسو ،اطلعت حولي ما لقيت حدا بالشارع و كانت الساعة 7الصبح ،سارعت بخطواتي ،التفتت لورا ما شفتو وراي رجعت التفتت لقدام ،شفتو طلع قبالي و كانو ناطرني ،صرخت و بلشت اركض باتجاه تاني لدرجة حسيت رجلي لقو بضهري ، انا و عم اركض سمعت صوت ضحكتو ، تابعت ركض للمدرسة بدون ما التفت وراي…..
#الجزء التالت:
وصلت على مدرستي انا و عم لاهت و عم اخد نفسي بصعوبة
لينا:ربا …الحقيني
ربا:شبك …مقطوع نفسك
لينا (تبكي):…لحقني …لحقني
ربا:ما عم افهم عليكي مين هادا
لينا:الثعلب خلص ايامي معدودة ….رح يقتلني
ربا:طولي بالك …ليكي البنات عم يطلعو فيكي …خلص اهدي …بس نطلع فرصة بتحكيلي كل شي بالتفصيل ،فتت على صفي و ما ركزت ابدا بشرح الانسة و بقيت شاردة و بس طلعنا على الفرصة
ربا: كيف شكلو ؟
لينا:ما بعرف ما دققت ابدا بملامحو بس شفتو من بعيد و لابس كلو اسود
ربا:ولله شي غريب ،طيب بلكي ما هو و انت تهيألك يعني قصدي بلكي واحد ماشي بالطريق عادي
لينا :ما بعرف بس اذا بضل الوضع هيك ما رح ركز بالامتحانات ابدا رن الجرس خلينا نفوت على الصف هلأ و منرجع سوا عالبيت
رجعت على البيت انا و ربا بس طول الطريق عم اتلفت قدامي و وراي و على يميني و يساري متل المجنونة ،و انا عم اتغدى مع اهلي
ام فادي: رح نطلع بكرا على الضيعة
لينا: خدوني معكن
ام فادي:ما في محل ،رح تطلع معنا عمتك و اولادا ، خليكي بالبيت و حكي رفيقك ربا تجي تقضي نهارا عندك و الجمعة الجاية بتطلعي معنا
لينا:بدبر حالي ما على بالي ابقى بالبيت
ام فادي: لينا قلتلك ما في محل ، خلصي اكل و قومي اجلي الجليات
جليت الجليات و فتت على غرفتي و قعدت انا و عم فكر و خايفة من بكرا ،اتصلت برفيقتي ربا و قلتلا تجي تقضي نهارا عندي ،تاني يوم فاقو اهلي بكير الساعة 7الصبح و طلعو على الضيعة و انا دقيت لربا فورا كرمال تستعجل بجيتا بكير لانو خايفة ابقى لحالي بالبيت
لينا:فقتي اكيد ؟
ربا:اي طبعا لانو رايحة انا و اهلي على الضيعة
لينا:شو يعني ما رح تجي عندي
ربا :لا ولله ما رح اقدر طالعين لعند بيت جدي على الضيعة
لينا:بربك ..بدك تتركيني لحالي ،ولله خايفة ما تطلعي معن الله يخليكي
ربا:ما بقدر بعدين بزعلو مني بيت جدي
لينا:انا بفرجيكي يا ربا ولله ما بقا احكي معك وقت حاجتي الك ما لقيتك لك ما خايفة علي ترجعي تلاقيني مقتولة
سكرت الخط بوجها و قمت قفلت الباب و فتت فطرت و عملت قهوة و فتحت التلفزيون و بلشت حل وظيفة العربي انا و قاعدة على اعصابي ،صارت الساعة 11،رن التلفون الملعون ،رفعت السماعة
لينا :الو
مجهول:الوووو…اشتقتيلي؟
لينا:اسمع لقلك انا اصلا ما بقا خاف منك و…
مجهول:اممم لحالك اليوم بالبيت
لينا:لااا ما لحالي هون اخي و رح ناديه هلأ خليه ييشوف شغلو معك
مجهول:اممم ناديه …ليكني ناطر على الخط
سكرت الخط بوجهو انا و عم ارجف منو ،رجعت دقيت لربا بس ما حدا رد ،رجعت سكرت الخط ،رن التلفون
لينا:شو بدك مني ،بدك تقتلني ليش ما قتلتني من اسبوع
مجهول:لسا اللعبة باولها ،ما بحب احرق مراحل ،ليش خفتي و ركضتي وقت شفتيني مع انو انا حلو و وسيم بشهادة كل الضحايا يلي قبلك هههههه
لينا:انت واحد مريض نفسيا
مجهول: بجوز كون مريض بس ما مهم ،المهم انت
لينا:شو بدك هلأ ؟
مجهول:بدي اياكي
لينا :شو بدك مني ؟انت ما بتعرفني لسا ..
مجهول:لا بعرفك ،شو عم تعملي ؟
لينا:ما دخلك و لهون ما…
مجهول:انا عم سن السكينة يلي بدي مرقا على رقبتك الناعمة متشوق كتير لدوق طعمتك اكيد طيبة يا لولو
لينا :…..انت بتابع شي افلام رعب لانو شكلك متأثر كتير و حابب تعيش الدور
مجهول: لا لانو عم تابعك الك حاليا ما فاضي لهيك شي ،مركز معك الضحية رقم 15
سكرت الخط بوجهو و قمت الخط من التلفون ،بعد ساعة اندق جرس بيتنا ،خفت روح شوف مين على الباب ،وصلت الخط فورا و دقيت لجارتنا انا و عم ابكي و قلتلا تبعتلي ابنا الصغير يقعد معي لانو خايفة ابقى لحالي ،قلتلي اطلعي اقعدي عنا ،قلتلا بطلع بس ابعتيلي مازن هلأ ،بعد شوي اندق الباب ،رحت اطلعت من العين الساحرة و شفت مازن ،فتحت الباب فورا
لينا :خليك واقف هون رح اطلع اقعد عنكن
مازن:لينا ليكي شو هادا
قربت و شفت وردة حمرا على عتبة البيت و معا رسالة صغيرة ،مسكت الرسالة و فتحتا ،كان مكتوب فيا (اللون الاحمر هو لون شفايفك و لون خدودك و لون دمك …مع حبي الثعلب )،مزعت الورقة مية شقفة و كبيتا من البرندا و انا طالعة عند جارتنا و قضيت كل نهاري عندن،و ما نزلت لاجو اهلي ،كنت مفكرة كتير احكيلن بس خفت ما يصدقوني و يفكروني هبلة و يحطو اللوم علي اذا طلعو كشف بالارقام و شافوني انا متصلة فيه بالاول ،مر الاسبوع علي بخير و سلامة ،رجعت يوم الخميس و شفت عنا ضيوف ،فتت سلمت علين و تابعت على المطبخ بعد شوي لحقتني امي
ام فادي:لينا ..وينك …هدول الجماعة جاين يشوفوكي
لينا :اي هاي شافوني
ام فادي:بلا هبلك هلأ ،فوتي غيري تيابك و زبطي حالك و اطلعي ضيفي قهوة
لينا:مين هدول ؟
ام فادي :هاي ام اسامة ،اسامة رفيق اخوكي ،عرفتيه
لينا :لا ما عرفتو ،من وين بدي اعرفو
ام فادي: يلا اسرعي .
غيرت تيابي و طلعت قعدت معن شوي و فتت على غرفتي ،بعد شوي راحو و اجت امي عندي و قالتلي حددنا السبت ليجي العريس اسامة يشوفك و تشوفيه ، انا فايتة قلو لابوكي و اسال فادي عنو بما انو رفيقو و اخي فادي حمد و شكر فيه كتير ،اجا السبت و اجا اسامة مع اهلو ،كان شاب طويل و عيونو زرق فاتح و لون بشرتو حنطية و شعرو اسود و جايب بوكيه ورد كلو ورد احمر ،فتت سلمت على الكل و قعدت قبالو ،كان عم يطلع فيني و يبتسم كل شوي ، و بالاسبوع التاني تمت خطبتي فورا و تزوجنا انا و اسامة بعد 6شهور خطبة كانو من احلى الايام ،و خاصة انو ما بقا دقلي الثعلب ابدا او حتى لحقني ، كان اسامة شاب مجنون و عندو مفاجأت كتير و دمو خفيف كتير و بيضحك كتير ، بعد العرس فتنا على بيتنا
اسامة: تفضلي يا نور حياتي و اخيرا صرنا لبعض هالليلة ليلتنا
لينا:انا فايتة غير تيابي ، البدلة تقيلة كتير و تعبت من لبسا
اسامة :اي فوتي حياتي
فتت على غرفة النوم سكرت الباب وراي ،رجع فتحو اسامة
لينا:اطلع هلأ بس لغير تيابي
اسامة :طب خليني انا ساعدك بشلح الفستان شفت مرة هالمشهد بفيلم انو العروس ما بتعرف تشلحو لحالا و العريس بساعدا هههههه
لينا :ههههه لا بعرف ما تاكل همي
رجعت سكرت الباب و قفلتو ،شلحت البدلة وحطيتا على الكرسي ، فتحت خزانتي و شلت فستان لالبسو ،بس فجأة انقطعت الكهربا
#الجزء الرابع:
لينا :يييي على حظي ….اسامة …اسامة ….وينك وين رحت
رحت على الباب و فتحتو و انا لابسة تيابي الداخلية بس و ماسكة فستاني بايدي و الدنيا عتمة ما شايفة قدامي ،شفت اسامة جاي من المطبخ و حامل شمعة ،كان لون عيونو الزرق على ضو الشمعة بخوفو متل الذئب ،اطلع فيني و ما حكى شي
لينا :وينك عم ناديلك
لبست فستاني بسرعة ،لحقتو على غرفة القعدة ، حط الشمعة على الطاولة
اسامة: لينا…الضحية رقم 15
لينا : …..
وقفت جامدة بارضي و عم اطلع فيه ،ما عرفت بشو فكر و ما عرفت ابقى بمحلي ولا اهرب
لينا :هيدا انت
اسامة:امممم انا ..انا الثعلب
فك ازرار قميصو هو و عم يطلع فيني و زتو على الصوفا و قعد على الصوفا هو و عم يطلع فيني من فوق لتحت و عم يبتسم ، رفع رجليه على الطاولة و شغل سيجارة
اسامة:شبك واقفة ،قعدي ارتاحي الليل بعدو باولو
كان حكي اسامة هادي كتير و عم يخوفني ،بس حاولت اضبط اعصابي
لينا :….عنجد انك واحد غليظ بتعرف اديش تعبتلي اعصابي هديك الفترة ،بقيت شهر امشي بالشارع و اتلفت حولي
اسامة :امممم
طلع سكينتين من تحت فرشة الصوفا و بلش يسنن ببعض
لينا :اسامة شو عم تعمل ؟عم تخوفني
اسامة:هيدا المطلوب
سحبني من ايدي و قعدني بحضنو و حط السكينة على رقبتي
اسامة:الله ..الي اديش ناطر هاللحظة ..6شهور اكتر ضحية بطول معي
قمت فورا و ركضت باتجاه غرفة النوم انا و عم صرخ يا امي ، لحقني و رفع قاطع الكهربا بطريقو ، جيت لسكر الباب ،صار يدفشو حتى فتحو و فات
لينا :اوعى تقرب ولله بصرخ و بلم الدنيا عليك انت واحد مريض و حقير
اسامة: ههههههه حتى لو صرختي ما حدا رح يطلع يخلصك مني …تعي لهون
ركض وراي و انا طلعت على التخت ،لف لجهتي ،نزلت من التخت و ركضت برا الغرفة و لحقني ،خبطت بالباب انا و عم اركض ، لقطني و حملني انا و عم صرخ ، زتني على التخت ،قرب علي و حط ايدو على تمي و انا وقتا انهارت اعصابي و غبت عن الوعي و ما صحيت الا و هو عم يرش علي مي
اسامة : لينا دخيل الله شو صرلك …لينا ردي علي ..عم امزح معك ولله
لينا: يااا امييي بعد عني الله ياخدك ،اوعى تقرب
قمت من التخت و هربت منو ،اجا ليهديني
اسامة:ولله عم امزح معك و حبيت كمل معك المقلب
رحت على الكرسي و مسكت البدلة بدي ارجع البسا
اسامة:شو عم تعملي ؟
لينا :بدي البس و ارجع لبيت اهلي
اسامة:ههههه بدك ترجعي لعندن بالبدلة
زتيت البدلة بالارض و فتحت خزانتي لطول تياب ،قام سكر الخزانة
اسامة:معقول انت ما بتلقي مزح ولو
لينا :اي مزح ؟هادا ما مزح ،في واحد بعمل بعروستو هيك باول ليلة انت نزعت كل شي
اسامة:خلص ولو خديا بروح رياضية
لينا :لو بعرفك انك انت نفس الشخص يلي عمل فيني هيك من 6شهور ما كنت اخدك
اسامة :بالله و انت صبية داقة لرقم غريب و عم تتهبلي و تاخدي و تعطي معو انا يلي عملتو ترباية الك
لينا :ما من حقك هالشي ،مين كنت انت وقتا لتعمل فيني هيك ،رفيق اخي
اسامة : طولي بالك و اهدي خلينا بس اشرحلك
قام التياب من ايدي و زتن على التخت و راح على باب غرفة النوم و قفلو
اسامة:ما الك طلعة من هون شو بدن يحكو الناس عليكي رجعتي لبيت اهلك بنفس الليلة خلص بعرف حالي انو زودتا و تقلت العيار معك …
لينا(تبكي ):ما رح يحكو شي وقت بقلن شو عمل فيني زوجي باول ليلة سن السكينة و ركض وراي ليدبحني
اسامة :يالله خلص بقا قلت بخلي اول ليلة النا مميزة و ذكرى منقعد نتذكرا و نحكيا لاولادنا
لينا :اولادنا !!! اصلا يمكن انا بعد هالرعبة ما بقا بجيب اولاد
اسامة : ههههه لا بتجيبي
لينا :مستحيل سامحك على الشي يلي عملتو معي كيف اجا من قلبك تلعب باعصابي هيك
اسامة :القصة كلها صارت صدفة ،كنت قاعد بالمحل نهار الجمعة عم فرمت الكمبيوتر ،قام رن التلفون و انا عندي كاشف ،شفت الرقم و فكرتو اخوكيي فادي مع انو بعرف انو اخوكي فادي طلع على الضيعة ، و وقت رديت و سمعت صوتك عرفت انك بالبيت لحالك و عم تتسلي لهيك فورا كفيت اللعبة معك و لعبتا على اصولا و رحت على المكتبة و اشتريت صورة ثعلب و كتبتلك وراها و بعتا مع اخوي الصغير قلتلو يحطلك اياها على العتبة و يرن الجرس و ينزل بسرعة
لينا :ما خفت خبر الشرطة عليك او خبر اخي فادي و يعرفك انو انت يلي عم تعمل هيك ؟
اسامة :لا ما خفت ههههه واحد متلك بخاف و بعرف انك ما رح تخبري الشرطة لانو مبين مقلب من حدا بيعرفك و لو عرف اخوكي فادي ما رح يحكي شي لانو انا حاكي معو فيكي من سنة و نص و قلي انطر لتكبر شوي و تقدم على الاقل امتحانات البكالوريا و اكيد رح يتشكرني اذا عرف و يقلك بتستاهلي يلي عملو فيكي لانو افرضي مثلا طلع شاب وسخ بالصدفة و علق على الرقم و ضل يدقلك و يتغالظ عليكي و انت وقتا بتاخدي و بتعطي معو
لينا :لا طبعا كنا عم نتسلى و نعبي وقت انا و ربا ما كان قصدنا نحكي شباب ابدا
اسامة :ايييه و هيك بعبو البنات وقتن ؟
لينا :…….بس اسامة انت بتعرف اديش عيشتني على اعصابي بهداك الوقت و فوق منا لحقتني
اسامة :هههههه يا لطيف اديش ضحكت بهداك اليوم على شكلك انت و عم تركضي ،بس على فكرة انا كل يوم بتصبح فيكي انا بكون رايح على المحل و انت رايحة على مدرستك بس هالمرة حبيت اتسلى فيكي شوي يلا مشي نتعشى انا جعت
لينا:تعشى لحالك
اسامة :لا ما رح اتعشى لحالي ليكي معك 5دقايق اذا ما مشيتي تتعشي معي رح ارجع سن السكينة خخخخخخخخ عم امزح عم امزح
لينا:يعني انا ما توقعتك غليظ و دمك تقيل لهل الدرجة
اسامة :لسا اتقل من مما بتتصوري يلا امشي قدامي
—؛—بعد شهرين ———-
اسامة :عندي شغل كتير اليوم بالمحل رح اتأخر نامي و ما تنطريني
لينا :يالله منك بس انا بخاف كتير قضي الليل لحالي بالبيت
اسامة :يا روحي ما في شي بخوف نامي او تفرجي عالتلفزيون لبين ما ارجع شغلة ساعتين و بعدين كل يلي بيني و بينك شارع واحد بس
لينا :طيب
سكرت الخط مع اسامة و خطرت ببالي فكرة جهنمية ردلو فيا على الشي يلي عملو فيني ، قبل جيتو بنص ساعة رحت على البراد و طلت علبة الكاتشب و حليتو بشوية مي و حطيت شوي منو على باب البيت و شوي على بلوزتي و حطيتا بالموزع و غطست السكينة فيه و زتيتا بالمدخل و تركت باب البيت شوي مفتوح و شغلت التلفزيون و عليت صوتو شوي و دقتلو ،اول ما رفع السماعة سكرت الخط بوجهو رجعت دقتلو و صرخت اسااااامة و سكرت الخط انا و عم اضحك ،رجع دقلي هو فورا ،بعد 3رنات رفعت الخط و قلتلو من بعيد اساااااامة دخيل اللله لحقني و سكرت الخط و حطيت السماعة على جنب حتى وقت يتصل يلاقي الخط مشغول و يجي ركض ،تخبيت ورا باب الحمام ،بعد دقيقتين بس اجا ،فات على البيت و مقطوع نفسو و هو عم يصرخ ليناااا و وقت شاف منظر الكاتشب فكرو دم ، ركض من غرفة لغرفة هو و عم يدور علي و حتى اطلع بالحمام نظرة سريعة و ما انتبه على وجودي ورا الباب لطلع من البيت ،انا ركضت وراه
لينا :اسامة اطلع اطلع هههههههه انا هون
اسامة : انت فوق
طلع كل اربع درجات مع بعضن و شافني واقفة على الباب و عم اضحك
لينا :لينا الضحية رقم 15 هههههههه
اسامة :بدك تاكلي اتلة مرتبة على هالعملة
ركض وراي انا و عم اضحك لحتى لقطني
لينا :انت يلي بلشت مو انااا هههههههه
اسامة :من وين هالدم؟ولله العظيم جبتيني ركض من المحل لهون
لينا:هههههه بتستاهل ،هيدا كاتشب ولو ،ليك ولله بنفع نخرج انا و اياك افلام رعب ههههه
اسامة :بدي فرجيكي فيلم هلأ بحياتك ما شفتي متلو
لينا :رعب !
اسامة : لا من نوع تاني ههههههههه
انتهت.