طريقة ليزي كيك بس للصراحة مش ليزي أبداً

المقادير

• ظرفين كريم كراميل
• 2 باكيت بسكويت ابيض
• 2 باكيت بسكويت بني
• فتات كيك
• نصف باكيت بسكويت اضافي
• للتزيين:
• كريمة
• مكسرات

الخطوات

ليزي كيك

السلام عليكم ورحمة الله وبركاته

وصفة اليوم شهيرة جداً وطبعا اسمها ليزي بالانجليزي يعني كسول لإنها تك تك تك بتكون خلصت صوص شوكولا وبسكويت مكسر وخلصت ، بس اليوم حبيت اعملها بطريقة جديدة وحلوة ومش ليزي ابداً ، حتى ابني بحكيلي ليش ياماما بتحكيلها lazy كيك لازم اسمعها active كيك ههههه

أولاً/ صوص الشوكولا

عملته بطريقة سهلة ومضمونة وهيه عبارة عن ظرفين كريم كراميل عملتهم بطريقة المصنع المكتوبة عالعلبة وبس نزلتهم عن النار ضفت شوكولا حبيبات او كاكاو انا ضفت الثنين وبنخفقهم كويس وبنضيف عليه فتات كيك شوكولا او بسكويت مكسر او الثنين وبنطحنه كويس لحتى يختفي كل الكيك والبسكويت ويصير خليط ناعم .

ملاحظة/

صوص الشوكولا القابل للدهن زي بديل نوتيلا ما بينفع

لهالوصفة لانه لازم يكون مادة مكثّفة للقوام مثل الكاسترد او الكريم كراميل عشان تضل ماسكه بحرارة الغرفة.

ثانياً/ صف البسكويت

بنجهز قالب تشيز كيك اذا متوفر لانه سهل الاستخدام او صينية عادية وبنغلفها بنايلون تغليف من الداخل ضروري

وبنبلش نصف البسكويت ( ابيض وبني) بنغمس البسكويته من الداخل فقط بالصوص وبنوقفها على حواف الصينية بس بالتناوب بسكويته بيضا بسكويته بني

*موضح بالصور

—بنصف كامل الصينية تماماً ورح يكون في فراغات بسيطة بنصب فيها من صوص الشوكولا الزائد وبنغلفها وبندخلها الثلاجة ليلة كاملة.

ثالثاً/ التزيين

بنخفق ظرف كريما عادية حسب طريقة الاستخدام اللي عالعلبة .

—بنقلب صينية الليزي على صحن وطبعا رح تنزل بسهولة بسبب النايلون.

—بنغلفها بالكريمة وبنزينها من الاطراف بشوية صوص من الزائد( طبعا هوه ثاني يوم بكون جامد بتضربيه بالخفاقة بصير سائل وكثيف) ورشة فستق حلبي بكل بساطة.

رابعاً/التقديم

رح تطلع كيكة بتبيض الوجه وبتشرفك قدام ضيوفك واهل بيتك كمان

—بنصحك تقطعيها قدام ضيوفك لإنها كثيييير حلوة من الداخل ومفاجئة للموجودين عالتقطيع.

—وتهنوا فيها كثير طيبة وشيك وصحة وهنا