تم اغلاق المحضر بقلم مال الشام
تم اغلاق المحضر بقلم مال الشام
المقادير
- الجزء 1/2/3/4/5/6/7/8
الخطوات
الجزء الأول
يه شو يعني ازا صار عمري 34 وماني متجوزة؟ شو يعني ازا اخواني نسيوني و بس دئلهن بسكرو الخط بخافو اطلب مصاري!
وشو يعني ازا خواتي بندهولي عانس؟
شو يعني ازا امبارح متل اليوم؟ شو يعني ازا باكل لحالي و احيانا ما باكل و بصير ابكي لاني وحيده!!
عادي يلا كل عام و انا بخير… ان شاء الله السنه الجايه بكون متجوزة و حامل كمان…
هههه اصلا لازم يكون معي هلا اربع ولاد و بنتين
و معبين البيت ضحك و لعب… و ابوهن نايم و عم يقلهن اسكتو ينعن امكن
و انا عصب عليه و نتخانئ…
نزلت دمعة هبة…. غمضت عيونا طفت شمعات الكيك الي عملتو لحالها مشان عيد ميلادها… و طفت الضو و نامت…
تاني نهار و هي طالعه ع دوامها:
هبة ليش القياس مو زابط
هبة مو هاد الموديل الي طلبتو
هبة مو هي القماشة الي كان بدي ياها
الله يرحمك يا ابي قلتلهن البيت كلو لهبة لانها ما تزوجت بس الله يسامحهن اعطوني المخيطة ما بتجيب غير همها…. يلا منيح لولا هالمخيطة كنت صفيت عالحديده بعد ما غسان ضحك علي
الله لا يسامحو…
غسان شب حبيتو و انا بالمدرسه، هو ميكانيكي
حبيتو كتيررررر كتير و ضلينا 6 سنين مع بعض كل ما يطليني حدا صير ابكي و ارفضو و بيوم من الايام… اجا و قلي انو بدو يسافر ع الجزائر رفيقو هنيك و قلو في شغل غير شكل
عيطت و زعلت و بكيت و قلي انو لازم يسافر مشان بعد شهر يرجع ياخدني معو و نتجوز بس لازمو مصاري ليعمل جواز و يحجز تذكرة
من جدبتي رحت بعت المبرومة تبع امي الله يرحمها و اعطيتو حقها
و هي مرق شهر
و تنين
و تلاته
و سنه… و سبعه
ههههه و 10
و غسان فص ملح و داب…. حرقلي قلبي الله ينتقم منو
قلبت عليه الدنيا حتى اهلو ما رضيو يخبروني وينو شكلو متفق معهن…. روحتو بهل طريقه جننتني
ماعرفت ليش تخلى عني… شو السبب!!
صرت متل المجنونه فتش عليه و ضليت ناطرتو 6 سنين على امل يحكي معي و يندم و نرجع لبعض…. ما خليت حدا من رفئاتو ما سألتو… وصلت لل30 و صار بدي طفل بدي حب حنان دفا و امان بس ما عاد حدا طلبني.. راح عمري و انا انطرو
ايييييه بكون صار عندو ولاد و بنات و انا لسه عم فكر فيه
الله ينتقم منو…
فتت عالمشغل و بلشت شغل بين هالقماش و الابر و الماكينات
بعدين ندهتلي رنده. لروح عالمكتب لان في رجال بدو ياني قال هو استاز مدرسه و بدهن يفصلو ستاير للصفوف من عنا…ما كزبت خبر حملت حالي و رحت ع المكتب
#مال_الشام
#تم_إغلاق_المحضر
-2-
فتت عالمكتب … كان معطيني ضهرو ….
تنحنحت لينتبه على وجودي … و قلتلو تفضل …
و صار يشرحلي انو هن اختارو مشغلنا يتعاملو معو بأي شي بحتاجوه للمدرسه وانو هو مدرس اللغه الإنجليزية و رح يكون مسؤول عن هالموضوع والتعامل رح يكون معو بشكل دائم طول ما نحنا منشتغل مع المدرسه …
و صار يشرحلي عن قماش الستائر المطلوب ولونو و بعدين ورجيتو الموديلات الي بقترحهن وتناقشنا و من حديث لحديث عن شقاوة الأولاد و انو لازم نختارلهن شي عملي صرنا نحكي عن اديش هالجيل بيغلب ومتعب كتير
دردشنا شوي وبنهاية القعده طلب رقمي ترددت كتير
بصراحه ما كان عندي رغبة للتواصل معو … بسبب الوحده وحالة اليئس الي عايشه فيها أي رجال بتعامل معو بكون بالنسبه علي ( مشروع عريس )
بس هاد الرجال اعلى بكتير من سقف توقعاتي
جمال وجاذبية و لبق كتير وفهمان و خلوق كل كلمة بيحكيا محسوبة عالمسطرة . مثقف كتير و ( جنتل مان ) …
و انا عم فكر و محتاره قلي عفوا يمكن رح سببلك مشاكل مع زوجك ؟!
قلتلو لا ماني متزوجة بس خايفه انا سببلك مشاكل مع زوجتك !
قلي وانا مو متزوج بس بكل الأحوال ما في أي مشاكل نحنا بينا شغل والتواصل اجباري !
خجلت من حكيو و حسيت اني كتير جدبه و عم احكيه كأنو طلب مني علاقه !
تداركت الوضع و قلتلو ( طيب غسان سجل الرقم )
رفع حواجبو و قلي غسان !!
غمضت عيوني و توترت كتيييييييير …. قلتلو فظيييييع غسان كنفاني … دايماً بقرألو بالليل بحب رسائلو لغادة عايشين جواتي … بعتزر منك
جهاد : لا بسيطة اكيد ما بزعجني تندهيلي غسان كنفاني انا كمان معجب بهي الشخصيه … بالإزن
الحمدلله اهم شي اني من البدايه ما كنت متأمله منو شي ، يعني مافي داعي ازعل
فعلا القناعة كنز …
مرق أسبوع هادي جداً
ممل جداً
(روتيني) جداً
حزين … كئيب … قاسي
متل كل أيام عمري الي بتمر …
لوقت ما رنلي جهاد !!
اتصل فيني و سألني عن الطلبية وحكينا شوي عن الشغل وحبيت استغل الفرصه و ارجع اعتزر منو …
ضحك وقلي له مو بيناتنا يا غادة ..
قلتلو غادة !!
قلي انا قبلت كون غسان لازم تقبلي تكوني غادة !
قلتلو اوف ومين بيتمنى يكون مطرح غادة !
حبيبها كان ملك ست تانيه … ما كانت تملك منو غير حروفو
حبر على ورق
الأنثى بدها أفعال على الواقع
جهاد : الواقع مو دايماً بسمحلنا نثبت ( الحبر ) الي على الوررق، بعدين كل رسائل غسان بتثبت انو حبو كان حب من طرف واحد ليش جزمتي انها حبيبتو
هبة : لكن ما في داعي نكتب ازا مو قد حروفنا صح ؟
و بعدين انا الي قلي انها حبتو و عشئتو… مافيها الا تحبو اصلا
جهاد : يعني رسائل غسان الي تركها للعلم و علمهن كيف يحبو … كيف يعيشو كل تفاصيل الحب رغم البعد رغم الطروف ما كان الها داعي ؟
هبة : ايه طبعاً ما الها داعي وبلا طعمه كمان ، ما بتفيد بشي الا لوحده متلي وحيده و عانس و يائسه تقعد تقرأهن ع ضو الشموع و على موسيقى هاديه و تبكي على وحدتها وفشلها و عجزها
ما بتفيد إلا تزكر أنثى متلي انا خلئت بلا حب ورح تموت بلا حب … شوه الإنجاز العظيم الي تركولنا ياه قلي !!!!!!
و صرت ابكي بحرقة …
جهاد : بعتزر منك …
هبة : انا الي كتير بعتزر … سلام
بس هديت حسيت بخجل كبير من الحكي الي خبصتو …. حسيت بأعراض المرض بلشت … و أساسا كنت تعبانه نفسياً مو بحاجة تعب جسدي إضافي
بعتت رسالة لجهاد ( انا أصلا ما كان عندي رغبة اتعامل معك من البداية ، و هلا رح سلمك هي الطلبية وننهي الشغل بيناتنا انا ما بدي التقي فيك مره تانيه إطلاقاً و ياريت تبعت حدا غيرك يستلم الستاير … بعتذر منك )
بعد دقايق رد علي برسالة ( أنت ، لا تريدين أخذي تخافين مني او من نفسك ، أو من الناس أو من المستقبل ، لست أدري ولا يعنيني أنك لا تريدين أخذي و أن أصابعك قريبة مني تحوطني من كل جانب كأصابع طفل صغير حول نحلة ملونة ،تريدها وتخشاها )
ما بعرف … هلا انا كنت مريضه ايه
وكنت تعبانه وكنت محطمة
و خجلانه و زعلانه و متدمرة و لابسه بجامعة رماديه قديمة عليها دبدوب مهتري ورافعه شعري كعكه و حاطه كمادات … يعني بخمس دقايق كيف قمت اخدت دش و تنشطت وعملت عصير برتقال و عم غني لماجدة الرومي و قلبي عم يدق يدق يدق !! ما كنت اعرف
لك اناااااااااا
انا واحد يبعتلي رسالة كتبا غسان كنفاني لغادة ! ههههههه ومييييين
جهااااد !
كتير هيك
احترت شو رد عليه … بعتلو شو يعني هاد ؟؟
بعتلي يعني خلينا نلتقي بعد ساعه ! بالحديقة الي جنب مدرستي
بدي شوفك … !
#مال_الشام
#تم_إغلاق_المحضر
-3-
لبست و رتبت حالي و نزلت متل بنت 16 سنه رايحه تشوف حبيبها
شو بدو يقلي
شو رح يحكي
طيب شو حب فيني واايمت لحق يعجب فيني و يحكيني هيك !!
وقفت بنص الطريق للحظة وحسيت قلبي رح يوقف ..
يمكن بس شفق علي وتعاطف معي !!
انا شو عم بعمل
وفوق هيك انا وقت ندهتلو غسان كنت بقصد غسان حبيبي شبني كزبت الكزبة وسقت فيها
صرت رجل ورا ورجل قدام بس في شي خلاني روح … و كمل طريقي
لوقت ما شفتو ناطرني
جهاد : خفت ما تجي
هبة : ليش ؟
جهاد : لان غسان مات وهو ناطر من غادة وعد بالحب او أي استجابه
هبة : هلا انت شايفني غبية ؟
جهاد : غبية !! ليش هيك بتحكي
هبة : يعني شفتني معجبة بطريقة حب غسان كنفاني و صرت تستغل هاد الشي لتتقرب مني وما بعرف شو هي غايتك !
جهاد : ليكي انسة هبة ، انتي فاهمة غلط
يمكن انا ما عندي مشاعر (عشق) تجاهك … بس في اعجاب قوي كتير …. ع فكرة حدا قلك انك فاتنة ؟
هبة : لا ما حدا قلي وما بسمح لحدا يقلي !
جهاد : طيب انا رح قلك ولو ما عجبك انتي فاتنة وحلوة كتيييييييير و جمالك بخلي واحد متلي ينجذبلك
هبة : ليش انا ؟؟!
جهاد : مممم ما بعرف ، هاد الشي من رب العالمين هو بكتب الأزواج لبعضهم بهي الحياه
هبة : ازوااااااااااج !!!!!!!
ضحك جهاد ضحكة عاااااليه و بعدين قال : يعني عفواً بس انا رجال عمري 37 سنه …. عانيت كتير لقدرت اصنع حالي و أسس شقفة بيت صغير الي ودرس اخواتي … و هلا صار وقت استقر وابدا ما في وقت لضل ابعتلك رسائل و مكاتيب غراميه وبعدين خطوة خطوة تطور العلاقه ونتعرف ع بعض وهالحكي الفاضي، نحنا ناضجين ومو صغار و انا بدي عيلة
هبة : بس انت من وين لوين بتطلب بنت ما بتعرف عنا شي !!!
جهاد : مين قلك ما بعرف عنك شي ؟ انتي من عيلة محترمه جداً و خلوقة وسمعتك طيبه ’ بالأول انزعجت انك ساكنه لحالك بس من معارف قريبين فهمت انو هاد الشي مو بايدك و سمعتك بين الناس بترفع الراس
انا ما بدي طفله … انا بدي سيدة ( ليدي ) … الا ازا عندك اعتراض علي ؟
هبة : اعتراض ؟ لاااااااااااااااا …. اصدي يعني ع سلامتك …
رجع ضحك نفس الضحكة الحلوة الي بتاخدلي عئلي
جهاد : من مين بدي اطلبك ؟
هبة : من مين ما بدك !!
#مال_الشام
#تم_إغلاق_المحضر
-4-
بشهر خلصت كل امورنا …. اصلا جهازي كان موجود كنت دايما جيب تياب واغراض وخبيهن
حتى تياب ولادي كنت جايبتن تياب للولاد وللبنات ومخبيتهن بشناتي و ما ورجيتهن لجهاد بنوب
مشان ما يتخيل اني كنت بائسة للدرجة الي انا فعلا كنت واصلتلها !!
واخواتي ما سدئو يخلصو مني
كل شي كان بسيط لان جهاد وضعو متوسط هو الكبير كان مسؤول عن اخوانو كلهن
توقعت لاقي منهن محبة واحترام فظيعين الو كأنو بمقام ابوهن بس الواقع ما كان هيك ابدا
كان عندهن قلة احترام بالحكي معو وهو كان يخجل مني و يحاول ما يخليني اجتمع بأخوانو
اما امو ست كبيرة ومريضه كتييييييييييير صرت اعتني فيها وعاشت معنا
كان كل شي حلوووو
تركت المشغل وأمنت رنده عليه كنت كل سبت انزل اتاكد من الشغل
واتفرغت لحياتي الزوجية الي كنت احلم فيها دايماً
انتظر زوجي بس يرجع من الشغل وحطلو الغدا
وانتبه انو وقت ينام الظهر يكون فيه هدوء ومحدا يزعجو
اكويلو تيابو
طعميه بايدي
اقعد جنبو وهو يتفرج ع الأخبار
ووقت يشوف مباراة اعمل حالي فهمانه واتناقش معو
نتخانق و يزعل مني وراضيه
و حس بالضجر من مسؤولية الزواج والشغل والتعب
ايه ايه انا بس هاد كان حلمي
بدي كون زوجه
بدي حس بأهميتي ك أمرأة … بدي زوج
و كمان بدي
بدي
انا كمان بدي ولاد …
ما كان في بيناتنا (نيران ) الحب … كان بيناتنا احترام وقناعه وانا كنت اعمل كل جهدي
لكون زوجة مثاليه
حماتي كان بدها رعايه واهتمام متل الطفل بس ما كنت ازعل بنوب
وسحبت من حسابي بالبنك و صرت جبلها ادويتها وعلاجها وساهم بمصروف البيت و حط مصاري بجيبة جهاد
بدون ما يعرف( غلط بعيدو للمره التانيه )لوقت ما ضللي شي صرت استعجلهن بالمصاري من المشغل وهن يقلولي
انو المشغل ما بجيب هي المصاري الي انا بطلبها !!!
وبالفعل كان معهن حق بس جهاد لما كان ينقص عليه مصاري كانت نفسيتو تتغير
وهون انا حسيت انو صار قاطع وقت طويل بدون ما يصير حمل !!
وصرت نق على جهاد نشوف دكتورة
كان حنون علي كتير
عصبي شوي
و اكبر مصايبو الغيرررره
المهم وافق نشوف دكتورة … و راجعنا وحكتلنا انو رح يكون في صعوبة بس في ادوية بسيطة اخدهن
وان شاء الله بفرح عن قريب و ارتحت كتير بهل حكي و جهاد كان طاير عقلو من الفرح
وفورا راح جاب الادوية و صار يوصيني ..
ونحنا عالطريق جبنا سندويش وكنا مبسوطين ورايقين
بعدين سألني ازا اجت بنوته شو حابه تسميا ؟
قلتلو ياسمين
قلي و ازا صبي ؟
سكتت … قلي شو ؟
قلتلو بدي سميه غسان .
-5-
ضحك جهاد و فكر قصدي عن غسان كنفاني
بس لا … لا انا كان قصدي غسان الي حبيتو من 16 سنه !!
الي تسببلي بكل الأسى والوجع والحزن !
ما بعرف ليش هيك بس في شي كتير قوي بخليني سمي ابني بأسمو لهاد الرجال الي حرقلي قلبي
ووجعني … وعزبني
مع الأيام اقترحت على جهاد انزل شوي على شغلي بس كم ساعه ووافق بشرط هو يوصلني ويجبني ومافي ولا رجال
يفوت المشغل ابدا
غيرتو كانت ترعبني …
بعد شهرين سمعت احلى خبر بحياتي
عملت تحاليل و طلعت النتيجة ايجابية
حتى الفرحة الي شفتا بعيون جهاد كانت بتطير العقل
يا الله شو كانت الحياة حلوة
اول مرة بنتبه اديش السما كبيرة
اول مره بنتبه انو شروق الشمس معناه حياة وحب وامل
معناه انو ابني عم يكبر ببطني
معناه انو رح صير ام !!
يااااااااااااااربي كيف بدي انطر 9 شهورررر
جهاد انقلب ، جاب ممرضه تهتم بأمو لان خاف علي من التعب
وطلب مني ارتاح من المشغل وخفف علي الغيرة شوي صار يسمحلي امسك الموبايل
ويسمحلي افتح الشبابيك .. كنت عايشه بالجنة ….
لوقت ما اجا هداك النهار …
رن الموبايل و كان رقم غريب ..
هبة : الو مين ؟
هو : الو .. هبة ؟
هبة كانت واقفة … قعدت على كرسي و صارت ايدها ترجف : ايه .. اايه هبة مين معي ؟
هو : حبيبك …
هبة : غسان ؟
هو : لا التلك حبيبك
هبة صارت تبكي بدون وعي و ترجف …. و غسان يندهلها وما كانت ترد
بعدين صارت تصرخ وتقلو شوووووووو بدك
انت ما متت ؟ ماااااااا متت ؟
انقلع من حياتي يا حقيرررر
غسان : لك هبة اهدييييييييييييي اهدييييي
هبة : لك يا حقير يا واطي انت دمرت حيااااتي شو بدك مني بعد شو بدك
غسان : انا اشتقتلك
هبة : شوووووووووو ؟؟ شو شو ما فهمت
بعد 10 سنين اشتقتلي ؟؟؟؟
غسان : لا من زمان مشتقلك اهدي بس شوي اهدي اهدي
هبة تعبت كتير وسكرت الخط
ركضت ع غرفتها وصارت تبكي و ترجف .. (( يا ربي ليش رجع ليش ليش ليش … مو هلأ
مو هلأ يا غسان … اتركني مشان الله اتركنييييييييييييي ))
ضلت على هالحالة ساعات لحتى وصل جهاد على البيت وصار يدور على هبة …
سمع صوتها عم تبكي و تأن و ركض ع الغرفة وسمعها وهي عم تصرخ
( الله لا يوفقك يا غساااان انقلع من حياتي … اتركني بحالي مشاااااااااااان الله )
#مال_الشام
#تم_إغلاق_المحضر
-6-
جهاد : غسان ؟
هبة : جهاد انت هون ؟
جهاد : غسان ؟؟
وانا الاجدب سدئت ؟
لك كيف ما لاحظت ! انتي ما كان عندك هالتأثر الكبير فيه كيف ما انتبهت انو انضحك علي
وين كان عقلي ؟
قرب من هبة ومسكها من ايدها واتطلع بعيونها
جهاد : وين كان عقلي!! ..كيف كنتي تطلعي بعيوني وتخدعيني ؟
طيب قليلي … احكيلي
انا فنيت عمري ليصير عندي عيله
ووقت جيت اتجوز اخترت بنت واعيه
محترمه
ناضجة
قررت اختار انسانه تفهمني وتشاركني حياتي
هبة : لحظة لحظة .. انت فهمان غلط خليني اشرحلك مشان الله
جهاد : ولك شو تشرحي ؟؟ لو في شي تشرحيه كنتي كزبتي علي ؟
هبة : ما كزبت والله هي القصه خالصه من 10 سنين
جهاد : شوووووووووو !! عشر سنين العمى بئلبك لك خافي الله فيني
لك الله لا يسامحكن كلكن
انتي واخواتي و هالدنيا كلها الي كسرتلي ضهرررررري
لك وابني ؟؟؟ وابني الي ببطنك ؟
انا كيف بدي اتحمل عيش معك بعد ما عرفت انك كزابه ومتلك متل غيرك
هبة : لك وحد الله شو متلي متل غيري انا هاد البني ادم ما بعرف عنو شي من 10 سنين
بس اليوم اتصل علي وكنت مخنوئة والله كنت رح قلك والله والله
جهاد : ضبي غراضك وارجعي ع بيتك .. مو قادر اتطلع بوشك لك الله لا يسامحكن كلكن
الله لا يسامحكن كلكن
وطلع جهاد من البيت و هبة تصرخ وتقلو لك اسمعنيييييي انا ما عملت شي
…..
مرقو اربع ايام رجعت لبيتي المعتم … الرطب
المطفي
الهادي
هادي لدرجة الجنون
هادي لدرجة حسيت عقلي رح يطق
كنت بكل زاويه اتزكر الي صااار
مو عارفه شو اعمل … ما في شي مخليني اتماسك الا ابني
اهم شي ابني معي
قمت وبعتت رساله لجهاد وشرحتلو كل شي لان ما كان راضي يرد ع اتصالاتي لقيت المسج
احسن حل ،،، كتبتلو اديه تعزبت وانو ما صار شي بيني وبين غسان
وحكيتلو كل التفاصل وقلتلو ازا بتحبني ولسه رايدني والي خاطر عندك
تعا خدني هلا … بدي نام ببيتنا ما بدي نام وحيده
انا بحبك وانت حب حياتي وابو ابني … عم استناك
و فجأة رن الموبايل … ركضت لشوف مين .. اول مره بحياتي ما بخطرلي انو الي متصل غسان
ولا بركض عالموبايل للحقو مشان غسان
فكرتو جهاد … بس لسبب من اسباب الطبيعه .. كان المتصل غسان
كنت ما بدي رد بعدين قررت رد وشوف شو بدو وليش رجع لحياتي
غسان : الو هبة ؟
هبة : ايه نعم … تفضل
غسان : لك اشتئتلك
هبة : هههههه تشتئك جهنم
غسان : نعم !!
هبة : لك ايه متل ما عم الك ، اسمع لقلك انا ست متجوزة و ابني ع الطريق
بقى انضب واحترم حالك احسن ما خلي جوزي يربيك
غسان : هههههه حاجتك كزب ولو انا جبت الرقم من مرت ايهم .. هو رفيقي وبعرف انو كان
يحب رفيقتك فورا حكيتو وطمني انهن تجوزو وطلبت رقمك
ومرتو اكدت انك لسه ما تجوزتي
هبة : بالله ؟ يعني ايهم طلع رجال على عكسك صح ؟
غسان : ما في داعي للغلط .. انا كنت طايش و بعد سنه ندمت وكنت رح موت لارجعلك بس كنت مفكرك تزوجتي
تفاجئت كتير انو بعدك ناطرتيني
هبة : لك انت ما بتفهم والله انا تزوجت بس ما عملنا حفلة كبيرة لان امو لزوجي ست مريضه
وما منعرف ايمت الله بياخد امانتو ، لهيك ما عزمت كل رفقاتي
غسان : كزابة … انا عرفت وين بيتكك وليكني تحت وضو الشقه شغال
يعني انتي بالبيت والساعه 12 بالليل ، و هاد معناتو انك ما طلعتي من بيتك
الي ساكنه فيه كل هالعمر لوحدك وناطره رجعتي
وانا رجعت
هبة : شوووووو انت تحت !!!!! انقلع من هون
غسان : لأ يا حلوة انا مو رايحهه …انا جاي
هبة : كيف يعني ؟
غسان : يعني افتحيلي الباب لان ناطف قلبي عليكي
هبة : لك فشرت بنص عينك انقلع من هون ليشوفك حدا
كل شي عملتو فيني وهلا جاي توسخ سمعتي ؟
غسان : ليكي انا هلا رح دق عالباب … اول تلات دقات بصوت واطي
الرابعه اعلى
الخامسه رح صرخ بصوت عالي
وهيييييييييك ليفيقو اهل البناييه كلها وتلتم العالم
-7-
المفتش : كمل يا ابني ليش سكتت ؟
الشرطي : سيدي هاد اخر شي كتبتو
المفتش : قصدك انو هاد الحكي كانت عم تكتبو بنفس الليله الي فات جوزها و لقطهن !! معقول
الشرطي : والله يا سيدي ما في تاريخ بس متل مو شايف المخلوقة بتكتب كل حرف و دفترها
بضل بايدها بكل ثانيه … يعني وهي ماشيه بتكتب كل سطر
حتى خواتها و اخوانها وعاملات المشغل بالتحقيق قالو انو هي العاده علمتها ياها امها
لان كانت تخاف عليها كتير وهي صغيره .. فكانت تعلمها تضل تكتب كل شي بصير معها بالحرف
و خطها بأخر كم سطر كأن ايدها عم ترجف
يبدو كانت خايفه كتير
وكانت عم تكتب مستقصده لان حاسه رح يصير شي
المفتش : العمى معناها هي قضية شرف .. هبة خافت تنفضح وفتحتلو الباب
لما فتحتلو الباب تهجم عليها
وبهاد الوقت وصل جهاد وشاف هالشوفه عقلو ما حملو و دبحهن
الشرطي : ايه يا سيدي هيك اكتملت الصورة وجهاد اصلا اعترف انو هو الي قتلهن
بس ما قال انو قضية شرف
المفتش : طيب وهبة هلا كيف حالتها ؟ وكيف الجنين ؟
الشرطي : اخر تقرير وصلنا من المشفى انها ما فاقت من الغيبوبة
والجنين مو معروف وضعو يمكن يحتاجو لعملية اجهاض بعتمد على استجابة الأم
المفتش : ووصل تقرير المشرحة مشان جثة غسان ؟
الشرطي : ايه سيدي سبب الوفاة هو نقص الأوكسجين يعني الخنق وهاد الشي
بتأكدو علامات الخنق على رقبة المغدور
المفتش : والجيران اعطو افادتهن ؟
الشرطي :ايه سيدي و في جارتها اكدت انها شافت رجال على درج البنايه
وانو بلش ينقر نقرات خفيفه وبعدين بلش يضرب بقوة وبعد هيك انفتحلو الباب وضل الباب مفتوح
وبعد خمس دقايق وصل جهاد
المفتش : طيب اكتب يا ابني
(( بناءً على شهادة الشهود و المعطيات والأدلة ومسرح الجريمة
تعتبر القضية قضية شرف وعليها #تم_إغلاق_المحضر ))
الشرطي : بس المخلوقه مظلومة كيف رح نسكو المحضر؟
المفتش: هي قضية شرف اكتب متل ما قلتلك بدون لعي
الشرطي: حاضر سيدي
المفتش : يلا انصرف بدي ارتاح ..
وصل الشرطي لعند الباب ورجع
المفتش : شو بدك ؟
الشرطي : سيدي هي البنت مظلومة ويمكن تموت لان تعرضت لكدمات بالراس
المفتش : طيب ؟
الشرطي : بتسمحلي سلم الدفتر لجهاد مشان يشوف بعيونو انو زوجتة مظلومة ؟
المفتش : انا رح اعتبر حالي ما سمعت
هي ادلة مسرح الجريمة ومو مسموح لحدا يتطلع عليها اطلاقاً
بعدين انا مو مسؤول عنو وعن مرتو … انصرف
الشرطي : حاضر سيدي
بعد اسبوع هبة صحيت من الغيبوبة والأطباء استغربو كتير
بس كانت معجزة من رب العالمين يمكن رحمة فيها
او لحكمة منو عز وجل اعطاها عمر جديدبس خلوها بالمشفى تحت الحراسة
ليحموها من زوجها
وجنينها كان لازم يضل تحت المراقبة ..
هيك لبعد 7 شهور …
كانت هبة ببيتها … وكانت عم تزين غرفة بنتها لان طلع معها بنت مو ولد
وفجأة بيرن باب البيت …
#مال_الشام
#تم_إغلاق_المحضر
-8-
هبة : مييييييين ؟؟؟
فتحت الباب وانا ماسكه تياب بنتي … و لقيت بوشي جهاد
جهاد : مرحبا هية
هبة : انت … انت شو جابك لهون ؟
جهاد : جيت لاعطيكي هاد
ومدلي ايدو وكان في بايدو مغلف اخدتو من ايدو و فتحتو
كان فيه اوراق بس بلشت اقرأهن انصدمت .. هاد كل شي كنت اكتبو بأخر دفتر كان معي
هبة : شو هدول وكيف وصلولك ؟
جهاد : مابعرف في واحد اتصل علي وقلي انو فاعل خير
قلي انو بالقضيه في ادله بتثبت برائتك بس انا ما اتطلعت عليها وانو رح يسلمني نسخه عنهن
لان ما بقدر يسلمني الدليل نفسو … تركلي ياه قدام باب البيت من اسبوع
وقرأت كل حرف فيه
صار وشي احمر وحسيت دموعي رح ينزلو … وتزكرت انو انا هلا مو هيك
انا هلا ام انا هلا ثقتي بحالي عاليه
هبة : طيب والمطلوب ؟
جهاد : و لا شي بس جيت رجعلك الأمانة …
هبة : ايه شكراً الله معك ..
بدي سكر الباب حط ايدو ع الباب وقلي لحظة
هبة : تفضل
جهاد : رح يجينا بنت ؟
هبة : يجينااااا ؟؟؟؟؟؟؟؟؟؟ لا رح يجيني انا بنت
ورح ربيها انا
ورح اتعب عليها .. ورح علمها ما تكون جدبه متل امها
رح علمها انو لو ما تجوزت ولو (عنست) متل ما بقول مجتمعنا ما تنذل
وما تحسس جوزها انو الو منيه عليها لانو تجوزها وما تركها تعنس
رح علمها انو الله خلق الرجال و الست ليكملو بعض
ليحنو على بعض
مو حتى يعزبو بعض ويقللو من كرامة بعض
جهاد : هبة حطي حالك مكاني انا الي صار فيني مو شوي ابدا
هبة : وانا ؟ والي صار فيني ؟
لك انا حطيتك تاج على راسي
وعند اول مطب رميتني بس ع فكرة الحق مو عليك .. الحق على هالمجتمع الزباله
الي بعامل البنت الي ما بتتزوزج كأنها ناقصه
بعاملها بشفقه كأنها معلوله او عايبه
الحق علي الي راح كل عمري وما عرفت ولا فهمت الحياه صح
جهاد : طولي بالك … خلينا نعطي بعض فرصه لتطيب جروحنا !
هبة : انا ما عندي جرح .. انا جرحي طاب
انا من هون ورايح رح عيش وانبسط ومارس هواياتي
و رح كبر شغلي وانجح و انبسط واعمل صداقات
رح اقرأ واتعلم وبدي كفي دراستي وبدي ادرس حقوق
مشان وقت واحد همجي يظلم مرتو ويحط بشرفها ما يجي القانون و يغلق المحضر
تحت اسم قضية شرف
جهاد : يعني خلص لهل درجة كرهتيني ؟
هبة : لا ابدا ، انت ابو بنتي وبحترمك و اهلال وسهلا فيك لتشوف بنتك
بنتك الي كنت رح تقتلها
فيك تشوفها متى ما بدك ماشي ؟
جهاد : طيب خلينا نصلح علاقتنا مشان بنتنا على الأقل
هبة : مستحيييييييل ، انا الله كتبلي عمر جديد
ولو ضللي بهل حياة يوم واحد رح عيشو صح
رح عيشو بمرو وبحلو
انا رح انتقل من البيت … بدي انتقل ع مدينه تانيه و رح بيع المشغل وافتح مكتب تصميم ازياء محترم
رح ابعتلك عنواني وبس اولد بخبرك لتشوف بنتك ..
وهلأ الله معك
نزل راسو وراح … سكرت الباب وقفلتو
وحطيت ايدي ع بطني ونزلت دمعتي وقلت : بوعدك يا ماما احميكي
بوعدك دير بالي عليكي من كل شي
وخليكي قوية مو متل امك
بوعدك ما اسمح لحدا يلعب بمشاعرك او يزعلك … بوعدك يا امي
حالياً بعد سنه تماماً شغلي ناجح بطريقة فظيعه صار الي اسم
ومكانه والي ماركة مسجلة بالسوق باسم ملابسي الي بصممهن
اسم الماركة (غالية) على اسم بنوتي الله يحميها
#تمت