جوانا خارج المقبرة بقلم مال الشام الجزء الأول

الجزء الاول

كانت واقفة على الشباك .. عم تطلع لبعيد .. و ايديها عم يرجفو

و فجأة حدا حط ايدو على كتفها ..

ميس : ميييييييييييييييييييييين

جابر : هاد انا انا شبك

صحيت بنتها الصغيرة تهاني .. وصارت تبكي

ركضت ميس وضمت بنتها وصارت تغنيلها و تهدهدلها ..

جابر : ميس .. وين كنتي عم تطلعي ؟ وليش هيك خفتي ؟

ميس : انا ؟ لا بس كنت عم اتطلع لهنيك .. على المقبرة ..

جابر: شبها؟

ميس: شفت وحده فاتت لهنيك

جابر: عم تتوهمي…

ميس: ايه عالاغلب هيك، بس بتخوف هالمقبرة مو؟

نام جابر عالتخت وتغطى : لا ما بتخوف .. هي مقبرة قديمة من زمان سكروها ما فيها شي بخوف..

ميس: ليش سكروها؟ ..

جابر: بيقولو صار فيا جريمة القتل

ميس: شووووو!!! اول مرة بتقلي هالحكي!!

طفى جابر الضو : ايه ما سبق و سالتي .. النا اربع سنين عايشين هون لشو هالاسئلة هلا… تصبحي على خير

سكتت ميس .. و رجعت وقفت عالشباك وهي حاملة بنتها وعم تغنيلها

ميس : اجى الهوى خلى النجم يعمل الك سنسال

عيونك بدر مجرى نهر لف الخصر خلخال

تع يا نسيم خلي الشجر يغطي عليها بالشال

نام القمر و بنتي غفيت وبلش حلم ينقال

نامت تهاني حطتها بتختها .. وراحت تشق على بنتها التانية يارا الي عمرها ست سنين .. فتحت باب غرفتها وضوت الضو

وما لقتها بتختها

ميس : يارا .. ماما يارا وينك ..

ارتعبت وصارت تعلي صوتها : يارا .. يارا وييييييييييييينك

يارا : ماما . .

ميس سمعت صوتا بس ما عرفت وينا .. خافت وصارت تلتفت حواليها والبها يدئ بسرعه

ميس : حبيبتي وينك ؟

يارا : ماما ..

قربت ميس من التخت ..

ميس: انتي وين ؟

و حدا مد ايدو من تحت التخت ومسك رجل ميس

ارتعبت ميس و داست عالايد الي مسكتها وصرررخت

وطلع صوت بكي يارا من تحت التخت

ميس: يارا هي انتي ؟ يبعتلي حمى

نزلت ميس تحت التخت .. وهي عم ترجف

ميس : يارا

يارا بصوت طفولي بعيد : ماما

رفعت ميس شرشف التخت وكان مبين انو في حدا بالزاوية بس مو مبين من العتمه وشو

مدت ميس ايدها : تعي ماما اطلعي من هون

الجزء الثاني

نزلت ميس تحت التخت .. وهي عم ترجف

ميس : يارا

يارا بصوت طفولي بعيد : ماما

رفعت ميس شرشف التخت وكان مبين انو في حدا بالزاوية بس مو مبين من العتمه وشو

مدت ميس ايدها : تعي ماما اطلعي من هون

و حست ايد مسكت ايدها .. بس ما كانت ايد طفلة بنوب .. كانت ايد شخص كبير

والو أظافر طويلة .. صارت ميس ترجف وهي عم تحس بهي الأيد ماسكه ايدها .. و الايد عم تمسكها بقوة اكتر وتقرب منها اكتر

كانت الأيد باردة كتييييييييير .. و كبيرة كتييييييييييير ..

ميس كانت انفاسها عم تتسارع : يارا ماما هي انتي ؟

و فجأة سحبتها هي الأيد لجوا بقوة كبيررررررررررة

ميس : يااااارااااااااااا…. ميييييين في هوووووون اتررررركني اتركنيييييي

كانت يارا واقفة ورا امها .. دقرتها على كتفها وهي حاملة دبدوبها وعم تفرك عيونها

يارا: ماما ..

و بلحظة الأيد الي كانت ماسكة ايد ميس تركتها و اختفت

التفتت ميس و هي عم تتصبب عرق وشافت يارا وراها

يارا : شو في ؟

ميس : وين كنتي ؟

يارا : انا كنت بالمطبخ .. كنت جوعانه

بعدت ميس عن التخت وهي عم تزحف .. و يارا طلعت عالتخت وتغطت ونامت

ميس : يارا قومي تعي نامي عندنا بالغرفة

ما ردت عليها بنتها

صرخت ميس بصوت عالي

ميس : يارا التلك قوووووووومي

صحيت يارا واتطلعت على امها بطريقة غريبة .. كانو نظراتها برعبو وكلهن غضب

يارا : انا رح نام

ميس رجعت لورا وهي خايفه كتير

و طلعت من الغرفة وركضت لعند جوزها جابر

ميس : جابر قوم … جابر قووووووووووووم

جابر : شو في ؟

ميس : يارا … يارا

جابر قام من تختو فوراً : شبها يارا ؟

ما قدرت تحكي شي ميس ..

ركض جابر على غرفة بنتو و بعد شوي رجع وهو حاملها .. كانت حاطة راسها على كتفو ونايمة

جابر : عليها سخونة

ميس : لقيتها نايمة ؟

جابر : ايه كانت نايمة وما عم ترضى تصحى .. ناخدها عالمستشفى ؟

ميس : ايه

جابر : خلص انتي خليكي عند تهاني وانا رح اخدها

ميس فوراً حملت بنتها تهاني وقالتلو لا لا رح نروح كلنا

طلعو بنصاص الليالي و وصلو على مستوصف القرية

اعطو يارا ادوية وحاولو ينزلو حرارتها

بلشت تفتح عيونا وشافت الكل حواليها

ركضت ميس لعندا وهي عم تبكي

ميس : حبيبتي

يارا : وين نحنا ؟

جابر : خوفتينا عليكي يا زعرة

وبس تطمنو عليها كان بلش يشعشع الضو .. اخدوها ورجعو عالبيت .. بعد ساعات طلع جابر على شغلو

وكان ميس عم ترضع تهاني وتلاعبها

وتركت يارا تنام وترتاح وكانت تتفقد حرارتها كل شوي

بعدين تعبت ميس كتيرررر .. وحست بارهاق ونعس

سكرت ابواب البيت منيح .. وحطت تهاني بتختها وهي تمدت لتغفى شوي .. نامت ميس

و ما عاد حست على شي من التعب ..

صحيت بعد ساعات .. كان صار الظهر وبعد شوي رح يوصل جابر وهي لسه ما حضرت الغدا

ميس : اااخ يا راسي رح ينفجر

رفعت ميس راسها ولقت يارا واقفة عند الباب وعم تطلع عليها نفس نظرات امبارح ..

الجزء الثالث

رفعت ميس راسها ولقت يارا واقفة عند الباب وعم تطلع عليها نفس نظرات امبارح ..

ميس : شبك يا عمري ؟

يارا : جوانا ..

ميس : مافهمت ؟

يارا : جوانا عم تتعذب .. جوانا لازم تعيش

ميس : يارا شو عم تحكي ..

بلشت ميس تحس بشوية خوف .. و قامت من التخت لعند بنتها و قربت منها كتير

صارت يارا تبكي ..

ميس : امي انتي تعبانه ؟

يارا : جوانا تعبانه

ميس ضمتها بقووووة و هي عم تحاول تبعد عنا و ما تركتا…

وقعت يارا بين ايديها و كانو خدودها حمر كتير لأن حرارتها رجعت ارتفعت

حملتها ميس وحطتها عالتخت وهي خايفه كتير .. واتصلت على حماتها لتجي لعندا وتجيب الحكيم

وصارت تحطلها كمادات مي .. اجت حماتها ومعها دكتور .. و لما هو وصل قلها انو ما في اي حرارة على البنت

حرارتها كتير طبيعية .. اعطاها فيتامينات بسيطة ومشي

أم جابر : شبك ميس ليش هيك وشك تعبان ؟

ميس : ما بعرف مرت عمي البي مو مرتاح .. بنتي مو على بعضها

أم جابر : خير ليش شو في ؟

ميس : والله ما كان في شي .. امبارح لأول مره حسيت باحساس كتير غريب

خوف فظيع وقشعر بدني .. السما كانت كتير فيها نجوم وغيوم .. جد احساس ما بنوصف

كلو رهبة .. و جابر لاول مره لخبرني انو المقبرة الي جبنا صار فيها جريمة قتل! تكركبت كتير و وقت شقيت على يارا لقيتا بهي الحالة

أم جابر : أيه حاج بنتي بلا صغرة عقل .. البنت ماخده برد مو اكتر

ميس : طيب شو قصة جريمة القتل هي بدي اعرف…

حاولت حماتها تتهرب كتير بس ما قدرت و اخر شي قررت تحكيلها..

أم جابر : من 10 سنين… انقتلت صبيه… قتلها جوزها

اتهمها انها خاينة و جابها عالمقبرة و قتلها…نحرها على قبر

و دمها ضل للصبح ينزف… و لقو كلاب المقبرة نهشت جسمها

ميس: شوووووووو…. كييييييف هيييييييك كيف

ام جابر دمعو عيونها: كانت صبيه متل الورده حلوة كتير و امها ماتت قهر عليها…

ميس: هاد حيوان لازم يعدمووووه

ام جابر: لا…اعتبرت قضية شرف و دفع كفالة و طلع بعد سبع شهور…

مرق يومين و ميس تفكر بهي البنت… تالت ليله وقت نامت شافت كابوس… كان صدى صوت عم يتردد ( الدم طاهر… و دمي نجس… و الاسود و الابيض ما بيلتقو… الدم طاهر… و دمي نجس… و الابيض و الاسود ما بيلتقو)

صحيت و هي عم ترجف… كانت عرقانه كتير و نفسها عم يديئ

شربت مي وصارت تهدي حالها ..

سمعت صوت حركة بالبيت .. قامت لتشوف شو في وهي ماشية وعم تسمع صوت دعسات حدا وراها

تطلعت وراها وما كان في حدا ابداً

ميس : يارا ؟ هي انتي امي ؟

راحت على غرفة يارا ولقتها نايمة .. بس كان في شي غريب كتير !! ان في اثار طين جنب تخت يارا

قربت ميس و صحت بنتها

ميس : يارا قومي

قامت يارا و عيونها مو قادرة تفتحهن : شو بدك انا هلأ نمت

ميس : كيف هلأ نمتي انا تركتك بتختك من الساعه تسعه؟

يارا : خلص بدي نام اتركيني ..

ورجعت يارا نامت ..

نزلت ميس عالأرض ولمست الطين بايدها .. كان جديد ومبلول .. هي اثار جديده ! ..

حملت بنتها واخدتها على غرفتها .. وحطتها عالتخت جنب جابر

وراحت عالمطبخ لتجيب مي

فاتت عالمطبخ وكان الجو برا هوا قوي .. تطلعت من الشباك عالمقبرة .. وفات على قلبها الخوف مره تانيه

قبور كتيرة .. ليش قتل البنت ؟ وشو يعني الحلم الي شفتو .. شو يعني دمها طاهر ودمي نجس !

فجأة وهي عم تراقب لمع ضو من المقبرة من بعيد ..!! رجعت ميس لورا وبلعت ريقها وهي خايفه

ميس : ولي مين هلأ رايح عالمقبرة !

خافت وطلعت من المطبخ بسرعه و اول ما طلعت انصدمت !! باب بيتها مفتوووح !!

الجزء الرابع

كيف وهي بتقفلو بالمفتاح و بتسكرو بالسقاط !!

للحظة حست رجليها ما عاد حملوها .. كان بدها تصرخ على جابر بس ما طلع صوتها بنوب

ميس استجمعت قوتها بصعوبة : مين في هون ؟

– – – – –

مشت وجسمها كلو عم يرجف .. و صلت لعند الباب .. كانت بدها تسكرو بس حدا دفشها لوراااا

من قوة الشخص الي دفشها رجعت لورا وضرب ظهرها بحفة الطاولة الي بالصالون ..

ميس : اااااااااااااااااااااااااخخخخخخخخخخخ .. ضهري .. ضهري .. اااخ .. جابر ..

جاااااااااااااااابرررررررررررررررررررررررررررررررررر

وغابت عن الوعي وما عاد حست على شي ..

فتحت عيونها تاني نهار الصبح بتختها .. وام جابر كانت حامله الصغيرة تهاني ..

ميس : مرت عمي

ام جابر : ها .. هي ماما صحيت .. تعي تيته تعي

حطت البنت بحضن ميس وقالتلها ارضعيها البنت جوعانه

حاولت ميس ترضعها بس ماكان في حليب ابداً .. من الرعبه حليبها نشف ..

ام جابر : رح اعمللها حليب ..

قامت ميس و لحقتها عالمطبخ ..

مال_الشام

ميس : شو صار؟

ام جابر وهي معصبه : ما بعرف .. جابر دقلي الصبح وقلي اجي عالبيت لانك تعبانه وهو لازم يطلع على شغلو

ميس حطت ايدها على ضهرها : حاسة ضهري انكسر

ام جابر التفتت على ميس وعيونها كلهن شر : انتي شو مقومك بالليل من غرفتك ؟ و وين كنتي طالعه ؟

ميس : طاااااالعه ؟ ما كنت طالعه والله

ام جابر : امبلى .. جابر لقاكي فاتحه باب البيت .. بس شكلك وقعتي قبل ما تطلعي من البيت .. اعترفي يلا

ميس : مرت عمي لك وين بدي روح بهيك وقت شبك !!

ام جابر : ضلك جيبيلنا الهم والمصايب.. ما بكفي هالمصيبتين الي جبتيهن ؟

ميس : شوووووووو .. هلا انا بناتي مصايب ؟

ام جابر : ايه ايه مصايب .. البنت فضيحة ومصيبه .. مسكين ابني ما رح يجيه صبي يوقف جني ويسند كبرتو

ميس انزعجت كتير .. هاد الحديث الي بينفتح بشكل يومي .. ملت منو و حفظتو .. بتعرف انو جابر واهلو بدهن ولد

وكل ما كانت تخلف ويشوفو خلفتها بنت يقاطعوها وينزعو فرحتها …

راحت عالغرفة لعند بناتها .. ولقت يارا قاعده وعم تلعب بسيارة صغيرة

ميس : كيفها بنتي الحلوة ؟

يارا : منيحه

ميس : ارتحتي بالنومه ؟

يارا : ممممم

حطت ميس ايدها على ضهرها : اااخ لازم شوف دكتور

يارا تطلعت بامها بطرف عينها : هيك بصير مع الي بزعل جوانا ..

ميس : جوانا ! ما فهمت

يارا ضلت تلعب بسيارتها وما ردت

ميس سحبت السيارة منها و صرخت عليها : عم بحكي معك ردي .. مين جوانا .. ؟؟

قامت يارا من مكانها : اعطيني السيارة

ميس : ما في سيارة لتحكي معي بأدب

يارا : ماما اعطيني السيارة ما بدي خلي جوانا تئذيكي

رجفت ميس و وقعت السيارة من ايدها

يارا : هههه خلص لا تخافي .. ما رح نموتك ..

واخدت يارا السيارة وطلعت من الغرفة ..

لحقتها ميس شوي شوي و صارت تراقبها من بعيد .. لقتها قاعده وعم تلعب بالسيارة بالصالون و تضحك ..

المسا رجع جابر عالبيت وامو راحت .. وسالتو ميس شو صار وقلها انو سمع صوتها عم تصرخ ولقاها بالأرض والباب مفتوح

ميس : جابر انا لازم احكيلك كل شي .. انا امبارح بالليل شفت ضو بالمقبرة .. والي كان بالمقبرة اجا على بيتنا وهو الي فتح الباب

جابر : انا ما رح اسالك وين كنتي رايحه .. ما في داعي تألفي هيك حكي ..

ميس : شووووووووو

جابر : ايه ميس .. انا رح اخد الموضوع بحسن نية ..بس اوعي يتكرر

وفات على غرفتو وترك ميس قاعده مع البنات بالصالة

كانت يارا لسه عم تلعب بالسيارة و عم تقول ( بووووف … بوووووف … بيييييييييييييب بوووف ) عصبت ميس و وجعها راسها

ميس : يارا خلص اتركي هالبطيخه

يارا ما ردت وضلت تلعب وتطلع صوت

قامت ميس و رمت السيارة بالحيط وكسرتها ..

ميس : لما احكي معك بتردي فهمانة ؟

نزلت دمعتها ليارا وصارت تبكي ..

ميس : روحي على غرفتك الي فيني مكفيني

يارا : الدم النجس .. رح يحاسبك

وركضت على غرفتها وميس نشف الدم بعروقها و وقعت بالأرض ..

ميس : الدم النجس ؟ .. الدم النجس .. بنتي ..يارا

وركضت ورا يارا على غرفتها لقتها نامت .. ضلت تصحيها ما قامت من تختها بنوب ولا رضيت تصحى

ميس : خلص بحكي معا الصبح وبفهم كل شي ..بس ما رح ارتكها تنام لحالها .. مستحيل

راحت جابت تهاني وفرشت عالأرض ونيمت تهاني جنبها

وغطت يارا ونامت ..

وهي نايمة بلشت تحس ببرد .. حست رجليها باردين كتيييييييييير ..

صارت تشد الغطا لتزبطو ما كانت تلاقي غطا

ميس : اووووووووووف على هالشغله

فتحت عيونها وما لقت غطا ..

ميس : اليوم الجو رد .. بتكون تهاني بردت رح اخدها حطها بتختها

التفتت جنبها ما لقت بنتها !!

حطت ايدها على قلبها : وين بنتي ؟!

التفتت على يارا لقتها نايمة

ميس: يمكن جابر اجا اخدها

قامت فوراً من مكانها واول ما طلعت من الغرفة سمعت صوت

كان صوت وحده عم تغني …

كانت عم تسمع صوت .. اغاني . .. كلماتي غريبه بس ما فهمت منيح

حاولت تلحق الصوت …. وكل ما تمشي اكتر الصوت يقرب اكتر

بلشت تفهم شوي من الكلمات ..

/// اجا الهوى حلى النجم يعمل الك سلسال

عيونك بدر مجرى نهر لف الخصر خلخال //

هي الأغنية الي كانت تغنيها لبنتها !!

كانت الكارثة لما لحقت الصوت وعرفت وينو .. كانت الصوت طالع من الحمام

الصوت كان كتير مخييييييف .. بقشعر البدن ..

باب الحمام كان مردود رد ..

حطت ميس ايدها عالباب .. و فتحتو شوي .. وتطلعت من الزاوبة تبع الباب

يتبعع