اطيب طريقة الصامولي من تحت دياتي
اطيب طريقة الصامولي من تحت دياتي
المقادير
- كاسة ونص حليب دافي
- معلقتين كبار سكر
- معلقتين كبار خميرة
- نص معلقة صغيرة ملح
- معلقة صغير خل
- بياض بيضة والصفار لدهن الوجه
- معلقتين زيت ذرة
- اربع الى خمس كاسات طحين
الخطوات
كيفكن ياوردات اشتقتلكن كتتتتيررررر
جيتكن اليوم بهالوصفة وانشالله رح تعجبكن وتنال اعجابكن لأنو عنجد وصفة ولاألذ حتى اطيب من الجاهز بتمنى تجربوا وتعطوني رئيكن يلا نبلش يا الماساتي
بسم الله الرحمن الرحيم
اول شي حطيت السكر والخميرة والزيت والحليب وخفقتن لدابت الخميرة
تاني شي نزلت عليهن بياض البيض ماتاكلو هم مالو طعمة ابدن وضفت الخل والملح وخفقت لختفى بياض البيض
تالت شي نزلت عليهن الطحين انا اخدت معي تقريبآ خمس كاسات وبيجوز تحتاج اكتر او اقل حسب نوع الطحين بتعرفو
عجنتا لصارت طرية ونغنوشة متلكن تركتا ترتاح ساعة
بعد ماارتاحت قطعتن لا١٦ قطعة وصرت مدن شكل مستطيل ولفن متل بيتزا رول بتتزكرو بعد ماخلصت كل القطع حطيتن بصينية الفرن وعفتن يرتاحو نص ساعة او لتشوفو تضاعف حجمن دهنت وجه الامورات بصفار البيض ضفتلو حليب ودهنتن وعالفرن الفرن لازم يكون حاااااامي مابياخدو وقت يادوب عشر دقايق منطالعن بنغطين بقماشة او بكيس نايلو منتركن عشر دقايق وبعدين بدكن تحشوهن اي شي انا حشيتن جبنة ومربى وتعملو جنبن كاسة شاي بس لاتنسونو تعزموني هههه بدكن تعيفون بكيس نايلو لوقت تستعملو وازا بدكن بتحسنو تحطون بالفريزة تفرزون وكل مابدكن بتطالعون بالفرن دقيقتين بيرجعو كأنو هلق عاملينن انا عملن من نفس العجينة خبز الهمبرغر طلعو ولااروع انشالله تجربوا وتعجبكن
وان شالله الف صحة وعوافي حبيباتي
