جبنة دهن بيضاء و صفراء

المقادير

• 5 كوب حليب طازج يفضل غنم
• ربع كوب خل ابيض
• ملح
• جبنة للتنكيه شيدر او مثلثات

الخطوات

الجبنة الدهن

السلام عليكم ورحمة الله وبركاته

تكررت طلبات الصبايا للجبنة الكريمية وحبيت اعملها بنوعيها البيضا والصفرا لانهم تابعين لبعض وسهلين كثير للحلو والمالح خلينا نشوف الطريقة

أولاً/ تجبين الحليب (القريشة)

قبل ما أبدأ بالطريقة لازم أنوّه انه الاصل تنعمل من حليب طازج طبيعي لأفضل نتيجة واطيب طعم ، واذا ماتوفر استخدمي حليب الباكيتات طويل الأمد لازم كاااااااااامل الدسم ، وفي حال ماتوفر اعمليه بالحليب البودرة بس مارح يكون بنفس جودة الطازج.

—بنسخن الحليب لحرارة عاليه بس قبل الغليان مابدنا يغلي اذا عندك ميزان حرارة بتكون حرارته 75—80

واذا ماعندك بس تصير تطلع رغاوي وفقاعات صغيرة من الجوانب بتحسي انه بلش بده بعد شوي يغلي.

—بتصبي عليه ربع كوب خل ابيض وبتخليه عالغاز دقيقة مع التحريك على اهدا حرارة لحتى يفصل .

—ممكن تتركيه مغطى خمس دقائق لحتى يفصل بالكامل.

ملاحظة مهمة/

اذا غلي معك بالغلط اتركيه لحتى يبلش يبرد شوي يعني مثلا عشر دقائق وضيفي الخل بتكون حرارته نزلت.

ثانياً/ الجبنة البيضا الكريميه (ماسكربوني)

بنصفي الجبنة عن الشرش وبنخلي معها شوي منه عشان القوام يطلع كريمي وبنطحنها بالمحضرة مع ملح للموالح وبدون ملح للحلويات.

—لحتى تنعم تماما فرغيها بمرتبان او وعاء واتركيها بالثلاجة تبرد. وهيك بتكون جاهزة للاكل قوامها ممتاز كريمية وبتغني عن جبنة فيلادلفيا للتشيز كيك او لحشوات الكيكات او للساندويشات .

ثالثاً/ الجبنة الدهن الصفراء

ممكن من الجبنة الدهن البيضا او من نفس الأساس بتنعمل من الجبنة اللي صفيناها من الشرش بنضيفلها ملح وبنضيفلها كمية من الجبنة الشيدر او المثلثات بعد مانذوبها بالميكرويف او حمام مائي وبنضيفهم لبعض وبنطحن . وهيك الجبنة الصفرا الدهن جاهزة بالنكهه اللي بدك ياها.

—لنكهة الشيدر ضيفي جبنة شيدر

—لنكهة المثلثات ضيفي جبنة مثلثات

—لنكهة الكيري بتضيفي كيري او مثلثات مع علبة قشطة.

—لنكهة القشقوان بتضيفي قشقوان

—وهكذا

* الكمية المضافة من نوع جبنة التنكيه حسب رغبتك قديش بدكياها قوية مثلا لكمية الجبنة اللي عنا بالوصفة ممكن 4—5 مثلثات جبنة بكفيها او بتذوقي وبتتحكمي.

—انا عملت كمية قليلة من الصفرا عشان بس اصور الوصفة .