طريقة تفريز البطاطا والجزر مع طريقة ختم الأكياس بدون ماكينة

المقادير

• جزر طازج
• بطاطا
• ماء
• سكر
• أكياس تفريز

الخطوات

السلام عليكم ورحمة الله وبركاته

اليوم رح احكي عن البطاطا والجزر وتفريزهم لإنه استخداماتهم كثيرة وهيه متوفره بالاسواق بكثرة في هذا الوقت ليش ما نستغلهم ونفرز منهم ، حتى لو انه موجود طازج طوال السنة بس لما يكون مقطع نظيف جاهز للطبخ مباشرة غير .

وطريقة البطاطا هاي هيه طريقة بطاطا المطاعم المقرمشة من برا وطرية من جوا وطعمها روووووعة.

أولاً/ الجزر

بتقطعي جزر حسب الكمية اللي بدك ياها والفرمة اللي بتحتاجيها اما اصابع او دوائر او مكعبات او فرمة ناعمة وكل شكل طبعا لحال.

—غلوة الجزر

بدنا نكون مجهزين ماء فيها ملعقة سكر (السكر بحافظ على لون الخضار) عالغاز وبس تغلي بنزل فيها الجزر رح تهدا الغلوة طبعا بنستنى لحتى يرجع يغلي ويقلب عالجزر المي يعني غلوة قوية وبنشيل الجزر منها بمصفى فورا على جاط فيه ماء بارد .

—بنرفعه من الماء البارد على مصافي عشان ينشف ويبرد.

—التفريز

بعد تصفية الجزر بنعبيه بأكياس تفريز حسب حجم الطبخة لا تعبي كمية كبيرة بكيس كبير لا فقط على قد طبخة وحدة.

—يفضل انه تختمي الاكياس ختم مش ربط عشان مايدخلها هوا ابدا وتضل محافظة على لونها الحلو.

ثانياً/ البطاطا

—بنقطع البطاطا اصابع متوسطة وبالكمية اللي بدنا ياها

وبنغسلها من النشا عدة مرات.

—بنشفها مزبوط مزبوط ولا تخلي نقطة مي فيها.

—بنقليها بزيت ساخن بس نص قليه ماتاخد لون ابدا.

—بنطلعها على صينية بدون مناديل مطبخ بدناياه الزيت لانه بمنعها تلزق ببعض.

—بس تبرد بندخلها عالفريزر بصينيتها تجمد. وبعد ماتجمد بنوزعها على اكياس التفريز الكمية حسب الاستخدام.

—الاستخدام

عشان تستخدميها من الفريزر عالزيت الساخن مباشرة لا تذوبيها ابدا واستمتعي بأطيب بطاطا زي المطاعم وأحسن كمان.

*بس ملاحظة هون عشان اذا بتحبيها كثير تطلع مقرمشة لازم ترفّعي التقطيعة تاعة الاصابع إذا سميكة مابتتقرمش كويس. انا خليتها وسط زي مابحبوها اولادي.

*ممكن تشويها بالفرن بدل القلي بتفرديها بصينية وعالفرن لحتى تتقرمش على حرارة متوسطة.

ثالثاً/ طريقة ختم الأكياس بدون ماكنة

مش ضروري يكون جهاز ختم عندك عشان تختمي الأكياس في 3 طرق لختم الاكياس بأدوات من البيت رح اوضحها

1. بالمكوى بتسخنيها وبتحطي قطعة قصدير على باب كيس التفريز وبتكوي عالقصدير ثواني وبكون انختم.

2. بالستريتر او البيبي ليس وأظن مافي بيت مافيه واحد وبنفس طريقة المكوى بنعمل ، بس هوه اخف من المكوى واسهل.

3. بسكين تكون طويلة بتحميها على عين الغاز وبتحزي فيها على باب كيس التفريز على قصديرة كمان ، وهاي طريقة مثالية بيطلع الختم زي الجهاز.

وأخيراً/

يارب يكون اكبر عدد استفاد من هالوصفة البسيطة وطريقة ختم الاكياس وربي يبلغنا رمضان واحنا في احسن حال وأهدأ بال يارب.