زوجة اب

حبيت اشاركم قصتي وتجربتي بالحياة وكتير امور كانت من المسلمات يعني (الثوابت) يلي مستحيل انو تتغير لكن مع التجربة اتغيرت

كنت دايما اسمع واقرأ عن زوجة الاب وطغيانها وجبروتها

والاضطهاد الي كانت بتمارسو على اولاد زوجها لاسيما ازا كانو ايتام او امهم مطلقة

بالبداية انا حبيت شخص يلي هو زوجي حاليا

كنت لسة مخلصتش توجيهي .وهو بفرق عني ١٤ سنة بس الي بشوفو بقول انا اكبر يئبرني

هو كان متزوج .وعندو تلات .بس للامانة ما كان مرتاح وحياتو مشاكل وهو اتزوج كرمال الشكل الاجتماعي مش اكتر وزواجو كان لمصلحة لانو هي اكبر منو واهلها ساعدو ليتزوجها بحكم شغلو عندهم مشاكلو كانت معها كتيرة ومعقدة .والي عقدها اكتر الاولاد وانو هي كانت تهددو بتاخدهم منو وبتروح واهلها واصلين .فكان حاط ملح وساكت .ليوم اتعرف ع اخوي معو بالشغل .واتصاحبو وانعزم عنا عالبيت .ما كان بيعرف انو في عندهم بنات

صدفة كان راكب بالسيارة وهو جاي عنا كان جارنا راكب حدو .حكي جاب حكي قال انو بنتو توجيهي وبتدرس معي .المهم فتح مع اخوي القصة بس انا ما بعرف ولسة ما شافني .اخوي عارض ورفض لانو متزوج .وابوي وامي رفضو .هلا صار عنا بالحارة عرس لبنت جيرانا واخوي استأجر سيارة ع اسمو لزوجي لانو اخوي معوش رخصة المهم اجو بالسيارة ووقفو باب البيت طلعت انا وامي ومرت اخوي نركب ع اساس عرس وهيكا اول مرة بشوفني فيها واقسم بالله كان رح يعمل حادث وهو بسوق انا ما اعطيت انتباه كتير هو صح بجنن وحلو بس ليش الكزب كنت شايفة حالي وحاط ليمونة تحت تمي

المهم ما شال عينو من المرا وانا مش مركزة

بس امي حست عليه

المهم ما بدي اطول .حكا معي عن الفيس وحلفني ما احكي لاخوي وامي بتعرف بالبداية حلو الشعور بالاهتمام والحب وانك تنحبي وتحسي حالك مرغوبة بس كان هالشي غلط بحكم التربية والعادات لهيك امي حكتلو ازا ابوها واخوها عرفو بصيرش طيب هيك غلك حكيك معها لازم تتحرك وتعمل اشي جدي

هو طبعا ما كزب طلبني اكتر من مرة من اهلي وابوي واخوي رفضو .وكل يوم كنت احبو اكتر واتعلق فيه حسيت فيه جانب بشخصيتو غامض وهالشي شدني اكتر

المهم عرفو اهلو ومرتو وصارت قصة كبيرة ومشكلة وعلى اثرهااخوي اعتذر لاهلو لانهم فكرو انو هو الي طمعو وعبا راسوو .عالزواج .وانو شخص متزوج وعندو مرتو ليش بدكم تزوجو .المهم اهلي سكرو القصة وما عاد ييجي عنا بالمرة

بس انا كنت احكي معو بالخفية وكنت لما اروح ع مركز التقوية للتوجيهي اشوفو دايما

بس الظروف كانت اقوى من الكل وحكالي انو بدو ينسى قصتنا ويكمل حياتو هاد نصيب وما في مجال نكمل بعلاقنا ومرتو هددتو

بس انا كان املي وعشمي فيه اكبر ورفضت

حكيتلو انت مش رجل وهيك عملت فيه خليتني احبك واتعلق فيك وبدك تروح بس ما في نتيجة .

هو كان مجبور فش قدامو حل الكل ضدو

ووضعو المادي ما كان بسمحلو يتجوز ويفتح بيتين

المهم فركشنا .وانا نجحت بدراستي ودخلت جامعة وبلشت مرحلة جديدة من حياتي واللتفتت ع مستقبلي ونسيتو او اتناسيتو .بس كنت مضطرة .بصراحة جامعتي نستني كل شي وفكرة الزواج شلتها من راسي واتخصصت .بالتخصص الي بحبو .كان دووم بسأل عني وبتابع اخباري بس انا كنت اطنش والحياة بدها تستمر

ليوم ما بنساه من عمري هداك النهار ٢_١١_٢٠١٤

اجا خبر موت زوجتو ام اولادو بحادث

بصراحة انصعقت ورب الكعبة زعلت حرام ولادها شو رح يصير فيهم

من هون بلشت قصتي مرتو ارتحمت وهو صار بدو يتزوج

واول ما فتحو الموضوع اهلو عن جيزتو

حكالهم فلانة بنت فلان

حماتي رفضت قالت هاي صارت بتدرس وغير شكل انساها بتوخدكش هسة وعندك ٣

وشوفو سبحان الله انا اشاء وانت تشاء لكن الله يفعل ما يشاء كان محكي في وقارية فاتحة والله ورح يتحدد موعد كتب كتابي ع شخص لكن مشيئة القدر حالت بيني وبين هالانسان هو كان وحيد اهلو ويتيم الاب وعمامو بدهم يجوزو من بناتهم مش غريبة لهيك قبل كتب كتابي بيومين اتصلت اختو واعتذرت

عادي شو يعني خربت الدنيا عريس وراح .بدي اكمل دراستي والايام مخبيتلي نصيبي بس ما كنت بعرف انو زوجي الحالي نصيبي

بتفاجأ بسيارة سودا .بتوقف باب الدار بنزل منها هو ورجل كبير وصاحبو

قعدو مع اهلي وطلبوني .اخوي بصراحة وافق وامي .ما صدقت عشان افك عقدة النحس بس استنو شوي

هالزلمة ارمل صار وعندو ٣ اولاد .شو رح يصير بحياتي معو

بنساش نظرتو لما اجا يطلبني وحكالي اخوي هاتي قهوة وتعالي يحرام كسر خاطري وحسيت بعيونو زعل وحزن مش طبيعي وانو بحاجتي اكون حدو

بس انا ؤفضت شو الضرة كانت ارحم من ٣ ولاد

رفضت بس قعدت مع اختي الكبيرة واقنعتني

حكتلي ع اساس حب قديم

حكيت هلا اتغير عندو اولاد

جاوبتني .مهو كنتي قاتلة حالك عليه وهو عندو مرتو وولادو هلا بطل يعجبك

بصراحة كلامها اقنعني .وهدول هلا صارو ايتام بتربيهم والك اجر

جلست مه حالي يومين وعملت مشاورات اهلية مع اهلي وصاحباتي

والكل اقنعني

وصليت استخارة .والنتيجة ريحتني نشكر الله

توكلت على المولى ووافقت

وصار الزواج

وبلش فصل تاني من حياتي

ليش الكذب والله الحياة حلوة الحمد لله ع ريش نعام عايشة زي ما بقولو

دلال وعز وحب والاولاد زي البلسم بحكولي ماما

والحمد لله الله لا يجيب بينا زعل لو احكيلو موت بموت كرمالي

حياتو اتغيرت معي ١٨٠ درجة غير غير اول

بس يجماعة الانسان لما يكون مبسوط ومرضي بحياتو

ليش العالم ما بعجبها

الله ابتلاني بسلفات اللهم عافينا ..الشر بعينو

حسد .غيرة .نميمة .قيل وقال.ملافظ ……

طبعا هو بعدني عن هاي الدائرة وعملت لنفسي مملكة خاصة جوا بيتي

الناس استغربت ليش هديك (الله يرحمها ويسامحها)

ما بحبها متل هاي ..ليش وليش وليش

بس حب زوجي الي ومحبة اولادو الي .كانت اكبر جواب الهم .

والمثل قال عقلك .براسك بتعرف خلاصك

حاولو ..ولهسة بحاولو يوقعو بينا بس عالفاضي

انا وياه اكبر من هيك زوبعات بفنجان

بس اكثر شي مغصني بحياتي هو اتهاماتهم يلي ما بتخلص وكزبهم علي واني بهين الاولاد وبضربهم وحارمهم من العيشة الكريمة

لا حول ولا قوة الا بالله

طنشت طنشت بس مرة كنت نايمة صحيت ع صوت بنتي

نسيت احكيلكم انجبت بيبي حلوة

المهم .صحيت ارضعها

كان عمرها ٣ شهور قمت من التخت ..

لقيت الغرفة ضباب .الباب مسكر

فتحت باب الغرفة والا ما اشوف غير دخان كثيف جاي من غرفتهم

ركضت لقيتها محترقة صرخت صوت صحي جوزي شوفي ….شوفي ..صرخت الغرفة انحرقت

قام بسرعة طلع الاولاد برة والله ستر ما ماتو من صوبا الكهربا

المهم الله حماهم وانقذهم والغلط مني ومنو ليش لاحطلهم صوبا بغرفتهم .مهو حرام برد الجو وبخاف يمرضو

لو ما حطيت صوبا .كان مرضو من البرد .والسبب فش صوبا

هالحادث خلا اهلو يعملوني متل مشروع نقاش ببيوتهم ومالهم غير سيرتي

اتدايقت وزعلت بس طنشتهم كالعادة

والحياة الحمد لله استمرت وانا هسة صار عندي بنتين متل القمر واطفال ربيتهم ع ايدي متل البلسم

وزوج ولا اروع والحمد لله

بالنهاية .سعادتك بايدك بتعمليها وبوعيك وبعقلك وحكمتك .مش بالصراخ والعياط .ومش كل زوجة اب صارت مش منيحة .الي بخاف الله لا تخاف منو خاف عليه

وهيك انا والحمد لله والرجل رجل عزابي او متزوج نفس الطبقة بس الشطارة عالمرأة .كيف بتقدر تعرف مفاتيحو

وتفهموو

شكرا الكم هاي ملخص لحياتي .واتمنى تعجبكم قصتي

واي سؤال بالتعليقات رح اجاوبو