خبز البيدا التركي لا يقاوم سلسلة الوصفات التركية 16
خبز البيدا التركي لا يقاوم سلسلة الوصفات التركية 16
خبز البيدا التركي لا يقاوم سلسلة الوصفات التركية 16
المقادير
- للعجينة بدنا:
- ملعقتين كبار سكر
- ملعقة كبيرة خميرة فورية
- كوب ماء دافئ
- ثلاث أرباع كوب حليب دافئ
- ملعقة كبيرة ونصف لبن
- ثلث كوب زيت
- نصف ملعقة كبيرة بيكينغ باودر
- نصف ملعقة كبيرة ملح
- حوالي 4 كوب طحين (حسب الحاجة ونوع الطحين)
- أما للحشوة منحتاج:
- نصف كيلو لحمة
- حبتين بصل وسط
- حبتين بندورة وسط
- حبتين فليفلة خضرا وسط (يمكن صار بدها فنجان قهوة وسط بالمعية)
- ملعقتين كبار دبس رمان او حسب تركيزو
- نصف ملعقة صغيرة دبس فليفلة
- عدة فصوص توم صغيرة او 2 كبار
- ملح
- فلفل أسود
- فليفلة حمرا يابسة
- نصف ملعقة صغيرة من كل من الهيل والقرفة المطحونين وكزبرة يابسة
- بقدونس مفروم ناعم
- فطر شرائح او قشقوان اختياري طبعاً
الخطوات
☆بسم الله الرحمن الرحيم☆
للعجينة
أول شي منحط الماء الدافئ والحليب والسكر والخميرة ومنخلطهم ليدوبو السكر والخميرة منضيف كوب ونصف طحين ومنخلطهم منيح ليمتزجو ومنغطيهم ومنتركهم ربع ساعة ليرتاحو وتتفاعل الخميرة منضيف الزيت واللبن ومنخلطهم ومنرجع نصيف وراهم البيكينغ باودر والملح والطحين بالتدريج لنحصل على عجينة طرية وملمومة على بعضا ومنعجنها حوالي عشر دقايق ومنرجع نغطيها ومنريحها ربع ساعة وبتصير جاهزة للشغل
لا تنسو تعبو الدنيا طحييييييين اي
أما بالنسبة للحشوة منضرب كل شي عالخلاط ماعدا البقدونس ودبس الرمان واللحمة
واللي ماعندا خلاط فرميهم فرم ناااااعم ولا تخلي شي يوقفك يا أمورة
بعد مانفرمهم منصفيهم شوي من المي الزايدة ومنخلطهم مع اللحمة والدبس والبقدونس
هلأ تعالو وحطو عينكم بعيني مين فيكم بتاكل بهالمرحلة ههههههه اعترفو ماتخافو
المهم يا حبوبات صار عنا الحشوة والعجينة جاهزين
وهي الاكلة هون بتنعمل عشكل سفينة كبيييييرة
وبتتقطع بهالشكل ((هو بيني وبينكم أسهل بالشغل))
وفيكم تحطو عالوش اما شرائح فطر او قشقوان او التنين سوا لمحبي الدايت ههههه
مندخلها الفرن لحتى تستوي وتاخد تشقيرة حلوة وياهومالاااالي
وهيك بتكون خلصت حلقتنا قصدي وصفتنا لليوم وبشوفكم بالوصفة الجاية
اذا حبيتوها ضيفوها للمفضلة وجربوها وماتنسو تدعولي بالبركة
وملاحظة اخيرة ولعية لعدويني
((الخبز اللي تحت بالصور بناءً على طلبك أخت عطر وعذريني عالتأخير العجيب اللي صار ولكل وحدة بتركيا حابة تعرف الخبز لوصفات معينة بتلاقوهم بماركت BIM ويارب كون أفدت حدا فيكم))
بحبكم انا يا احلى وردات♡
