رمضان على الأبواب

٢٠ وصية لرمضان بإختصار شديد … ❤

١. لو تخنت في رمضان يبقى انت فاهم الصيام غلط.

٢. لو محتاج حد يصحيك عشان تلحق صلاة الظهر يبقى إنت فاهم رمضان غلط!

٣. لو بتحس بتقل وإنت بتصلي المغرب و العشا والتراويح ومش عارف تتنفس كويس في السجود يبقى إنت فهمت الفطار غلط.

٤. الصيام أحسن فرصة للي بيدخن أو بياخد أي صنف إنه يبطل إن شاء الله. قدرت توقف من الفجر للمغرب… كمل جميلك ووقف للعشا و نام.

٥. لو عارف الممثل الفلاني عمل ايه في التمثلية الفلانية والمهرج فلان عمل مقلب ايه في الممثلة فلانة يبقى إنت فهمت رمضان غلط.

٦. صدقني، البطن مش مخزن… يعني حتى لو كلت كتير قوي في السحور بردو الأكل حيتهضم بعد ٦ ساعات بالكتير. مش حينوبك من السحور التقيل غير العطش و التخمة و التخن.

٧. أحسن سحور أقله ملحاً و سكر عشان العطش. الاكلات العالية في البوتاسيوم بتقلل العطش … زي التمر والموز.

٨. العبرة مش بعدد الختمات … العبرة في القراءة مع الفهم والتطبيق. أما إني أقرأ سورة الأحزاب ٣ مرات و اقوم البس السكيني جينز و انزل يبقى فهمت القرآن غلط. أو أقرأ سورة النور ٤ مرات و بعدها أتفرج على تمثلية فيها رقاصة يبقى فهمت غلط قوي …وقوي كمان. يعني أقرأ سورة الحجرات مرتين واقعد اغتاب في عزومة العيلة …. دونت مكس والله.

٩.ليك كل يوم دعوة لا ترد… ادعوا لدنياكم بس ماتنسوش آخرتكم. ادعوا لنفسكم بس ماتنسوش كمان المسلمين في كل أنحاء الأرض. ❤

١. لبس العيد هو أي لبس جميل عندك أو لسة ملبستهوش … جهزوه من دلوقتي لو حابين عشان مايضعش العشرة الأواخر الله يرضى عليكم.

١١. لو مخاصم حد أو مزعل حد الحق صالحه…

١٢. خلي معاك أجندة أو كراسة تكتب فيها ملاحظاتك من الآيات وعن نفسك واكتب فيها التغيرات اللي عايز تطبقها.

١٣. الفيسبوك و ما يشبهه خصص ليه وقت لا تتعداه… ساعة مثلا في اليوم.

١٤. للي بيطبخوا… بإختصار، أي أكلة حتاخد منك أكتر من ساعة و نص يبقى بلاها. باي باي محشي

١٥. لو بتدفع في عزومة أو خروجة أو سحور مبلغ العائلات البسيطة بتدفعه عشان يجيبوا أكل الشهر … يبقى فهمت رمضان غلط.

١٦. أبواب الخير كتيرة… حاول يكون لك نصيب من كل باب. حفّظ طفل صغير سورة أو حديث، ابعت أكلة حلوة للمكوجي، اسأل على طنط العيانة اللي مبتعرفش تحضر العزومات، ابعد القزازة المتكسرة على الرصيف، روح اشرب شاي مع قريبك الكبير في السن اللي حاسس بالوحدة.

١٧. اشتري و حط عندك في المطبخ من دلوقتي علب وأطباق بلاستيك عشان تعرف توزع أكل بسهولة … اغرف من الأكل وهو سخن و طازة مش لما يبات و يفيض و نفسك تبقى مش رايحة له.

١٨. طبيعتنا اننا بننسى … حط حاجات تفكرك في كل ركن من البيت و من شغلك…. نوتات بتتلزق، سبح، مصاحف على الترابيزات، جدول عمل جنب سريرك تبص عليه كل يوم (زي اللي كنت حطيته ليكم قبل كدة.. ححطه تاني إن شاء الله)

١٩. العبادة رغبة منك و استعداد و عمل + توفيق من ربنا. فادعوا من دلوقتي إن الشهر ده يكون سبب في تغيير حياتك كلها! ❤

٢٠. أخيرًا و ليس آخرًا و دي اهم واحدة:ادعولى