طريقة صب العوامة و سر قرمشة العوامة
طريقة صب العوامة و سر قرمشة العوامة
المقادير
- 2 كوب طحين ابيض
- 3 م.ك سميد ناعم
- نصف كوب نشا
- م.ك خميرة
- م.ك سكر
- نصف كوب زيت ذرة
- 2 م.ك حليب بودرة
- 2 كوب ماء دافئ
- قطر سميك عيار:
- 2 سكر
- 1 ماء
- للقلي:
- زيت
الخطوات
السلام عليكم ورحمة الله وبركاته
الكل بحب العوامة بس للأسف مشاكلها كثيرة اما بتطلع طرية او ناشفة مش شاربة قطر وأكبر مشكلة بتواجه الستات لقيتها انه بتطلع اشكال مش منتظمة ، فاليوم حبيت اقدم طريقة صب العوامة عشان تطلع اشكالها مضبوطة ومتساوية بالحجم ومرتبة بالإضافة لسر من اسرار القرمشة الرائعه يلي بتضل يومين وثلاث مابتتغير.
—الصور نتائج اكثر من مرة وبكل مرة نفس النتيجة ونفس الطعم الرائع
أولاً/العجينة
بنخلط جميع المواد مع بعض عدا المي وبنضيف المي بالتدريج اول كاسة دفعه وحدة وثاني كاسة على دفعتين لانه نوع الطحين بيفرق وبتخلطي بطريقة اللّت يعني زي خفق البيض بالشوكة بس باليد بتخلطي العجينة لحتى تحصلي على عجينة ناعمة طرية لزجة مطاطية .
—وبتتركيها تخمر.
ثانياً/ طريقة الصب مهمة
عشان تطلع بنفس الحجم وشكلها مرتب احسن طريقة جربتها هيه الملعقة المعيارية اصغر حجم ، يعني لو عشان العوامة جيبيهم الملاعق المعيارية متوفرة ورخيصة .
—وللتسهيل عالبنات ممكن تحطي العجينة بكيس حلواني او كيس بلاستيك عادي بتفتحي طرفه شوي .
—وممكن مباشرة بدون كيس المهم عنا الملعقة مش الكيس.
—بتهبّطي العجينة الخمرانة ضروري وبتكوني حاطة الملعقة بصحن فيه زيت وكل حبتين او ثلاث بتغمسيها بالزيت عشان ماتلزق العجينة فيها.
—بتعبي الملعقة المغموسة بالزيت وفورا عالزيت الحامي وبدك تكوني سريعة.
—اذا بدون كيس بتعبي ايد من العجينة وبتضغطيها من بين السبابة والابهام وبتقطعي منها بالملعقة وعالزيت.
ثالثاً/ القلي
بتصبي العجينة بالملعقة وعلى زيت ساخن متوسط مش يكون كثير حار ولا بارد .
—بهاي الوصفة مابتحتاج مرحلتين قلي مرة وحدة بتكفي وبتطلع اروع من الروعة وبتقرش.
ملاحظة/
بس تطوش العوامة على وجه الزيت بدك تضلي تحركي بلطف عشان تاخد تحمير من كل الجهات يكون لون موحد وذهبي رائع.
—لا تزوديها بالقلي يعني لون ذهبي غامق مايكون بني.
رابعاً/ القطر
القطر لازم يكون سميك وباارد كاستين ماء عليهم كاسة سكر وملعقة عصير ليمون وبتحركي لحتى يذوب السكر مع مسح اطراف الطنجرة بفرشة مبلولة عشان مايسكر معك بعدين.
وبعد الغليان بتتركيه 5 دقائق على نار هادية وبس.
—بعد قلي العوامة بتحطيها بمصفى ثواني بس يتصفى الزيت مع انه مابتشرب زيت كثير هيه.
وعالقطر بتتركيها بالقطر خمس دقائق عشان تشرب.
خامساً/ملاحظات وأسرار و عوامل النجاح
1. السميد هوه اول سر من اسرار القرمشة الخطيرة والرائعة، اذا مابتحبيها مقرمشة كثير حطي ملعقتين بدل ثلاث ، بس حطي لا تستغني عنه.
2.القلي بزيت ساخن متوسط ضروري اذا الزيت ساخن كثير بتتحمر بسرعة وبتطلع عجين من جوا واذا بارد او دافي او حتى تحت الوسط بتضل الحبة معبيه زي الخبز بدل ما تفضى زي ماهو المفروض.
3. القلية على مرحلتين ممكنة للناس اللي بحبوها مقرمشة كثير .
4. القطر لازم يكون مزبوط ، اذا خفيف بطري العوامة .
5. بتهبّط العجين قبل القلي احسن ما يفرقع عالقلي.
6. قوام العجينة اذا سميك بيعطيكي عوامة مليانة زي كإنها خبز ، واذا العجينة طرية وسايبة زيادة بتطلع اشكال زي الاشباح لا يمكن تتكوّر وتعطي الشكل الكروي.
7. وجود الزيت بالعجينة بخلي العوامة ماتشرب زيت بالقلي.
سادساً/التقديم
قدميها مع رشة مكسرات او هيل مطحون او بدون شيء هيه منظرها بفتح النفس بدون شي وتهني فيها مع حبايبك والف صحة وهنا.
