المفتول ( طريقة فتل المفتول مع التهبيله الاولى والثانيه) ملكة رمضان
المفتول ( طريقة فتل المفتول مع التهبيله الاولى والثانيه) ملكة رمضان
المفتول ( طريقة فتل المفتول مع التهبيله الاولى والثانيه) ملكة رمضان
المقادير
- للفتل
- ربع كوب برغل ناعم
- كيلو طحين اسمر
- ٢ كوب طحين ابيض
- ٢ كوب ماء عليهم ٢ م ك ملح
- التهبيله الاولى:
- كميه ماء بطنجرة
- عجين عويص(١ كوب طحين ابيض عليهن مي زياده عنهم لحتى يطلع عجين عويص وبيلزق…رح ارفق صور)
- قشر بصل
- ملح
- بهار
- رشه هيل مطحون
- ٢ كوب ماء بارد
- التهبيله التانيه:
- للدفنه:
- بصله مفروم ناعمه جدا ومدقوقه
- ملح
- بهار
- فلفل اسود
- كمون
- رشه هيل مطحون
- كوب ونص زيت زيتون
- شوربه المفتول:
- دجاج
- كوب حمص منقوع جاهز للطهي
- ٤ بصلات مقطعات
- فلفل اسود
- بهار
- زيت نباتي مشكل
- ورقتين غار
- عودين قرفه
- رشه هيل مطحون
- للقلي:
- زيت نباتي
- طحين
الخطوات
السلام عليكم ورحمه الله …المفتول وما ادراك ما المفتول …عقد ما هو متعب وبيقسم الظهر نصين. ههههههههه عقد ما هو زاكي وليييي شو زاكي ..وبما انووو كان افطار تاني يوم حبيت شاركم طريقه الفتل والتهبيلات التنتين
وهالوصفه متوارثه كمان متل وصفه ( كبه اللبن بالارز المطحون ) …ورثتهها من عمتي يلي هي حماتي الله يرحمها …وعمتي اخدتها من تيتا يلي هي امها …وتيتا اخدتها من حماتها يلي هي خالتها …..وهيك بنكون وصلنا #طولكرم_فلسطين
والنعم من الجميع انتو الخير والبركه ياقلبوشاتي
نبلش شغل لانو بدو وقت ..وحبيت احط كل شي بوصفه وحده حتى ما تتعبو وانتو تبحثو عنها
ننقع البرغل بماء ليغطيه لمده ربع ساعه…ثم نصفيه …نضع الماء والملح بمرش ماء حتى يسهل علينا شغل …نخلط الطحين الاسمر مع الابيض ..ونجهز مصفاه لحتى ننخل المفتول
نبدا بوضع رشه برغل بسدر كبيير ثم نضع فوقها رشه طحين من المخلوط …ونفتل بشكل دائري باطراف الا صابع او راحه اليد المهم بشكل دائري ..ثم نرش ماء ونفتل . ونكمل ما بين رش الطحين مرة ثم رش الماء مرة بالتناوب …حتى يتشكل لدينا مجموعه كبيره من الحبيبات …نحرك السدر باتجاهنا وناخد الحبات الكبيرة ونضغها بالمصفاه …وهيك لمن نخلص كل الكميه يلي معنا ….ونصفي الكميه يلي معنا حتى تنزل الحبيبات الصغيره او الطحين العالق بالحبيبات زيادة
…لمن الحبيبات ماتعود تفتل ..نشيلهم ع جنب ونظف السدر من الطحين اللاصق فيه. ..ونعيد الكرة من الاول وهيك لنخلص كل الكميه …..ارفقت صور كاملة للخطوات
التهبيله الاولى نضع ماء بطنجرة مع قشر البصل( يلي قطعناه للشوربه) ونضع الملح والفلفل الاسود والهيل والبهار …ثم نضع فوقها المصفاه المليئه بالمفتول اللذيذ …وندهن جوانب الطنجرة مع المصفاة معا بخليط العجين العويص حتى تلتصق معا وما تعود تطلع البخار من الاطراف (بما انها مش طنجرة خاصه بالمفتول) ارفقت صورة
نغطي المفتول لنحافظ ع البخار ونحافظ ع المفتول من انو ينشف ….بعد غليان الماء ويلي بنعرف انها غليت من البخار الكثيف المتصاعد من فوق المفتول نوطي الغاز لتحت ..ونتركها ساعه الا ربع
بهالوقت نطبخ الدجاج لعمل الشوربه بوضع كل البصل الشرائح مع زيت نباتي …ثم نضع الدجاج والبهارات والملح ونخليهم شوي حتى يتغير لون الدجاج ثم نضع ماء يغطيها لمده ساعه ….ثم نضع الحمص المنقوع وجاهز للطهي بعد مضي نصف ساعه ع الدجاج
الان بعد انقضاء الوقت بالتهبيله الاولى …ناخد المفتول فقط ( اتركو الطنجرة والماء والمصفاه شغالين عادي …) ….نضعو داخل سدر ثم نضع ايدينا بكأس الماء البارد ونبدا نفكك حبيبات المفتول عن بعض ..ونرشرش بشكل بسيط جدا ع الحبيبات ونفكك ( انتبهو لانو المفتول جدا ساخن)
(((((((بهي المرحلة ممكن نفرزو …بس يبرد يوضع بكيس تفريز ويوضع بالفريز.. وبس بدنا نطبخو …بس يفكك من التلج …نعمل الخطوة التهبيله التانيه )))))))
الان نضع الدفنه يلي هي البصله مع البهارات والملح والهيل بقاع المصفاه ونوزعها جيدا ( ارفقت صورة)…ثم نضع فوقها المفتول ونتركو من ربع ساعه الا ثلث ساعة ونغطيه
بعد مرور الوقت ناخد المفتول وقد ذابت البصله المدقوقه جيدا ونضع فوقو ويت الزيتون تدريجيا ونفكفك البصله مع البهارات مع المفتول بطريقه البس( متل بس السميد) اي الفرك براحه اليدين التنتين
نقلي الدجاج ..ونزينووو بالدجاج المحمر وقليل من الحمص والبصل من الشوربة
ويقدم ….بالف هنا وصحه ****
