طريقة عمل القطر مستحيل يسكر معك وبعيش معك شهور ملكة رمضان

المقادير

• لتر ماء
• كيلو ونص سكر
• عصير نصف ليمونة

الخطوات

قطر ملكة رمضان

السلام عليكم ورحمة الله وبركاته

كثير انطلب مني القطر واجت الفرصة المناسبة انه اقدمه لانه استخداماته برمضان كثيييرة ، على سهولته الا انه سهل ممتنع كثير ناس بعملوه وبسكر معهم فاليوم يلي رح تتبع طريقتي بضمنلها 100% انه رح ينجح ومارح يسكر ابدا وبضل معك شهرين كمان بدون ما يصرله اي خراب او تلف او تسكير.

أولاً/ المرحلة الاولى على البارد

بنحط المي والسكر بطنجرة كبيرة وبنبلش نحرك لحتى يذوب السكر كله ، لازم يذوب وهاد اهم عامل من عوامل النجاح ، بياخد شوية وقت بس معلش بيستاهل بريحنا طول الشهر.

ثانياً/ الغلي

بعد ذوبان السكر بنرفع المحلول عالغاز نار حاميه طبعا وبفرشايه مبلولة مي بنمسح اطراف الطنجرة فوق مستوى السائل عشان نتخلص من اي سكر علق اثناء التذويب والتحريك. للغليان وبنوقف مسح.

— بعد الغليان بنعصر ليمون وبنتركه يغلي على نار متوسطة لمدة 10—12 دقيقة عشان يثقل لانه حلويات رمضان بدها قطر ثقيل من قطايف وعوامة واي حلو مقرمش.

—بنتركه يبرد

ثالثاً/ الحفظ

بنتركه يبرد وبنفرغه بجاط زجاجي او مرتبان زي مابدك ، يفضل ينحفظ بالثلاجة لانه نسبة مي عاليه فيه بس بهالجو برا الثلاجة عادي كمان.

—بضل مدة طويلة شهرين تقريبا ممكن اكثر كمان.

نصيحة/

اعملي من بداية شهر رمضان كمية قطر كبيرة تكفي كل الشهر عشان ما تضيعي وقتك الثمين في الشهر الفضيل وعشان يكون جاهز وبارد للحلويات.

—بتمنى يكون اكبر عدد من الستات استفاد من الوصفة البسيطة ولكنها ضرورية وصحة وهنا.